Márkus

Yajauch takakmau

(Mat. 21:33-46; Ruk. 20:9-18)

12 Jesus ju̱ métektaku chichaman unuiniamiayi. “Shuar uwa ajan ajam wenuimiai. Nuyá̱ uwa neketain najanamai. Tura kumpin je̱a̱n najanamai.* Najana takartusti tusa shuaran ikiuak niṉkia jeachat wemai. 2 Neretai tsawant jeamtai ni takarniúri̱n juukman akankat tusa akupkámai. 3 Tura ajanam takáu arma nu, nu takarniun achik katsumkar áyatik awaiṉkiarmai. 4 Ataksha chíkich takarniun akupkámai tura nunasha kayaja̱i̱ tukurar muuknum katsumkar katsekkar awaiṉkiarmai. 5 Tuma ai̱ṉ ataksha chikichan akupkámai tura nunasha máwarmai. Tí untsurín akuprámai. Chikichnasha katsumkarmai chikichan máwarmai.

6 Tura niji̱a̱i̱ chikichik tuke ámiayi, nuka ni aneamu uchirí̱. Nu uchincha ukunam akupkámai. Akupeak ‘Winia uchirnaka shiir awajsártatui’ tímiayi. 7 Tura ni uchirí̱ winian wáinkiar takáu shuar nuamtak chichainiak ‘Ju̱ka ajá nérenniu uchirí̱nti. Wátsek, maatai túramka ájaka iiniu átatui’ tiarmai 8 tusar achikiar máwarmai. Aya̱shi̱ncha ajanmaya̱ ajapawarmai” tímiayi. 9 Tura nuyá̱ aniasmiayi “¿Wats, warí enentáimsarum ajá nérenniuri̱ itiurkattawa? Jeashtanmaya̱ taa ajan takainia nú shuaran amuktatui. Ni ajarí̱ncha chikichan ikiastatui. 10 Ju̱, Yus Papinium aarma ana nu áujsachukaitrum.

12 Tura nú metektaku chichamja̱i̱ nin áujmatma asa achiktai tusar chichaman jurusármiayi. Túmainiayat shuaran ashamainiak Jesusan ikiuiniak wéarmiayi.

Uunt akupin súsatin tura Yus súsatin

(Mat. 22:15-22; Ruk. 20:19-26)

13 Tura wéar imiaamtikiar yajá chichakmatai nuja̱i̱ yajauch títiai tusar Pariséu shuarnasha Irutisa nemari̱n shuarnasha akatar Jesusan akuptúkarmiayi. 14 Túram Nin jeariar chicharainiak “Uuntá, aents nakitiáiniai̱ṉ tuke nekas chicham páchitsuk chichaame, nu nékaji. Aents pátatek iyatsme antsu nekas Yusa jinti̱ unuiniame. ¿Waritia enentáimiam, ii kuitri̱ uunt Sésar súsatin péṉkerkait. Susattajik. Suritkiattajik? Nu nekaatai tusar wakeraji” tiármiayi. 15 Tura Jesus ni yajauch enentáimmiari̱n nekara “¿Urukamtai Winia yajauch titi tusarum wakerutarum? Kuit itiatárum, Wi íistaj” tímiayi. 16 Tutai kuítian itiariármiayi. Jesus nuna iis chicharainiak “¿Ju̱i̱sha yana yapi̱ tura yana naari̱ áarmait?” tímiayi. Tutai “Uunt Sésarna” tiármiayi. 17 Nuyá̱ Jesus chichaak “Uunt Sésarna ana nu susatarum. Túrarum Yúsnaka Yus susatarum” tímiayi. Tura ni áimkiamuri̱n antukar ti enentáimprarmiayi.

Aents nantaktinian Satuséu anintramu

(Mat. 22:23-33; Ruk. 20:27-40)

18 Nui̱sha Satuséu aents jakamunmaya̱ nantakchatniuiti tiniu armia nu Jesusan tariarmiayi. Taar Jesusan chicharainiak 19 “Uuntá, Muisais ju̱na áatrampramiaji. ‘Áishmaṉ ni nua̱rí̱ takatsa̱i̱ṉ jakamtaiṉkia yachi̱n yajutmatrattsa, ni yachi̱ nu waje̱n nuatkatniuiti.’* 20 Wats, siati yachi ármiayi. Iwia̱i̱ri̱ nuwa̱n nuatak yajutmatsuk jakamiayi. 21 Ni yachi̱ waje̱n akinkiamiayi. Nusha núnisaṉ yajutmatsuk jakamiayi. Nuna yachi̱sha núnisaṉ tura nuna yachi̱sha núnisaṉ túramiayi. 22 Tura ashí siati patai̱nmaṉ, patai̱nmaṉ nu nuwa̱n nuatkarmiayi. Yajutmatsuk, yajutmatsuk jíiniawarmiayi. Tura ukunam nuwa̱sha jakamiayi. 23 Nuiṉkia nantaktin tsawantai̱ nantakiarmatai ¿yana nua̱ri̱ṉ ati? Ashí siati nuatkacharmaka” tiármiayi.

