Jiripiusnum
Krístuja̱i̱ tsaniṉkia wekáa asar warastin
4 Nu asamtai aneamu yatsuru, ii Uuntri̱ Krístuja̱i̱ tsaniṉkiu asarum kakaram ajastarum. Maa, ti aneakun atumín enentáimtakun ti waraajai tura iistajrum tusan wakerajrume. Tawasap achikiar shiir enentáimsatniua núnisnak shiir enentáimtajrume.
2 Ewautiancha tura Séntikincha ii Uuntri̱ Kristu shuari̱ ásar mái̱ metek enentáimsarat tusan seajai. 3 Amincha winia ai̱rú, nu nuwa̱ yaiṉkta tusan seajme. Nisha wi iwiaaku chichaman étsereakui wiji̱a̱i̱ métek takasarmai. Tura Krimintisha tura chikitcha wiji̱a̱i̱ métek takasarmai. Nuna náari̱n iwiaaku átinnium Yus áatraiti.
4 Nu asamtai Uunt Jesusja̱i̱ tsaniṉkia pujá asarum tuke warastarum. Ataksha warastarum tájarme. 5 Uunt Jesus tátin ishichik ajasái. Tuma asamtai tsaṉka enentái takakrum nu paant nekanati.
6 Itiurchat enentáimsatin atumji̱a̱i̱ peṉké atsutí. Antsu tuke Yus áujkum ashí itiurchatrum ujakta. Atsumamuram Yus seatá. Túram Yus yumiṉsata. 7 Nuiṉkia atumí enentái̱ aṉkant átinian, aentstikia peṉké nekaachminia nuna Yus amastatui. Yus atumín aṉkant awajtámsa asa atumí enentái̱n tura atumí enentáimsamuri̱ncha yajauch waya̱wa̱i̱ṉ tusa shiir waitmaktatrume Jesukrístuja̱i̱ tsaniṉkiu asakrumin.
Ashí péṉker ana nu enentáimsatarum
8 Yatsuru, jú̱chiniak yamaikia Yus shuarti enentáimsatniun chichastatjai. Ashí nekas ana nu enentáimsatarum. Tura ashí anturkamnia ana nusha tura naka chicham ana nusha enentáimsatarum. Tura yajauch chichamsha enentáimsairap. Tura antsu ashí shiir ana nusha, chíkich shuarnasha péṉker enentáimtusminia nusha, kame ashí péṉker ana nu enentáimsatarum. Nuya̱sha chíkich shiir anturkamnia ana nusha enentáimsatarum.
9 Wi unuiniarmajrumna nu umiktarum. Tura wi túramur íisurmena nu tura antukurmena nusha umiktarum. Túrakrumni̱ṉkia Yuska aṉkant átinian amastaj tusa pujurtamsattarme.
Yus shuar Páprun kuítian akuptúkarmu
10 Ii Uuntri̱ Kristu anea asarum winiasha ataksha enentáimturu asakrumin ti waraajai. Kame kajinmátrukmiarme tátsujai antsu kuítrum atsakui yáintkiatin tujintkiamarme. 11 Tura kuítian atsumakun tátsujai. Antsu wi takakjana núja̱i̱ṉ warastinian unuimiáruitjiai. 12 Kuítrinchati pujustinia nuna nékajai tura tí nukap takustinia nunasha nékajai. Tsukamaknasha ejemarnasha itiarar takustinniasha tura peṉké takutsuk pujustinniasha unuimiáruitjiai. 13 Kristu ni kakarmari̱n surakui ashí túramniaitjiai. 14 Tuma ai̱ṉ atumsha wi atsumamu akuptúrkarum tí peṉker túramarme.
15 Jiripiusnumia̱ shuartiram, ju̱ tí peṉker nékarme. Masetúnianam Yus Chichaman etserumtai aya atumek kuit akuptúrkamiarme. Wi etserkamuja̱i̱ atumí wakaní̱n yaiṉma asamtai yumiṉsarum akuptúrkamiarme. 16 Atumek wi Tisarúnikianam atsumakun pujai̱sha kuit akuptúrkamiarme. 17 Aya kuit akuptúrkakrumin tu enentáimtsujai. Antsu nu kuit Yusai̱ kawentramkaku tusan wakerajrume. 18 Epaprutítiuja̱i̱ akuptúrkamarum núja̱i̱sha atsumamaj nuna naṉkaamas tiáruncha wainkiajai. Akuptúrkamarum nusha ti kuṉkuin Yus susamua áinis ti shiir auyi. 19 Winia Yúsrusha tí peṉkeran núkap takakui. Atumsha Jesukrístunu ajasu asarum Yus seamniaitrume. Tura Yuska ti takakna nuja̱i̱ ashí atsumarmena nuna suramsattarme. 20 Ii Aparí̱ Yus tuke shiir atí. Nuke atí.
Amikmamu
21 Winia náarui̱sha tura Jesukrístu náari̱ncha ashí Yus shuar ainia nu chícham ujatruktarum. Nisha shiir pujusárti. Wi írutramusha núnisaṉ shiir pujusárti tusa akuptúrmainiawai. 22 Tura ashí akupin Sésarai̱ pujuinia nuyá̱ Yusna ajasáruka tura chíkich Yus shuarsha shiir pujusárti tusa chichaman akuptúrmainiawai.
23 Ii Uuntri̱ Jesukrístu atumniasha ti shiir yaintmakarti. Nuke atí.