Isayas

Yusan tuke enentáimtus kantamma

26 26:​1-3 Nu tsawantinkia Jutá nuṉke̱n ju̱ kanta kantamátui. Ii pépruri̱ṉkia wenuimiu takakji tiártatui. Uwempratniunka tanishmarma nútikia Yus ikiusuiti. Waiti uraitiarum uunt nuṉka mátsatkamu péṉker túrin ainia nu waya̱ttawai. Ámeka aṉkantnum tí peṉker wainkiattame. Kame ni enentáimmiaka Ámin tuke enentáimturma asa imiá shiir aṉkant pujuwiti.

4 26:​4-6 Tuke pujú Kaya asamtai Uunt Yus tuke enentáimtustarum. Warí Níchuk uunt pépruncha emesak aya núṉkak awajsaiti. Wáitkiatai ainia nu tura atsumainia nusha nawe̱ja̱i̱ wajatkartatui.

7 26:​7-15 Péṉkeran túrinia nuna jinti̱nkia nákaiti. Ame naka enentáimin asam péṉkera túrinia nuna jinti̱ní̱ wetá. Maa Uunt Yusru, iikia Ámin nákasmaji. Nekasa nuja̱i̱ métek nuṉka sumamtikniumin nuṉká matsatna nu aents nekasa nuja̱i̱ métek túratniun nekaawartatui. Tura Yusan enentáimtichu ainia nuka nekasa nuja̱i̱ métek túratniun nékainiatsui núnisaṉ Uunt Yusa tsáapnintri̱n waintsui núnisaṉ naka wekain ainia nú nuṉkanmasha yajauchin túruiniawai. Ame kakarmarmincha wainiainiatsui. Ame asutiam emeskaruitme. Túram ti shiir ajasuitme. Tura ashí tesarnáiyamua ímianai iwiaṉkáruitme.

16 26:​16-18 Maa Uunt Yusru Ame asutkiaram aju̱ntrarmamna nuiṉkia Ámin útkamaikia seatmarmai. Ame íimmianum nuwa̱ ajamtinia núnis najaimiainiak untsumiármai uchi takustaj tusar najaimiatai takakuji túrasha úchikia nase takúa núnikmaji. Ii aṉkant ajastinkia peṉké wainkiachuitji núnisaṉ nú aentska atak akiiniatniun tujintkiarmai.

19 26:​19-21 Áminiu jákaru ainia nuka ataksha iwiaaku ajasártatui. Maa nuṉká matsatrumna nútirmeka shintiarum kantamátarum. Maa Wí shuar árumna nútirmeka Ame pujutái̱rmin waya̱ta. Winia kajetair naṉkaamam ú̱mkatarum. Yajauchiri̱n asutiáwartaj tusa pujutái̱ri̱ya̱ Uunt Yus jiiniui. Núṉkaka maamu ainia nuna numpe̱n tura aya̱shi̱ncha peṉké ú̱kchattawai.