Matéu

Nainnium Jesus étserma

5 Jesus untsurí shuar káunkarun wainiak nainnium waka nui̱ pujusmiayi. Tura ni unuiniamuri̱sha taar pujusármiayi. 2 Nuyá̱ Jesus jú̱nis unuiniamiayi.

Yusna warastin ainia nu

(Ruk. 6:20-23)

3 “Atumí wakaní̱ atsumamu nekaamarum tí shiir enentáimsamniaitrume. Warí Yus akupeamuka atumniaiti. 4 Útutirmesha tí shiir enentáimsamniaitrume. Warí átum nekaska atsaṉkramu átatrume. 5 Péejchachitirmesha tí shiir enentáimsamniaitrume. Warí átum nuṉka sunastatrume. 6 Nekasa nuja̱i̱ métek túrutai̱n tsukamana tura kitiamana tímiatrus enentáimtatirmeka tí shiir enentáimsamniaitrume. Warí nuka tímiatrusrumek wainkiattarme. 7 Waitneṉkratniutirmesha tí shiir enentáimsamniaitrume. Warí nekaska átum waitnennartatrume. 8 Atumí enentái̱n imiatkincha ajasu asarum tí shiir enentáimsamniaitrume. Warí átum nekaska Yus wainkiattarme. 9 Itiurchat ámanum chícham iwiararum aṉkant awajkartintirmesha tí shiir enentáimsamniaitrume. Warí átumka Yusa uchirí̱nti tunattarme. 10 Nekasa nuja̱i̱ métek túrakrumin apapétmainiakuiṉkia tí shiir enentáimsamniaitrume. Warí Yus akupeamuka atumniaiti. 11 Wi shuar ajasu asakrumin wáitruiniak katsekramainiakuisha núnisaṉ apapétmainiakuisha tura náṉkamas chichartamainiakuisha tí shiir enentáimsamniaitrume. 12 Kame yaunchu Yúsnan etserin átumka atsarmin pujuarmia nunasha núnisaṉ túrawarmiayi. Tuma asamtai shiir enentáimsarum warastarum. Warí átumka nayaimpiniam ti shiir naṉkaamas péṉkera nuja̱i̱ akinkiáttarme” tímiayi.*

Átumka tsáapninia tura weeya áintsaṉketrume

(Mar. 9:50; Ruk. 14:34-35)

13 “Átumka ju̱ nuṉkanam wee ana áintsaṉketrume. Túrasha wéeyaitiatrum jeakchaitkiuṉka míchuiti. ¿Nusha itiur yuámniak ati? Antsu ántraiti. Tuma asamtai a̱a̱ najatai tepet tusar aya ajapatniuiti.

14 Tura átumka ju̱ nuṉkanam shiripkia áintsaṉketrume. Kame nainniumka pepru úmkachminiaiti. 15 Núnisaṉ shiripik ekemákam eṉketáiniam eṉkeatniukait. Antsu yakí̱ sukuatsmek ashí je̱a̱nam ana nu paant atí tusam. 16 Núnisrumek atumsha Yusja̱i̱ péṉker túramu paant atí. Tura ashí aents nuna iisar nisha Yus Apan shiir awajsártatui” tímiayi.

Yaunchu akupkámun Jesus pachis unuiniamu

17 “‘Muisais akupkámuncha tura yaunchu Yúsnan etserin etserkarmia nuna ántar awajsattawai’ turutiirap. Antsu nuna Wikia umiktaj tusan táwitjiai. 18 Nekasan tájarme. Ashí túrunatniua nu amúatsa̱i̱ṉ nu akupkámu ishichkisha yapajniáshtatui. Nayaimpisha tura nuṉkasha tuke amúatsa̱i̱ṉ nu akupkámusha amuukashtatui. 19 Nu asamtai shuar chikichik akupkámun, yúpichuch ana nunaksha, umirchakka tura chíkich shuaran umirkashtinian unuiniakka Yus nekas akupin paant ajastatna nui̱ nú shuar uunt áchattawai. Antsu ashí shuar akupkámun umíana nu tura chíkich shuaran umirkatniun unuiniana nusha Yus nekas akupin paant ajastatna nui̱, nu shuarka uunt átatui. 20 Tuma asamtai Yus akupeamunam pachinkiataj tákumka Pariséuja̱i̱ naṉkaamas tura akupkámu jintinniuja̱i̱ naṉkaamas eseera wekasatniuitrume” tímiayi.

Kajeamun Jesus pachis unuiniamu

(Ruk. 12:57-59)

21 “Yaunchu tiniu armia nu ántichukaitrum ‘Maṉkartuawairap. Maṉkartana nuka asutniátniuiti’ tiniu ármiayi.* 22 Tura Wisha tájarme, shuar ni yachi̱n aya kajerakka nusha asutniátniuiti. Ni yachi̱n kátsekea nuka akupniúnam junaktiniaiti. Tura ni yachi̱n ‘netsé’ tákuṉka jinium akupnákminiaiti.

23 Tuma asamtai Yus susataj tusam wakerakum tura ame yátsum ámin itit enentáimturman enentáimpramka 24 súamu nui̱ ikiuakum emka ame yátsum werim niji̱a̱i̱ iwiarata. Túram waketkim Yus súam nu susata.

