Jíinkiarma
Muisais Urepnum kayá awati entsan ji̱i̱kmia
17 Israer shuar kampuntin atsú Sen nuṉkanmaya̱ jíinkiar Uunt Yus timia nútiksaṉ uminiak we wénakua Ripitím nuṉkanam jeawar nui̱ matsamkarmiayi. Túrasha Israer shuar entsa umartiṉkia atsumiayi. 2 Tuma asamtai Israer shuar Muisaisan kajerkar chicharainiak “Entsa umartin amasta” tuíniakui Muisais chicharainiak “¿Urukamtai winiasha jiáttrum tura Uunt Yussha nekapsarmesha iyarum?” tiármiayi. 3 Nuya̱ṉka Israer shuar kitiamainiak Muisaisan yajauch chicharainiak “Ejiptunmaya̱ kampuntin atsú nuṉkanmasha uchirtiuk tura taṉkurtiuk kitiakai kaji̱nkiarat tusamsha ¿urukamtai iincha ikiankartukuitiam?” tiármiayi.
4 Nuna tuíniakui Muisais Uunt Yusan áujuk “Ju̱ shuarnasha ¿itiurkartajak. Warí kayaja̱i̱ tukuratniuk awajtúsarai?” tímiayi. 5 Nuyá̱ Uunt Yus Muisaisan chicharuk “Niru entsa awatmiamna nú wai̱ jukim uuntri̱ ainia nuja̱i̱ Israer shuarai̱ya̱ eem wetá. 6 Tura Urepnum kaya nui̱ Wikia ámiji̱a̱i̱ pujuttajai. Tura nui̱ kaya awatiákmin entsa jiinkimtai ashí Israer shuarsha umarartatui” tímiayi. Núnisaṉ Muisaissha tímiatrusaṉ Israer shuara uuntri̱ iimiainiamunam túramiayi. 7 Tura Muisaissha Israer shuar yajauch chichakaru ásarmatai nu nuṉka náari̱nkia Miripia anaikiamiayi tura núnisaṉ Yusan nekapenak “Cha, Yussha íija̱i̱sha ¿pujawash?” tiaru ásarmatai chíkich náari̱ṉkia Masa anaikiamiayi.
Amarík aents mesetnum nupetkamu
(1 Sam. 15:2-21)
8 Nuyá̱ Amarík aents Ripitím nuṉkanam káunkar Israer shuarja̱i̱ mániawarmiayi. 9 Nuya̱ṉka Muisais Jusuin chicharuk “Áishmaṉ júram Amarík aentsja̱i̱ mániktaj tusam wetá. Tura wikia kashin Yusa wái̱ri̱n jukin naintia pakarí̱n takusan wajastatjai” tímiayi. 10 Muisais timia nuja̱i̱ métek Jusuisha Amarík aentsja̱i̱ mániniai̱ Muisaiska, Araunja̱i̱ tura Urja̱i̱ naintia pakarí̱n wákarmiayi. 11 Tura Muisais wai̱n takúakuiṉkia Israer shuar nupetmarmiayi. Antsu Muisais wai̱n takúachkuiṉkia Amarík aents nupetmarmiayi. 12 Tura Muisais uwejé̱n takuí wajá wajá kuntukmiatai Araun Urja̱i̱ kayan itiariar Muisaisan apujsarmiayi. Tura Araun Urja̱i̱ kánasaṉ Muisaisa uwejé̱n kakarat tusa etsa̱ akaman achirsarmiayi. 13 Nuní̱ túruiniakui Jusuí Amaríkian tura ni aentsnasha puya̱ja̱i̱ mánikiar nupetkarmiayi. 14 Uunt Yus Muisaisan chicharuk “Tuke enentáimtutai̱ atí tusam yamái túrunania nu, papinium aartá. Tura Jusuí paant chicharkum ‘Amarík aentsnaka peṉké enentáimtuntsacharat tusan ju̱ nuṉkanmaya̱ṉka ashí amukártatjai titiá’ tímiayi.” 15 Nuyá̱ Muisais kayan irur taṉkú maa áestutai̱ najanamiayi. Tura ni náari̱n “Uunt Yuska wiji̱a̱i̱ pujana núiti”* tu anaikiamiayi. 16 Tura chichaak “Uunt Yusja̱i̱ kajernaikia asa Amaríkkia tiraṉki̱ji̱a̱i̱ nuyá̱ tiraṉki̱ji̱a̱i̱sha Uunt Yuska tuke mánin átatui” tímiayi.