Nekatai̱n Jintinkiartin
23 Aents peṉkeri̱ yurumátniunam ipiatmakuisha
emka iisam péṉker enentáimprata.
2 Ti tsukamakmesha tsuka katsuntrata.
3 Nu yurumak kunturmaitkiuisha wakerukaip
Nu yurumkanam ánaṉk áminiaiti.
4 Kuítrintin ajastaj tusam ti takakmasaip.
Tu enentáimsatniuka iniaisam naka enentáimin atá.
5 Péṉker enentáimsamka kuítriniatniuka ántraiti
tuma asa nanamtinia núnis ti wárik nanaki̱ meṉkain áiniawai.
6 Shuar suria nuna ekentsa yurumtairi̱n pujusaip.
Túram ni yurumkari̱ tí peṉker iwiaramua nu wakerukaip.
7 Nekas enentáiji̱a̱i̱ turamchiat iiji̱a̱i̱ yurumámi
tura umarmi tusa ipiatma nusha nekas enentáiji̱a̱i̱ túramtsui.
8 Tuma asamtai yurumámna nu urum iyaktatme
túram ame chichamem peṉké ántram wasurkame.
9 Nétsea nuka áujsaip.
Warí ámeka nékakum péṉker chichamni̱ṉ anturtamkatniun nakitiak wishikramprattawai.
10 Yaunchu nuṉka nakakma nu yapaji̱áwaip
núnismek mitiaikia nuṉke̱sha jurukip.
11 Warí uchi mitiaik ainia nuna Ayamprinkia ti kakarmana nuiti.
Tuma asa uchi túramunam ámin sumamtikramattawai.
12 Péṉker enentáiji̱a̱i̱ jintíamusha enentáimtusta
núnisaṉ nekatai̱ jintía nusha péṉker anturkata.
13 Uchi jintintiátin iniaisaip
Ame asutiakmesha nuja̱i̱ máshtatme.
14 Kame ame uchiram jintinkiumka
jákatniua nuyá̱ uwemtikrattame.
15 Winia uchiru, ti neka enentáimniuitkiumni̱ṉkia
winiasha ti waramtikrame.
16 Tura ti neka ímiatrusam chichaakmin
nuna anturkan ti wararsattajme.
17 Yajauchin túruiniana nu ame enentáimji̱a̱i̱ wakerukaip.
Antsu ámeka Uunt Yus ashamakum ashí tsawant shiir enentáimtusta.
18 Túrakmeka ukunam péṉker pujustatme
tura ame nekas enentáimtamna nusha wainkiattame.
19 Uchiru, winia chichamur antukam neka atá
túram esetram enentáimpram wekasata.
20 Wíniun ti úmin tura ti ushumin ainia núja̱i̱sha tsaniṉkiaip.
21 Kame nampen tura aya yurumin ainia nuka kuítrincha ajasártatui.
Núnisaṉ nakimiak kanú tepenka jáanchin entsarartatui.
22 Ame apa yajutmatmarua nu umirkata
tura ame nuku úuntach ajasmataisha nakitraip.
23 Nekasa nusha tura ti neka átincha
núnisaṉ unuimiártincha nuyá̱ enentáimtai̱sha sumakta túram surukaip.
24 Péṉker enentáimkia aparí̱ṉkia ti warastatui
tura tí nekaan yajutma nuka niji̱a̱i̱ warastatui.
25 Ame apasha tura nukusha warasarti
núnisaṉ takurmasua nusha shiir enentáimsati.
26 Uchiru winia enentáimtursata
tura wi túrajna nu péṉker iistá.
27 Tsanirmatai nuwa̱ nuka wa̱a̱ init ménaku taurma núnisaiti.
28 Nú nuwa̱ka kasa nuke untsurí shuaran meṉkakatniunam juíniawai.
29 ¿Ya waitia. Ya najaimia.
Ya katsumnainia. Ya útas wekáa.
Ya peṉké ántar numpamkamuit. Ya ji̱ kapa̱a̱ku ajas iimia?
30 Nampetan peṉké iniaicha
tura umutai̱n chíkich ti kakaram ainia nuna umúu ajat tura nekapin ainia nu áiniawai.
31 Umutai̱ karía ainia nuka émamkesam íistaj tiip.
Warí uka̱i̱msha tsakirtatsuk. Tuma asa umúu ajatchakait.
32 Túmaitiat napia núnis esakratniuiti
tura napí najawe̱ya̱ tímianaiti.
33 Túmakum nekaachmin íimtikramprattui.
Túrunam enentáimtsuk chíchamcha nu chichaktatme.
34 Tura nuya̱ṉka entsá pátatek tepá núnin enentáimtiatme
nuyá̱ kanunam numi ukuamua nuna tsakari̱n awantua núnisam nekaptiatme.
35 Tura chichaakum “Awaturarmai túrasha najaimiachmajai.
Asutiuáwarmai túrasha nekaprachmajai.
Túmaitkiuisha shintiarnaka ataksha umuuttajai” títiatme.