1 Samuir

Tawit mesetnum naṉkamantu ajasma

17 Tura Jiristíu aents mesetnum mániatai tusar Suku péprunam iruntrarmiayi. Nu péprusha Jutá nuṉkanmaiti. Nuyá̱ Sukunam Aseka péprunam jeatniunam Ipistamímnum ajapén matsamkarmiayi. 2 Núnisaṉ Saursha Israer shuarja̱i̱ iruntrar Ira pakarí̱n Jiristíu suntari̱ji̱a̱i̱ mániatai tusar iwiarnatkar matsamtúkarmiayi. 3 Nuyá̱ Jiristíu aentssha nu paka náintri̱n nekantrarmiayi. Tura Israer shuarka nu paka naint íṉkiuasmak matsamtúkarmiayi. Tura pákaka ajapén juakmai. 4 Tura Kaat péprunmaya̱ Jiristíu aents Kuriat náartin meseta émtintri̱ tsakatí menaintiú mitru takaku matsamkamunmaya̱ jiinkimiayi. 5 Kame etseṉkrutai̱ yaṉkú jiruja̱i̱ najanamun muuknumka etsenkrakuyayi. Tura entsatái̱ri̱sha yaṉkú jiruja̱i̱ neka núnin najanamun seṉku mir sikru jean entsaruyi. 6 Tura wanusnumia̱ tikishiya̱ tímianai yaṉkú jirunak awekauyayi. Nuyá̱ mesetnum maṉkartutai puya̱ka yaṉkú jiruja̱i̱ najanamun tsukapeakuyayi. 7 Tura naṉkí numiri̱sha ti kampurmauyayi. Nuyá̱ tsakarí̱ṉkia jíruk najanamu asa kijintri̱sha saisiantu sikru jean takakuyayi. Nuyá̱ ni yaintri̱ tantaran takurka émkauyayi. (600 sikru jeá 18 ripra tawai) 8 Nuya̱ṉka Kuriat nui̱ wajas Israer suntaran chicharainiak “Warí ¿urukamtai untsurí suntarja̱i̱ mániktai tusarum winiarum? Wikia Jiristíu áentschakaitiaj. Tura átumka Saura takarniúri̱nchukaitrum. Antsu atumíya̱ chikichik achikrum wiji̱a̱i̱ mánaiktin akuptúrkatarum. 9 Nekas wiji̱a̱i̱ mániak winia nupettukmatainkia atumí takarniúri̱ ártatji. Túrasha niji̱a̱i̱ naṉkaamas jeaknaka tura nin nupetkamtaikia átumka iin takarin ajasrum ii akuptai̱ átatrume” tímiayi. 10 Nu arantcha Jiristíu chichaak “Wats ashí Israer suntartirmin ¿ya kakaram nekapea? ¡Nu wiji̱a̱i̱ yamái nekapnaisai tájarme! Tura chikichik áishmaṉ akuptúrkatarum jímiarchik mániktaj” tímiayi Kuriat. 11 Tura Jiristíu chichamen antukar Saursha tura ashí Israer shuarsha ti ashamainiak kurainiarmiayi.

12 Tawit Piriṉ Épratanmaya̱ shuar Isái náartin Jutá nuṉkanam Piriṉnum pujumia nuna uchirí̱nyayi. Kame Isaikia uchu uchin achíakuyayi. Saur pujumia nu tsawantinkia Isaikia tí uuntchiyayi túrasha mesetnum aentsun akuprámiayi. 13 Isái uchirí̱ menaint armia nu Saur mesetnum wéakui wéarmiayi. Kame mesetnum wéarmia nuna náari̱ṉkia ju̱ ármiayi, Iriapka iwia̱i̱ri̱yayi tura Apiniatáp patai̱yayi nuya̱ṉka Sámauyayi. 14 Tawitkia ékechiyayi. Nuyá̱ menaint armia núnaka Saur akupiármiayi. 15 Tawitkia ni aparí̱ murikrí̱n Piriṉnum matsatun íiruk Saur pujumia nui̱ we waketú ajamiayi. 16 Nu Jiristíu káshik tura ki̱arai̱ taa wémiayi. Tuma túmakua kuaraintia tsawant ejemiayi.

