1 Samuir

Kiira péprun Tawit aṉkant awajsamu

23 23:1-5 Jiristíu aents Kiira péprun mesetan najatawar yurumkari̱ncha atantáiniawai táman Tawit nekáa Uunt Yusan chicharuk “¿Jiristíu aentsun werin jatekártatjak?” tutai Uunt Yus chicharuk “Ee jatékárta” tímiayi. Túrasha Tawitia shuari̱nkia sapijmiarmiayi. Túmainiakui Tawitian ataksha Uunt Yus aya̱k “Wetá, Wi Jiristíu aentsnaka ame nupetkarai tusan ame uwejmín íktuan iniaitiústatjame” tímiayi. Tutai nui̱ṉkia ashintiukar nupetmakar waakarí̱ncha yarurkarmiayi. Tura Kíiranam matsamin armia nú aentsun Tawit aṉkant awajsarmiayi.

Tawit Kíiranmaya̱ pisarma

6 23:6-13 Yúsnan pujurin Ajimiríkia uchirí̱ Awiatár Tawitiai̱ wéak awaṉkéman jukimiayi. Tawitkia Kíiranam pujan Saur nekáa meset najatar Tawit aentsri̱ntiuk achiktai tusa ashí aentsun ujakármiayi. Kame Tawitkia Saur kajerak yajauch awajsatniun enentáimtimia nuna nékarmiayi. Nuyá̱ Yúsnan pujurin Awiatáran chicharuk “Awaṉkém itiata” tutai awaṉkéman itiamtai Tawit Yusan chicharuk “¿Saur winiawak tura Kíiranmaya̱ aents Saura uwejé̱n íktursattuak?” tímiayi. Takui̱ Yus aya̱k “Ee nuka túrunatui” tímiayi. Tutai Tawit ní suntari̱ saisiantu armia nuja̱i̱ Kíiranmaya̱ pisarármiayi.

Tawitji̱a̱i̱ Junatán ataksha iṉkiunaikma

14 23:14-18 Nuyá̱ Junatán wajaki̱ Úrisnum Tawitian werimiayi. Tura chicharuk “Sapijmiakaip winia apar Saurka amincha waitmakchattui. Ámeka Israernum úunt akupin átatme tura wikia amiiya̱ pátatka átatjai. Winia apar Saursha núnaka nékawai” tímiayi. Nuna chichasua umikiar Uunt Yus íimmianum chichaman najanawarmiayi. Tura Tawitkia Úrisnum juákmiayi tura Junatánka ni je̱e̱n waketkimiayi.

Saur Tawitian téntakma

19 23:19-29 Tawitkia Úrisnum ú̱mak pujawai tu Saur ujaktai tusar Sépnumia̱ wákarmiayi. Nuna nekáa Saur shuaran yaruak Tawit e̱a̱ktai tusa jiinkimiayi. Tura Tawit ujakam Maun kampuntin atsunumaani̱ akaikímiayi. Antsu Saurka naintia yantaméni̱ṉ pataatuki̱ wémiayi tura Tawit niji̱a̱i̱ yujarmia nui̱m wárikmas wéarmiayi. Warí chíkich yantamnumaani̱ṉkia Saur tura niji̱a̱i̱ yujarmia nuja̱i̱ Tawitian tenta eṉkektai tusar yujarmiayi. Túmainiai̱ Sáuran tarí chicharuk “Wárik wetá, túram winitiá. Warí Jiristíu aents nuṉkan ti yajauch awajsarai” tímiayi. Nuna antuk Saurka Tawit patatamun iniaisámiayi. Antsu Tawitkia Úrisnumia̱ jiinkí̱ Eṉketiniam pujusmiayi.