24 Tutai Jesus chichaak “Jakamunmaya̱ nantaktin atsawai tátsurmek. Yusa Chichame̱ tura Yusa kakarmari̱ nékachu asarum awajiarme. 25 Íimiatarum, aents jakamunmaya̱ nantakiarmatai nuatnaikiatin atsuttawai antsu nayaimpinmaya̱ suntara núnisaraṉ pujusártatui. 26 Tura jakamunmaya̱ nantaktiniapitia tusarum nu nekaatin nekas wakerakrumka Muisais aarmia nu enentáimtustarum. Yuska numichinmaya̱ Muisaisan chicharuk ‘Wikia Aprajáma Isaka tura Jakupu Yúsri̱ntjiai’ Yus tímiayi.* 27 Yaunchu jákaru ai̱ṉ, Yus nuna taku, aya̱shnium jakayat iwiaaku pujuinia nuna Yúsri̱ntjiai, tawai. Nekas jaka ainia nuna Yúsri̱nchuiti. Nantaktin atsawai tau asarum awajirurme” tímiayi Jesus.

Yus akupkámu tí peṉker ainia nu

(Mat. 22:34-40)

28 Jesussha Satuséusha áujmatnainian Israer shuara jintinniuri̱ taa anturkamiayi. Anturak Jesus tí peṉker aimkiui nisha Jesusan ju̱na aniasmiayi “¿Yus akupkámu túa imiá péṉkerait?” tímiayi. 29 Tutai Jesus chichaak “Ju̱i̱ti emka akupkámuka. Israerá antukta. Yus nekas ii Yusri̱ṉkia Uunt Yus chikichkiti.* 30 Tura Uuntka ame Yúsrumka nekas enentáimji̱a̱i̱ wakanmiji̱a̱i̱sha enentáimtairmiji̱a̱i̱sha tura ashí kakarmarmiji̱a̱i̱ takamtsuk aneata. 31 Nuya̱sha chikicha awai ‘ame aya̱shim aneamna tímiatrusmek ame írutramuram aneeta.’* Chíkich nú naṉkaamas péṉker akupkámu atsawai” tímiayi. 32 Tutai jintintin chichaak “Ee, péṉkeraiti Uuntá. Nékasmek tame. Chikichík Yus awai* chíkichkia atsawai.* 33 Tura tuke enentáiji̱a̱i̱ ti enentáimsar ii kakarmari̱sha Yus íktusar Ni aneakrikia* ii aya̱shi̱ aneajnia núnisrik ii írutramuri̱sha aneatniuitji.* Nusha ashí Yus sutai ana nuja̱i̱ naṉkaamas péṉkeraiti” tímiayi.

34 Nuna tiniu asamtai Jesus ni péṉker áimkian nekáa chichaak “Ameja Yus akupeamunam pachinkiatin ishichik táasume” tímiayi. Tura nuyá̱ chíkich shuar Jesusan aniastinian arantúkarmiayi.

Kristu tutai ¿yana uchirímpiait?

(Mat. 22:41-46; Ruk. 20:41-44)

35 Jesus Yusa Uunt Je̱e̱n unuiniak pujumiayi. Tura chichaak “¿Urukamtai ii jintinniuri̱ ‘Yus anaikiamu Krístun Tawitia shuari̱’ tuinia? 36 Tawit, antsu Yusa Wakaní̱ aartá tutai, Yus Papinium ju̱na áarmiayi.

‘Uunt winia Úuntrun chichaak “Ame nemasrumin nupetkan amúatsa̱i̱ṉ winia untsuurui̱ni̱ni̱ pujusta.”’*

37 Kame Tawitkia Krístun áujmatuk ‘winia Uuntru’ tai̱sha ¿itiura ní shuari̱sha átiṉ^ki?” tímiayi Jesus. Tuma asamtai untsurí shuar nui̱ matsamármia nu ti shiir antukarmiayi.

Israera jintinniuri̱ji̱a̱i̱ aneartarum

(Mat. 23:1-36; Ruk. 11:37-54; 20:45-47)

38 Jesus unuiniak chichaak “Israer shuara jintinniuri̱ ainia nuja̱i̱ aneartarum. Nisha waantu enentáimtumasar nuntuaru pushin entsarar wekasatajtsar wakeruiniawai. Péprunmasha shuar shiir áujtusarat tusa wakeruiniawai. 39 Israer shuar iruntai̱niam peṉkeri̱ pujutai̱nium pujustinian wakeruiniawai. Nampernumsha peṉkeri̱ pujutai̱nium pujustinniasha wakeruiniawai. 40 Tura wajé̱ je̱e̱ncha atantáiniawai. Túrawar aents nekaracharat tusar ti esaram chichamja̱i̱ Yusan áujainiawai. Nincha chikichja̱i̱ naṉkaamas Yus asutiáwartatui” tímiayi.

Waje̱ kuítri̱n susamu

(Ruk. 21:1-4)

41 Jesus Yusa Uunt Je̱e̱n kuít eṉketai̱niam naka pujus aents kuítri̱n chumpían wainkiamiayi. Untsurí kúitrintin núkap eṉkeawarmiayi.

42 Nuyá̱ wajé̱ kuítrinchaitiat taa jimiará sentapuchiniak eṉkeamiayi. 43 Jesuska unuiniamuri̱n untsuk “Nekasan tájarme, ju̱ waje̱ kuítrinchaitiat ashí eṉkeena nú naṉkaamas núkap eṉkeayi. 44 Iis, kuítrinniusha ni ampirma nuna eṉkeenawai tura antsu ju̱ nuwa̱ kuítrinchaitiat ampirmatsuk ni yurumátniuri̱n takurmakman ashí eṉkeayi” tímiayi.