17 Tura Isái ni uchirí̱ Tawitian chicharuk “Waitneasam ame yátsum matsamkamunam pujuinia nu paintitús ritru trikiu unuikma tura tias paṉ wárik jurukiarta. 18 Núnismek mir suntara uuntri̱ ju̱ tias muntsu kanteku juruktia. Túram ame yatsumesh péṉkerash pujuinia inintrúsam chícham nuyá̱ itiata. 19 Saurja̱i̱ ame yatsumsha núnisaṉ ashí Israera suntari̱ṉkia Ira pakarí̱n Jiristíu aentsja̱i̱ mániniak pujuiniawai” tímiayi.

20 Tawit tí kashik nantaki̱ chikichan murik íitrusta tinia ikiuak Isái atakas akupkámia nuna achik wémiayi. Tura matsamkamunam suntarka mesetnum wekar wekar ajainiamunam jeamiayi tura mánaiktai tusar charaatum ajainiamun antimiayi. 21 Israera suntarí̱sha tura Jiristíu suntarí̱sha aya ajasár métek pujurnáisarmiayi. 22 Tawit ni takakmari̱n itiamia núnaka wáinin pujumia nuna susa ikiuak ni yachi̱n amikmátaj tusa suntar matsatmanumaani̱ wémiayi. Tura ni yachi̱n itiur pujuinia nuna anintrúsmiayi. 23 Kame chicháa pujuiniai̱ṉ Jiristíu suntar Káatnumia̱ meseta émtin Kuriat nui̱ pujá jiinkimiayi. Tura chichamia nunak ataksha awaiṉki̱ chichaamun Tawitcha antukmiayi. 24 Israera suntari̱ armia nuka Kuriatan wainiak ashamainiak pisá ármiayi. 25 Israer suntarka chichainiak “¿Jú̱ aishmaṉ jíinkinia nu wainkiarmek? Niṉkia eem wajas Israer shuaran átsaneawai. Yáakesh jú̱ aentsun nupetak mámtaiṉkia úunt akupin tí nukap kuítrintin awajsattawai. Nu arantcha nuakati tusa ni nawantri̱n susattawai tura ni aparí̱ shuari̱ṉsha Israernum kuit akikmatainmaya̱sha aṉkant ártatui” tiármiayi.

26 Tura niji̱a̱i̱ pujuarmia nuna Tawit chicharainiak “Jiristíanmaya̱ aentsun nupetak Israer shuaran yajauch chicharainiana nuna emenkákmataisha nupetmakuncha ¿itiurkartin? Iwiaaku Yusa suntari̱ kakarmaitkiuinkia nekapnaisatai títincha tsupirnakcha Jiristíusha ¿ániusha warimpiait?” tímiayi. 27 Aents pujuarmia nusha nunak awaiṉki̱ chichainiak “Aents nupetka núnaka núnis túratniuiti” tiármiayi.

28 Tawit chíkich áishmaṉja̱i̱ chichaan ni yachí̱ uuntri̱ Iriap anturak Tawitian tí kajerak chicharuk “¿Warí ju̱i̱sha tariniam tura ishichik murik kampuntin atsamunam matsatna nusha ya ikiurkiniam? Wikia ame waantu enentáimtumamurmin tura yajauch enentáimiarmincha nékajai. ¡Aya mesetak íistaj tusamek ju̱i̱ṉkia taum!” tímiayi. 29 Takui̱ Tawit aya̱k “Wisha yamaisha ¿warinia túraj. Warí aya áujmattsujak?” tímiayi. 30 Nuya̱ṉka ni yachi̱ya̱nka kanakí̱ chikichnasha núnisaṉ aniasmiayi. Túrasha aentska émkak tiármiania núnisaṉ ái̱kiarmiayi.

