Rúkas

Yus áujsatniun Jesus unuiniamu

(Mat. 6:9-15; 7:7-11)

11 Chíkich tsawantai̱ Jesus pujumia nui̱ Yusan áujsua amikmatai ni unuiniamuri̱ chikichik Nin chicharuk “Uuntá, imiakratin Juaṉ ni unuiniamuri̱n unuiniamia núnismek Yus áujsatin unuikiarturta.” 2 Tutai Jesus chichaak “Yus áujkuram jú̱nisrum titiarum,

5 11:​5-6 Nuyá̱ Jesus ju̱na chichaak “Wats, ju̱ titiái. Kashi ajapéṉ amikrum werishtameash. Tura ‘Winia amikiur yajaya̱ winia je̱a̱rui̱ yama tayi. Tura ajamsatniun peṉké takaktsujai. Tuma asamtai amikru, menaintiú apatuk ajamprusta’ tíchatameash. 7 Tura ni init pujusaṉ chichaak ‘Warí wáitisha epenmiaiti tura winia uchirsha wiji̱a̱i̱ ashí tepenawai. Itiur nantakniak amastaj. Itit awajtipia’ turamchanpiash. 8 Wats, paant tájarme, nisha amikrum asa nantaki̱ ikiatmastinian nakitiayat itit awajtiṉ tusa nantaki̱ ashí wakeramna nuna suramsattawai. 9 Tuma asamtai tájarme Yus seatarum túrakrumin suramsattarme. E̱a̱krumka wainkiattarme. ‘Winiajai’ tákurmin awa̱intiámattarme. 10 Seana núnaka suíniatsuk. E̱a̱na nuka wáintsuk. ‘Winiajai’ tuinia núnaka awa̱iniatsuk.

11 Wats átum uchirtintiram ame uchiram apatkun seatmakui ¿kayash súsaintiam? Namakan seatmakui ¿napíash súsaintiam? 12 Nujintian seatmakui ¿titiṉkik súsaintiam? 13 Warí átum imiá yajauchitirmesha atumí uchirí̱ péṉkera nu súchakaitrum. Atumí Aparí̱ nayaimpiniam pujana nu seakrumni̱ṉkia nú naṉkaamas ni Wakaní̱n suramsattawai.” Tu unuiniamiayi.

Jesusan “iwianchi kakarmari̱ji̱a̱i̱ túrawai” tiarma

(Mat. 12:22-30; Mar. 3:19-27)

14 Shuar iwianchruku asa chichachu ámiayi. Nuna enentái̱ya̱n nu iwianchin Jesus ji̱i̱ki̱ akupkámiayi. Íwianch jiinkimtai chichachu chichakmiayi. Túramtai shuar nui̱ pujuarmia nu ti enentáimprarmiayi. 15 Túramtai chíkichkia chicharainiak “Ju̱ka iwianchi uuntri̱ Satanásan ni chíkich naari̱ Pirsepú umirin asa nuna kakarmari̱ji̱a̱i̱ iwianchin ji̱i̱ki̱ akupeawai” tiármiayi. 16 Tura chíkichkia nekas Yusai̱ya̱ tawashit tusar “Nayaimpinmaya̱ kakaram ana nu iniakmakum aents tujintiamu túrata” Jesusan tiármiayi. 17 Tura Jesus tu enentáimiainian nekáa chichaak “Nú nuṉkanmaya̱ṉ shuar nuamtak kajernaiyakuiṉkia nú nuṉka wárik meserchattawak, nuamtak shuarsha ni shuari̱ji̱a̱i̱ kajernaiyaksha amunaikchartatuak. 18 Wíniaka ‘Pirsepú iwianchi kakarmari̱ji̱a̱i̱ iwianchin ji̱i̱ki̱ akupeawai’ túruttsurmek. Núnisaitkiuiṉkia iwianchi uuntri̱ Satanás náartin ni suntari̱ji̱a̱i̱ kajernaiyaksha ¿itiur tuke kakaram átin^ki? 19 Tura Wi Pirsepú kakarmari̱ji̱a̱i̱ iwianchin ji̱i̱ki̱ akupeakuiṉkia atumí shuari̱sha ¿yana kakarmari̱ji̱a̱i̱ṉ iwianchin ji̱i̱ki̱ akupéna? Nisha ‘iwianchi kakarmari̱ji̱a̱i̱ túrichuitji’ tuíniai̱sha ¿itiura Winiasha ‘iwianchi kakarmari̱ji̱a̱i̱ túraiti’ turutminiaitrum? 20 Wikia Yusa kakarmari̱ji̱a̱i̱ iwianchin jí̱i̱kin akupeajai. Nu nekaarum Yus atumí enentái̱n akupin ajasuana nu nékarme.