25 Shuar úuntnum júramkuiṉkia jíntiaṉ wesam niji̱a̱i̱ iwiarata úuntnum ejetamtsa̱i̱ṉ. Túrachakminkia úuntnum surutmaktatui tura nisha suntarnum surutmaktatui nuyá̱ sepunam eṉketmattawai. 26 Tura nekas tajai nui̱ eṉkemámka ashí akí akikmá ajachkumka jíinkishtatme” tímiayi.

Tsanirmatniun pachis Jesus unuiniamu

27 “Yaunchu tiniu armia nu ántichukaitrum ‘Tsanirmawaip.’* 28 Tura Wisha tájarme, shuar nuwa̱n iis wakerukka ni enentái̱n tsanirmayi.

29 Tuma asamtai ame ji̱misha untsuurumetiat tunaanum aju̱nmármin awajtamkuiṉkia ukuinkiam yajá ajapata. Warí, takamtsuk péṉkerak jinium esaatniuja̱i̱ṉkia aya̱shmi muchitmari̱ chikichik emeṉkáktin timiá péṉkeraiti. 30 Ame uwejmesha untsuurumetiat tunaanum aju̱nmármin awajtamkuiṉkia tsupikiam yajá ajapata. Warí, takamtsuk péṉkerak jinium esaatniuja̱i̱ṉkia aya̱shmi muchitmari̱ chikichik emeṉkáktin timiá péṉkeraiti.

Nuwa̱ ajapatniun pachis Jesus unuiniamu

(Mat. 19:1-12; Mar. 10:1-12; Ruk. 16:18)

31 Núnisaṉ yaunchu tiniu ármiayi ‘Shuar ni nua̱ri̱n ajapatniun wakera nuka papí najana susati.’* 32 Tura Wisha tájarme, shuar ni nua̱ri̱n tsanirmachun ájapeakka nuwa̱n tsanirmamtikiaiti. Tura ajapamuja̱i̱ nuatnaiyakka nuka tsanirmaiti.

Jesus aya nekasa nu títinian unuiniamu

33 Núnisaṉ yaunchu tiniu ármiayi ‘“Yusa naari̱ pachisan túrattajai” tákumka nekas takamtsuk umiktiniaitme.’* 34 5:​34-37 Tura Wisha tájarme, áyatik ‘Ee’ tákumka tura ‘Atsá’ tákumka wáitrutsuk nuke titiá. Támena nu nekas umiktaj takum ame nú arant pachistiniaitkiumka nuka yajauchiti, iwianchniumia̱iti. Ti nekas tajai tusam nayaim pachischatniuitme. Nuka Uunt Yus pujutainti. Nuṉkasha pachischatniuiti Yusa tarimtairi̱* asamtai. Jerusaréṉsha pachischatniuiti Úunt Akupin pujutai̱ nui̱ asamtai. Muukmesha pachischatniuitme. Chikichik intiashkesha pújusha mukusasha awajsachminiaitme. Áyatik nekasa nu páchitsuk titiá.

Íikiatniun pachis Jesus unuiniamu

(Ruk. 6:29-30)

38 Yaunchu tiniu armia nu ántichukaitrum ‘Shuar mánikiar ji̱ apujtúkka nisha apujtúktiniaiti. Tura nai̱ akarkásha ni nai̱sha akarkatniuiti.’* 39 Tura Wisha tájarme, yajauch shuar taritrairap. Antsu ame yapimin ijiutmamtai aatú yapimsha tsaṉkatkata. 40 Tura pushirmin jurutrámkitiaj tákuisha sakurmesha susata. 41 Tura kijincha chikichik kirumitruk jurutkitia túramkui ámeka jimiará kirumitru ejeeta. 42 Seatmana nu susata. Ikiatmakuisha páchitsuk ikiasta.

Nemasri̱ aneetniun Jesus unuiniamu

(Ruk. 6:27-28, 32-36)

43 Núnisaṉ tiniu armia nu ántichukaitrum ‘Ame shuarum aneata tura nemasrumka kajerkata.’* 44 Tura Wisha tájarme, nemasrum aneetarum. Yajauch chichartamna nusha shiir awajsata. Nakitramana nusha nawamkata. Tura katsekramainiana nu tura yajauch awajtámainiana nusha Yus áujtusarta. 45 Atumsha nu túrakrum atumí Aparí̱ nayaimpiniam pujana nu túrana áitkiasrumek túrarme. Iistá, Yus yajauch shuarnumsha péṉker shuarnumsha tsáapin awajmatkiatsuk. Núnisaṉ yumincha yajauch shuar pujuiniamunmasha péṉker shuar pujuiniamunmasha yútumtiktsuk. 46 Aya atumín anenmainia nuke aneakmesha ¿yaki akirmakat? Yajauch shuarsha nuna túrin áiniawai. 47 Aya áme yatsumek shiir chichakmeka ¿warí péṉkerak túram? Yus shuarchasha nuna túrin áiniawai. 48 Nu asamtai atumí Aparí̱ Yus nayaimpiniam pujana nuja̱i̱ métek ti péṉker átiniaitrume.