31 Tura Tawit timia nusha antunkamiayi núnisaṉ Sáurnasha ujakármiayi. Túram untsuk itiamiayi. 32 Tura Tawit Sáuran chicharuk “Jiristíu aents tu chichana nuna chikichkisha ashamkashti. Wátskea ame takartámin Jiristíun werí niji̱a̱i̱ mánaiktatui” tímiayi. 33 Nuna takui̱ Saur aya̱k “Ámeka Jiristíuja̱i̱ mániatniuka peṉké jeatsme. Warí ámeka úchitme. Antsu niṉkia úchichik mesetan unuimiátki̱ tsakaruiti” tímiayi. 34 Tutai Tawit Sáuran aya̱k “Kame wisha winia aparu murikrí̱n wáinin asan nui̱ pujái̱ úunt ya̱wa̱ksha núja̱i̱nchuka chai̱ksha murikiun utuá esái júakuinkia 35 úkumur pataatukan awatin tsupían ni wene̱ya̱n murikiun atanniujai. Túram winia esattiajtsa apajá̱trakuisha jaṉke̱nam achikian máimiajai. 36 Nuní̱ túrakun úunt ya̱wa̱ncha tura chai̱ncha maa wémiajai. Ju̱ Jiristíu tsupirnakcha Iwiaaku Yusa suntari̱n peṉké yajauch chicharka asa nisha nuja̱i̱ métek túrunattawai” tímiayi. 37 Nuya̱sha chichaak “Uunt Yus úunt ya̱wa̱numia̱sha tura chái̱niumia̱sha uwemtikrurmia núnisaṉ jú̱ Jiristíunmaya̱sha uwemtikrurtatui” tímiayi. Takui̱ Saursha chicharuk “Wats nuikia wetá. Yus yaintmakti” tímiayi.

Kuriat Tawitian muí̱jiak yajauch chicharma

38 Nuya̱ṉka Saur ni mesetnum entsatáin Tawitian áentsramiayi. Tura muuknumsha yaṉkú jiru etseṉkrutai̱n etseṉkrumtik pushí neka núnin najanamun áentsramiayi. 39 Nuyá̱ Tawitkia Saura puya̱ri̱n emenmama nuna túrichu asa wekas iis Sáuran chicharuk “Ju̱ja̱i̱ iwiarmamcha asan wekasatniun peṉké tujintiajai” tusa ai̱k matsakmiayi. 40 Nuyá̱ ni ushukrutairi̱n jukí̱ seṉku kaya tentechin ashintsanmaya̱n juuk u̱yunchiri̱n chumpía nuapja̱i̱ kaya naṉkimtai najanamun takaku Jiristíuja̱i̱ iṉkiuniattsa werimiayi.

41 Tura núnisaṉ Jiristíusha Tawitian iwiarnatar yaitias winitmiayi. Túmakui̱ ni yáintri̱sha tantaran takurka eem werimiayi. 42 Nuyá̱ Jiristíusha Tawitian ni yapi̱sha tsamapkarin tura péṉker iirka uchich ímianchach enentáimtusmiayi. 43 Tura Jiristíu Tawitian chicharuk “¿Wikia ya̱wa̱kaitiaj numiji̱a̱i̱ winitritnia?” tímiayi. Nuna ti ni yusri̱ ainia nuna pachis Tawitian yajauchiji̱a̱i̱ yumiṉkramiayi. 44 Tura nu arant Jiristíu Tawitian chicharuk “Wats winitiá. Túrasha ame namaṉmiṉkia yukartin ainia nú nanamtinian tura kampunniunmaya̱ yajasma ainia nuna ayurkamawartatjai” tímiayi.