21 Kakaram áishmaṉ kíishtumaktajtsa iwiarnar wajas je̱e̱n wainkiui, ni wariri̱ init ana nusha tímiatrusaṉ áiniawai. 22 Antsu niji̱a̱i̱ naṉkaamas kakaram ana nu winiakka nupetkashtatuak. Tura kíishtumaktinian iwiar takakman jurawai. Tura kasamkámun ni amikri̱n suawai. Kakaram áishmaṉ iwianchin nakumeawai. Tura nuja̱i̱ naṉkaamas kakaram áishmaṉ Winia nakumprawai. 23 Iistá. Winia nemartatsna nu winia nemasruiti. Núnisaṉ Winia yáintsuna nuka aya itiurchat nájateawai.

Íwianch ji̱i̱ki̱ akupkámuitiat wáketna nu ujakma

(Mat. 12:43-45)

24 Shuara enentái̱ya̱ íwianch jiinkí̱ ayamprataj tusa yumi peṉké yútatsna nui̱ wéawai. Tura ayampratniun waincha asa ataksha waketkitniun enentáimiui. ‘Wi jiinkimiaj nui̱ṉ waketkitjiai’ tawai. 25 Tura waketki̱ péṉker iwiaramun tura aṉkant aan wainiui. 26 Nuna wainiak, ni ai̱n siati iwianchin niji̱a̱i̱ naṉkaamas yajauchin itiá eṉkemáwartatui. Túrunamtai nu shuar nuiki̱ nuna naṉkaamas yajauch ajastatui” tímiayi Jesus.

Nekas warastin

27 Shuar iruniarmia nui̱ Jesus nuna chicháa pujái̱ nuwa̱ untsumuk “Ame nukun Yus ti yaiṉkiai. Ame nukun aya̱shin init pujuschamkam tura ámin amuntstamachmaka” 28 tutai Jesus chichaak “Antsu Yusa Chichame̱n antukar umirainia nuna nukurja̱i̱ naṉkaamas Yus ti yaiṉkiaru áiniawai” tímiayi.

29 Shuar untsurí Nin káunkarmatai Jesus chicharainiak “Yamaiya̱ shuarka yajauch áiniawai. Yajauch ásar chichartuiniak ‘Nekas Yusai̱ya̱itkiumka aents tujintiamua nu túram Yusa kakarmari̱ iniakmasta’ turutainiawai. Túrasha áyatik yaunchu Junas túrunamuja̱i̱ iniakmasmia núja̱i̱ṉ nekaatin áiniawai. 30 Kame Junas túrunamuja̱i̱ Níniwinmaya̱ aentsun yaunchu Yus ni kakarmari̱n iniakmasmia núnisaṉ yamaisha Aents Ajasu tutainjiana nu Wi túrunamuja̱i̱ Yuska ni kakarmari̱n iniakturmastatrume. 31 Yaunchu Saramúṉ úunt akupin pujái̱ Sawaanmaya̱ nuwa̱ akupin Saramúṉka chichame̱n nekaataj tusa ti jeashtanmaya̱ támiayi. Tura yamaikia Saramúṉja̱i̱ naṉkaamas pujái̱ átumka anturtatsrume. Tuma asamtai Wi tájarme, Yus ashí shuaran nekapsattana nu tsawant jeamtai nu nuwa̱ akupniun péṉker anturka asamtai Yus íimmianum péṉker átatui. Antsu atumsha Winia anturtukcha asakrumin Yus íimmianum yajauch átatrume. 32 Tura Yúsnan etserin Junas Níniwinmaya̱ aentsnum Yus Chichaman etserkamtai nu shuar ni yajauch túrutairi̱n enentáimtusar enentái̱n yapaji̱áwarmiayi. Tura ju̱i̱ yamái Junasja̱i̱ naṉkaamas etserin pujajai. ¡Tuma asamtai nekapsatin tsawant jeamtai Níniwinmaya̱ aents yamaiya̱ aents árumna nuna sumamtikramattarme!

Aya̱shi tsáapnintri̱

(Mat. 5:15; 6:22-23)

33 ¿Shirikip ekemákar ú̱ktinkiait? Pitiaknumsha eṉkeashtiniaiti. Antsu shuar je̱á̱ waya̱na nu paant iimsat tusar yakí̱ ekentsatniuiti. 34 Ame jí̱miji̱a̱i̱ wainkiam nuja̱i̱ wekasatin nekaattame. Tuma asamtai ame jí̱miji̱a̱i̱ péṉker ana nu wáinkiumka péṉker wekasattame antsu ame jí̱miji̱a̱i̱ yajauch ana nu wáinkiumka kiritniunam wekasatniua núnisaṉ yajauchiniam wekasattame. 35 Anearta. Enentáimin tsáapin ana nu kiritin ajaschati tusam anearam wekasata. 36 Ame aya̱shmíin kirit ajatsuk aya tsáapniniaitkiuiṉkia shirikip paant awajea núnisaṉ ashí paant wainkiattame” tímiayi.

