Rúmanam
Tunaarinchaitme Yus túramkurin shíiraiti
5 Tuma asamtai Kristu nekas enentáimtakrin Yus táman nékaskete tu enentáimtakrin tunaarincha awajsámuitji. Tuma asar ii Uuntri̱ Jesukrístu túramuja̱i̱ aṉkant shiir pujá asar Yus nawamkamu pujaji. 2 Tura Ni shiir enentáimtakur Yusai̱ weankaitji. Tura Kristu jarutramkakrin Yus ti anenmaji. Tura tuke anenma asakrin Niji̱a̱i̱ métek shiir ajastin nákakur waraaji. 3 Nu arantcha yamái itiurchat pujayatrik nu itiurchatja̱i̱ unuimiártatji tusar waraaji. Waitneasari katsuntratniuncha unuitiamji. 4 Tura nu waitneasari unuimiárar ii katsuntramu paant átatui. Tura nuyá̱ Yus ti shiir awajtámsattajnia nuka shiir enentáiji̱a̱i̱ nákastatji. 5 Nu nákamuja̱i̱ ti shiir enentáimsar natsamshim nákamtsuji. Warí, Yuska ni Shiir Wakaní̱n suramsakrin ii enentái̱n pujurtamuk Yusa anenkartutairi̱n ti paant awajtúrmaji.
6 Iikkia peṉké uwemprachmin asakrin tsawant jeamtai Kristu ashí shuara tunaari̱n jarukmiayi. 7 Shuar chíkich shuaran uwemtikratniun ¿jaruktatuak? Péṉker shuar ai̱ṉ jarukchattawai. Kame tí peṉkeraitkiuiṉkia jarukchaintiash. 8 Antsu ii tuke tunáa árini̱ṉ Kristu jarutramkamiaji. Nuja̱i̱ iin ti anenmajnia nuna ti paant iniakturmaji. 9 Tura ni numpe̱ja̱i̱ tunaarincha awajsamu asar imiá nekas Yus asutiámatniua nuyá̱ uwempraitji. 10 Yusa nemasri̱ áyatar Yusa Uchirí̱ jakamuja̱i̱ yamaikia Yusja̱i̱ shiir nawamnaikiar pujaji. Nu arant nui̱kia Kristu tuke iwiaaku asa iiji̱a̱i̱ tsaniṉkiu asa ashí yajauchinmaya̱ uwemtikramar tuke shiir awajtámsattaji. 11 Ii Uuntri̱ Jesukrístu jakamuja̱i̱ Yusja̱i̱ shiir nawamnaikia asar ti waraaji.
Ataṉsha tura Krístusha túrawarma
12 Ayu. Yámankamtaik emka áishmaṉ Ataṉ niṉki yajauchin túramtai nú tunaaja̱i̱ ashí shuar tunaarintin ajasármiayi. Tura ashí tunaarintin ajasár mash jákatin áiniawai. 13 Akupkámu atsakuiṉkia umirkachma nekaachminiaiti. Tuma ai̱ṉ Muisais akupkámu atsai̱sha tuke tunaan túrin ármiayi. 14 Ataṉ pujumia nuyá̱ Muisais tuke akupeatsa̱i̱ṉ shuara tunaarí̱ paantcha ai̱ṉ ashí shuar tunaan túrawar jákarmiayi. Kame ni tunaarí̱ Ataṉna áintsachuyayi. Ataṉka Yus akupkámu paant ujakman umirkachmiayi. Antsu nu shuar Yus akupkámu paant nékainiachiataṉ tunaan túrin áiniak jákarmiayi. Tura Ataṉka Krístuja̱i̱ apatkar enentáimpratai.
15 Ataṉ yajauchin túramia nuja̱i̱ apatka iisam Yus iin tsaṉkatramaji nuka imiá naṉkaamas péṉkeraiti. Kame Ataṉ niṉki tunaan túramuja̱i̱ ashí aents untsurí armia nu jákarmiayi. Tura Yus iin ti anenma asa chikichik áishmaṉja̱i̱ nuna naṉkaamas tí shiiran tsaṉkatramaji. Jesukrístuja̱i̱ṉkia untsurí shuaran uwemtikrar tí shiiran tsaṉkateawai. 16 Ataṉka tunaarí̱ imiá yajauch ai̱ṉ nuna naṉkaamas péṉkeran Yus tsaṉkatramkaitji. Iis, aya chikichik yajauch túramuja̱i̱ aents sumamawarmiayi. Antsu Yus uwempratniun tsaṉkatramaj núja̱i̱ṉkia ti untsurí tunaan asakáruiti tura “tunaarincha awajsámuitme” túramji. 17 Chikichik áishmaṉ tunaan túramuka kakaram asa ashí aents jákartin áiniawai. Tuma ai̱ṉ ti naṉkaamas chikichik áishmaṉ Jesukrístu túramuja̱i̱ aents takaschaitiat Yus “tunaarincha awajsámuitme” taku tura ni aneṉkrattairi̱n nú nukap súakui ni enentái̱n itiaawarua nu aents iwiaaku pujusár kaka̱rartin áiniawai.
18 Ataṉ yajauch túramuja̱i̱ ashí tunaarintin ajasár jákarmiayi. Núnisaṉ Jesukrístu péṉker túramuja̱i̱ ashí shuar Yus “tunaarincha awajsámuitme” timia nuka yamaram iwiaakmaja̱i̱ tuke pujusártatui. 19 Núnisaṉ chikichik áishmaṉ umirkachmaja̱i̱ untsurí tunaarintin ajasármiayi. Tura chikichik áishmaṉ umirkamuja̱i̱ untsurí shuar péṉker awajnásarmiayi.
20 Wats, tunáa ti paant atí tusa Yus ni akupkámuri̱n susamiayi. Túrasha ti tunáa pampaakui Yus nuna naṉkaamas waitnentramak nu tunaan asakátramji. 21 Shuar tunaan túrin ásar jákatin ármiayi. Tura núnisaṉ ii Uuntri̱ Jesukrístu túramuja̱i̱ Yus iin “péṉkeraitrume” túramkurin iisha tuke iwiaaku pujustiniaitji.