45 Nuna takui̱ Tawitcha Jiristíun chicharuk “Ámeka puya̱ja̱i̱ tura naṉkiji̱a̱i̱ nuyá̱ mesetnum maṉkartutai machitji̱a̱i̱sha ashí iwiarnaram winitrame. Túrasha wikia Ashí Akupin Uunt Yusja̱i̱ tura Israer suntara Yusri̱ ame yajauch chicharmena nuna náari̱ji̱a̱i̱ winitjiame. 46 Túrasha yamaikia Uunt Yus winia uwejruí̱ áminkia íktamsamtai nupetkattajme túran muukmincha tsupirkattajme. Túran Jiristíanmaya̱ suntara aya̱shi̱n yukartin ainia nú nanamtinian tura kampunniunmaya̱ yajasma ainia nuna yamái ayurkamawartatjai. ¡Nuiṉkia ashí nuṉkanmaya̱ aents nekas Israernum Yus pujana nuna nekaawartatui! 47 Tura ju̱i̱ irunar pujuinia ju̱sha Yuska puya̱ja̱i̱ṉkia tura naṉkiji̱a̱i̱ṉkia yáiṉkratcha nuna nekaawartatui. Jú̱ mesetka Úunt Yusnaiti. Yamái ii awakmáktinian Ni yaintmaktatji” tímiayi.

Tawit Kuriatan maamu

48 Nuya̱ṉka Jiristíusha Tawitji̱a̱i̱ mániktajtsa wajaki̱ werimiayi. Túmakui̱ Tawitcha meset juárkitin tesamunam Jiristíuja̱i̱ mániktajtsa wari tsékeṉtki̱ wajattsamiayi. 49 Tura Tawitcha u̱yuntrí̱nian kaya jusa nuapnum kayá eṉkea naṉkimtairi̱ji̱a̱i̱ naṉkía Jiristíun nijia̱i̱nium tukumiayi. Tura kaya nijia̱i̱nium eṉkemtuam Jiristíuka jaka tekem iniar tepesmiayi. 50 Nuní̱ tura Tawitcha puya̱ja̱i̱nchu Jiristíun mámiayi. Kaya naṉkimtain takakuya núja̱i̱ṉ tura chikichík kayaja̱i̱ tukumiayi. Tu tura Tawit Jiristíun nupetkamiayi. 51 Nuna tura Tawitcha tsékeṉtki̱ Jiristíun jearí ní puya̱ri̱niak ukuitiat muuke̱n tsupirak mámiayi. Tura Jiristíu suntarsha mesetan nekas unuimiátrari̱ mantuam nuna wáinkiar sapijmiakar pisarármiayi. 52 Nuya̱i̱k Israernumia̱ tura Jutanmaya̱ shuar, Jiristíu aentsnaka pataatukiar tura charaatum ajatkiar Ikrun pepru pakari̱n wá̱i̱ti̱a̱i̱ri̱ya̱ tímianai ejeniarmiayi. Túrawar Jiristíu aents máwarmaka Saraim jintia juárkimiutak Káatnumsha tura Ikrunka tímianaisha tepet tepet ikiukiarmiayi. 53 Israer shuarka Jiristíun pataatukarmia nuyá̱ taar matsamkamunmaya̱ warirí̱ncha atantrarmiayi. 54 Nuyá̱ Tawit Jiristíu muuke̱n Jerusaréṉnum jukí̱ wémiayi. Tura mesetnum mánaitiairi̱nkia ni je̱e̱n ikiusmiayi.

55 Tawit Jiristíuja̱i̱ mániktaj tusa jiinkimtai Saur wainiak suntara uuntri̱ Ápneran chicharuk “Apnerá ¿au natsasha yana uchirímpiait?” tutai Ápner aya̱k 56 “Úunt akupniu tuke iwiaaku pujuta kame nékatsjai” takui̱ úunt akupin chicharuk “Au natsasha ¿yana uchirí̱nkit? anintrústa” tímiayi. 57 Tura Tawit Jiristíun maa muuke̱n takaku támatai Ápnerka Tawitian jukí̱ Saurai̱ ejemiayi. 58 Saur anintrak “Natsáa ¿yana uchirí̱ntiam?” tutai Tawit aya̱k “Piriṉnumia̱ ame takarniúrmin Isái uchirí̱ntjiai” tímiayi.