Pariséun tura jintinniusha Jesus chicharkarma

(Mat. 23:1-36; Mar. 12:38-40; Ruk. 20:45-47)

37 Jesus chichasua umikmatai Pariséu shuar winia je̱a̱rui̱ yurumáitia tusa ipiaamiayi. Tutai Jesus we wayá̱ yurumtainian pujusmiayi. 38 Tura Israer shuarka ikijmiatain ikijmiatsuk pujusmatai Pariséusha nuna wainiak “maa ¿urukamtaik aiṉkia?” tu enentáimsamiayi.

39 Tura Uunt Jesus chichaak “Pariséutirmeka atumí yurumtairi̱ aya pátatek nijiaktin ti wakeriniaitrume. Atumsha nu yurumtaiji̱a̱i̱ méteketrume. Pátatek péṉker túrarme. Tura atumí enentái̱nkia kasamkatniusha tura yajauchia nusha piákuiti. 40 ¡Enentáimcha! Warí, ashí pátatek wáiniajⁱ nuna Yus najanachmakia, tura init paantcha ana nunasha Yusak najanachmakia. 41 11:​41-42 Aneartarum, Pariséutirmesha. Aya nuka méntasha, anissha tura aya apatkusha Yus súsatin ti enentáimprume. Nukasha tsuriasrum apatkusha tias ana nuyá̱ chikichik achikrum Yúsnaiti tátsurmek. Tura antsu nu túratin iniaitsuk péṉker wekasatniusha, Yus anenmarmena nusha péṉker enentáimsatniuitrume. Wats init, enentáimin ana nútiksarmek jusam súsarta. Nuiṉkia ashí chamir átatui. 43 Tura aneartarum Pariséutirmesha. Yus Aujtai̱ Je̱e̱n peṉkeri̱ pujutai̱nium eem pujustin wakerarme. Tura jintiá aents iimiainiamunam ti shiir áujtusarat tusarum wakerarme. 44 Jintinniutirmesha Pariséutirmesha mái̱ metek aneartarum. ¡Ántar shiir chichamtinia! Iwiarsamu paantcha núniniaitrume. Shuar nu naṉkaamaksha nájamiat nékatsui. Núnisaṉ shuar atumí chichame̱ antukar yajauchia nuna nekartamtsurme” tímiayi. 45 Nuikia Israer shuara jintinniuri̱ chikichik Jesusan chicharuk “Uuntá, nu tákum iincha yajauch chichareame” tímiayi. 46 Tutai Jesus chichaak “Atumsha jintinniutiram aneartarum. Atumí akupkámuri̱ji̱a̱i̱ ti kijin entsakchamnia suarme. Tura átumka yáiṉtaj tusarum atumí tsara uweje̱ja̱i̱ṉsha peṉké ántichuitrume.

47 Yaunchu atumí uuntri̱ Yúsnan etserniun máwarmia nu iwiarsamunam átum je̱a̱mniuitrume. Nu aneartarum tájarme. 48 Nu túrakrum atumí uuntri̱ túrawarmia nu ‘yajauchichuiti’ tárume. Warí nisha máwarmiayi tura atumsha máwarai táyatrum niji̱a̱i̱ méteketrume. Warí Yúsnan etserniu iwiarsamuri̱n je̱a̱mkuram atumek sumamarme.

49 Atumí túramuri̱n nekáa Yus ju̱na yaunchu tímiayi ‘Winia etserniurun tura winia akatrámurnasha akuptúkartatjai. Túramtai chikichnaka máwartatui tura chikichnaka pataatukartatui. 50 Tuma asamtai ashí ni etserniuri̱n maamu ainia nuna yamaiya̱ aentstirmin Yus sumamtikramattarme. Nuṉka najanamunmaya̱ jukí̱ 51 yamaiya̱ ímiaja̱i̱ maamu ainia nuna kame Apir mámunmaya̱ jukí̱ yamái Sakarías maamua tímiaja̱i̱ sumamtikramattarme. Taṉku maar Yus sutai̱ ámanum tura Yusa Je̱e̱n ajapén étenkamunam máwarmia nú Sakaríasan tajai. Nu tuma asamtai tájarme ashí ni etserniuri̱ mantamnawarmia nuna yamái matsatrumna nútiram sumamtikiamu átatrume.’*

52 Jintinniutiram aneartarum. Waiti asakatniua núnisrumek nekasa nu nekaatin epenearme. Atumkesha waya̱chiatrum waya̱taj tausha suritiarme” tímiayi. 53 11:​53-54 Jesus nuna takui̱ Pariséusha tura jintinniusha ti kajerkarmiayi. Tura ni tana nuja̱i̱ “yajauch túrame” titiai tusar wakeruiniak untsurí anintriarmiayi.