1 Kurintiunam
Yusa Wakaní̱ ni shuari̱n susamu
12 Yusa Wakaní̱ ashí ni shuari̱n súana nuna yamái ujaktatjarme. Nekaatarum, yatsuru. Yus shuar shiir takasárti tusa Yusa Wakaní̱ ju̱na súsaiti.
2 Yaunchu átum Yus shuar ajatsuk chíkich shuarja̱i̱ métek najankamu yus tikishmátramarme. Nisha najanamu yus ásar áujmattramsachmin ármiayi. 3 Tura jú̱ja̱i̱ṉ shuar Yusa Wakaní̱ kakarmari̱ji̱a̱i̱ chichaana nu nekaamniaiti. Yusa Wakaní̱ji̱a̱i̱ṉkia shuar “Jesus yajauchiti” tíchamniaiti. Núnisan aya Yusa Wakaní̱ji̱a̱i̱ṉ “Jesus winia Úuntur asa akuptúktiniaiti” tíminiaiti.
4 12:4-5 Yusa takatri̱ íruntsuk. Tura Yusa Wakaní̱ṉki ashí nuna takastinian súsaiti. Tura shuar Yus shuara uuntri̱ chikichik ai̱ṉ ashí Yusa takatrí̱n métek takaatsui. Antsu chikichkin ashí naṉkaamas péṉker takaawai. Yusa Wakaní̱sha nuna shiir takasat tusa suawai. Tura Ni wakera nuna Niṉki ni shuari̱n chikichik chikichik niisháa niisháa suawai. 6 Yúskete ashí ni shuari̱n niisháa takamtikna nu. Niṉki ashí ni shuari̱ enentái̱n takaak takatnasha shiir takamtikeawai. 7 Yusak túratin súam Yusa Wakaní̱ kakarmari̱ paant átatui nu takasmanum. Tura ashí shuar ní takatrí̱ji̱a̱i̱ yáiniaiktin áiniawai. 8 Jú̱naka Yus takamtikeawai. Nékana nu shuarnasha, unuimiárua nunasha Yúsnan ujaktinian suawai. Tura mái̱ shuaran Yusa Wakaní̱ kakarmari̱ji̱a̱i̱ nuna túratniun súsaiti. 9 Chikichnasha Yusan áujenak Yusan ti enentáimtusar nekas itiurchat ana nuna iwiaratniun suawai. Nincha Yusa Wakaní̱ kakarmari̱ji̱a̱i̱ nuna takastinian súsaiti. Chikichnasha jaan tsuártinian suawai. 10 Chikichnasha aents niṉki túrachminian túratniun suawai. Chikichnasha Yúsnan etserkatniun suawai. Chikichnasha shuar wari yajauch wakannia péṉker wakanniasha apatka nekaatniun suawai. Chikichnasha niisháa chichaman chichastinian suawai. Chikichnasha niisháa chichasman jintíatniun suawai. 11 Tura ashí shuara enentái̱n nu Wakanik takaawai. Tura Ni wakera nuna takastinian aṉkant aṉkant suawai.
Yus shuar Kristu aya̱shí̱ aya̱shimkiaiti
12 Iikia Kristu aya̱shí̱ya áintsari aya̱shímkiaitji. Kristu aya̱shí̱ muchitmari̱sha írunui. Nisha túmaitiat chikichik aya̱shtiniaiti. 13 Tura imianiakrin Yusa Wakaní̱ chikichik awajtámsamji, Kristu aya̱shí̱ya áintsaṉ. Israer shuarsha, Israer shuarchasha, ti itiurchat takaana nusha, aṉkant ainia nusha, ashí yamái chikichik ajasuitji. Tura Yusa Wakaní̱ pimiutkamuitji Niji̱a̱i̱ tsaniṉkia pujakur.
14 Aya̱shi muchitmari̱ aya chikichkichuiti. 15 Tuma asamtai winia nawer uwejruchuitiat tuke winia aya̱shrunuiti. 16 Winia kuishrusha jí̱ruchuitiat tuke winia aya̱shrunuiti. 17 Wátsek winia aya̱shur aya jí̱i̱kitkiuiṉkia ¿itiurak antukaintiaj? Winia aya̱shrusha aya kuíshkitkiuiṉkia ¿wariji̱a̱i̱ṉ nekapsaintiaj? 18 Nu asamtai Yus winia aya̱shru muchitmari̱ ni wakeramunam ikiusuiti. 19 Chikichik muchitmaja̱i̱ṉ ¿aya̱sh áminkiait? 20 Antsu untsurí muchitma ákuisha chikichik aya̱shkiti. Iisha núnisrik chíkich chíkich iisháa takayatrik métek takasar Yus wakeramu takamtsuk umíaji.
21 Winia ji̱ru péṉker ai̱ṉ winia uwejrúncha wakerishtatjak. Winia muukarsha péṉker ai̱ṉ winia nawernasha wakerishtatjak. Núnisaṉ Yus shuar shiir enentáimtumak ni yachi̱n “atsumatsjame” tíchamniaiti. 22 Antsu ii muchitmiari̱ ishichik enentáimtajnia nu atsakuiṉkia ti atsumawaintji. 23 12:23-24 Chíkich muchitmasha ímiancha nu, shiir iwiarmamtaji. Tura nu muchitmaka shiir íisminia nuja̱i̱ naṉkaamas péṉker wainji. Iis, shiircha nu antsu péṉker wainji. Yus ii aya̱shi̱n núnisaṉ atí tusa najanamiayi. 25 Núja̱i̱ṉkia aya̱shí̱ muchitmari̱ mánaitsuk métek yáiniainiawai. 26 Chikichik muchitmiaram najaimiakum ashí aya̱shnium wáitiatsmek. Núnisaṉ chikichik muchitmiaram ayap ajakum ashí aya̱shnium shiir átsumek.
27 Núniskete Kristu aya̱shí̱ji̱a̱i̱ aya̱shímkiaji nu. Tura chíkich chíkich ni muchitmari̱ aji. 28 Aya̱shnium muchitma írunna áintsaṉ Yus ni shuari̱n untsurí takatan súsaiti. Emka Yus akatrámu nuyá̱ ni chichame̱n etserin nuyá̱ jintinkiartin nuyá̱ aents túrachminian túrin nuyá̱ tsuákratin, nuyá̱ yáiṉkratin, nuyá̱ akupin, nuyá̱ niisháa chichamja̱i̱ chicharin, mash írunui. 29 ¿Ashí Yus akatrámuk ainia. Ashí Yus Chichaman etserniuk ainia. Ashí jintinkratniuk ainia. Aents túrachminian ashí túriniak ainia. 30 Ashí tsuákratniuk ainia. Ashí niisháa chichamja̱i̱ chichamtiniak ainia. Ashí niisháa chichamja̱i̱ chichasman jintiṉkratniuk ainia? Atsá. Túmachuiti. 31 Túmaitkiuiṉkia péṉkera nu takastin wakeruktarum. Tura imiá péṉkera nuna ju̱i̱ jintintiátjarme.