Sakarías
Ímiaja̱i̱k menaintiú wainma
2 Nuya̱ṉka paṉkain íimiaj tukamán esaram nekapmatai̱n takakun áishmaṉkan wainkiamjai. 2 Nin chicharkun “¿Tui̱ wéam?” timiajai. Tutai chichartak “Jerusaréṉka nekapmán esantí̱sha nuyá̱ waṉkantí̱sha urutmakit nuna nekaattsan wéajai” turutmiai. 3 Nuya̱ṉka Yusa suntari̱ wiji̱a̱i̱ chichama nu jíiniun Yusa suntari̱ chíkich iṉkiuṉmai. 4 Tura chicharuk “Tsékeṉkim au natsach chicharkum ‘aentsush tura waakasha ti untsurí ásarmatai Jerusaréṉnumka wenuke̱ atsamunam matsamsartatui. 5 Tuma asamtai péprun ji keaja̱i̱ téntakma núnisan wenuke̱nka Wiki átatjai. Tura nui̱ ajapén pujakun ni winchari̱ya̱ núnisaṉ páantin átatjai’ tawai Uunt Yus titiá” turutmiai.
6 “Wi ashí nuṉkanam tsakiṉmakma pujatirmesha pai antuktarum” tawai Uunt Yus. “Túrarum arakaani̱ matsatutirmesha jíintratarum” Uunt Yus tawai. 7 “Maa Seúnnumia̱tirmeka Papirúnianam pujakrumsha Papirúnianmaya̱ṉka jíintrarum pisartarum. 8 Kame Yus ti shiir páantin awajtus uunt nuṉka mátsatka atumín atantramar jú̱nik awajtámsarua nu nuṉká áinian akuptúktatui” Ashí Akupin Uunt Yus tíniuiti. “Kame Israeran anea asan yaaksha atumín yajauch awajtamkurmiṉkia Winiasha núnisaṉ nuna túrutin áiniawai. 9 Wats nekaata, nu nuṉká ainia nuna yamaikia Winia uwejrun takuriartatjai. Nuya̱ṉka ni iniatairi̱ armia nu ni úuntri̱nmaya̱ mash ata̱a̱rartatui. Kame nuja̱i̱ Ashí Akupin Uunt Yus akupkámuitjiana nu nekaattarme. 10 Maa Seúnnumia̱ aentstirmeka ti shiir warasrum kantamátarum. Kame ju̱sha nekaatarum, Wikia yamaikia atumji̱a̱i̱ matsamsattajai” tawai Uunt Yus. 11 “Kame nu túrunamtai uunt nuṉka mátsatkamu untsurí Uunt Yusai̱ pachinkiartatui. Túrunawar Wi shuar ajasártatui. Nuya̱ṉka Wisha atumji̱a̱i̱ matsamsattajai. Nu túrunamtai antsu nuiṉkia Ashí Akupin Uunt Yus atumíin akuptúkua nu nekaattarme” tawai Uunt Yus. 12 “Kame Uunt Yuska ni sunastinia tímiatrus nuṉkanam akantúkma nu Jutanka apujsattawai. Tura Jerusaréṉnaka niniu atí tusa ataksha achiktatui. 13 Kame Uunt Yus íimmianumka ashí aents takamátsarti. Warí tí shiir akantúkma pujutái̱ri̱ya̱ nui̱ Niṉkia wajakniuiti” tímiayi.