Yus Kanta
Métek sumamtikin Uunt Yus
94 Tunáa ayamkartin Uunt Yusá,
ame kakarmaram iniakmasta.
2 Ashí nuṉkan Sumamtikin Uuntá, páantniuram iniakmamsata.
Túrakum naṉkamantu enentáimtuma ainia nuka ni túramuri̱ji̱a̱i̱ métek sumamtikiawarta.
3 Uunt Yusá, Yusan umircha ainia nusha ¿tímiataiṉ warasarat?
4 Yajauchin chichasar charaatum ajainiak núnisaṉ tunáa túrawar warainiak
yajauchin áujmatrum ajainia nusha ¿urutái iniaisartata?
5 Uuntá, ame shuarumin yajauch awajainiak wáitkiainiawai.
6 Túrawar waje̱ncha, irarnasha, mitiaikiancha máiniawai.
7 Túruiniak “Jakupa Uunt Yusri̱ṉkia wáitmachu asa
peṉké nekarmashtatji” tuíniawai.
8 ¡Peṉké ántichu árumna nu shuartiram antuktarum!
Atumsha ¿urutáik péṉker enentáimkia átincha nekaatarum?
9 Nuiṉkia antutain najatrama nuka ¿ántatsuak?
Núnisaṉ ji̱min najatrama nusha ¿wáitmatsuk?
10 Kame ashí nuṉkanmaya̱n asutniua nuka núnaka ¿chicharkashtatuak?
Núnisaṉ aentsun nekaatniun jintiniuka núnaka ¿nekaashtatuak?
11 Uunt Yus shuara enentái̱n nékawai.
Warí nuka peṉké ántar áiniawai.
12 94:12-13 Wáitsatin tsawantin katsuntrarmi tusa Uunt Yus aneana nuna asutiawai.
Tura akupkámu chichaman jintintiawai.
Túramu asa yamái itiurchat pujuiniaksha warasarti.
Antsu Yusan enentáimtichu ainia nuka wáitsatin tsawantin imia niṉki itiurchatnum sumamawartatui.
14 Warí, Uunt Yuska ni shuari̱n ajapa iniaisashtatui.
Kame niniu ásarmatai níṉkikia ikiukchartatui.
15 Kame yamái péṉker sumamtikiatin atsana nu ukunmaṉka métek sumamtikiatin átatui.
Nui̱ṉkia péṉker enentáimin ainia nusha nui̱ pachinkiartatui.
16 Maa, yajauchi túrin ainia nuya̱sha
¿yaki winiasha ayamprutkat?
17 Kame Uunt Yus yáinkiachuitkiuiṉkia wikia yaunchu jáka̱a̱jai.
18 Tura wi Ámin kajinmátkimnia ajakuisha
Uunt Yusa Ámeka waitnenkartin asam yáiṉkiamame.
19 Nuyá̱ ti enentáimsan pujakuisha
Ame atsaṉtakum shiir enentáimtikrusam waramtikrimiame.
20 Uunt akupin yajauch ainia nu Ámiji̱a̱i̱ métek akupkartatuak.
Warí nisha yajauchin túruiniak akupkámu umiktin chicham umíaji tuíniawai.
21 Túrawar péṉker enentáimin ainia nuna
tunamkachunak irunturar maatai tusar chichaman najatainiawai.
22 Antsu winia Uunt Yúsruka kátsuram uunt kayanam ú̱mkatniua núnis ejateawai.
Tuma asamtai Níniak enentáimtakun uwempraitjiai.
23 Tura yajauch shuar ainia núnaka
ni tunaari̱ni̱ṉ ii Uunt Yusri̱ sumamtikiawar amukártatui.