Awakúk
2 Tuma asamtai winia itiurchatrun ujakajna nuna waritiak ái̱rkat tura warí turuttiṉ tusan jintiá wáinin awajsamu wajana tímiatrusan antú antut ajasan yamaikia wisha nákastatjai.
Awakúkan Uunt Yus ai̱kma
2 Nuya̱ṉka Uunt Yus winia chichartak “Ame ímiaja̱i̱k wáinmena nuka paant aartá. Ju̱na áujuka nekaawar tsékeṉki̱ chikichnasha ujakárat tusam túrata. 3 Tura ame ímiaja̱i̱k wainkiamna nu wárik uminchakuisha nákasta. Umintsukka áchattawai antsu wárik uminkiatniuiti. 4 Ju̱sha nekaata, aents péṉkerchaka niṉki naṉkamantu enentáimtumawai.* Antsu péṉkera túrinkia Yusan nekas péṉker enentáimta asa iwiaaku pujustatui.* 5 Kame aents anaṉmaa kuítrintin ajaksha naṉkamantu enentáimtumakka émkashtatui. Tuma asa jákaru matsamtai̱ Seur jakaan nútsuawak núnis áiniawai. Warí nuṉkancha tura aentsnasha ashí niṉki irutmawai. 6 Túrasha métektaku chichamja̱i̱ chicharsar ashí aents wishikrachartatuak. Tura chicharainiak ‘Níniuchun irumniua ¿ausha urukatiṉ? Tura akirkákmin awaṉtukmijiam tusa yaruak irumeana auncha áitkiatniuncha ¿urutáiṉ iniaisat?’ tiártatui.
7 Túrasha átum atantrámuka tura atumí itiurchat awajtámkartincha aya aneachma ¿wajatramprachartatuak? Túrunawarmataiṉkia átumka ashí atantrámu ¿áchattarmek? 8 Kame untsurí nuṉkanmaya̱ aents niniu atantáiniakrum aentssha ti kajeṉkrum numpa ti ukaru tura péprunmasha núnisaṉ aents nui̱ matsatainiasha ti itiurchat awajka asakrumin untsurí péprunmaya̱ aents atumniasha nútiksaraṉ atantramprattarme.
9 Itiurchatnumia̱ uwempratai tusar níniunka ú̱kar chikichniaja̱i̱ kuítrintin ajastinian wakeruinia nuka aneararti. 10 Tura ame enentáimik umirkam amé shuarka natsanmai̱ awajkaruitme. Núnisaṉ untsurí pepru emeskaru asam amek mui̱jmiai̱ awajmámsaitme. 11 Nu tura asakmin aentsua núnis wenuknumia̱ kaya untsumkui je̱a̱ya̱ numi aentsua núnis ái̱ktatui.
12 Tura aentsun kajeṉkar pépruncha núnisaṉ itiurchat awajkámuja̱i̱ je̱a̱n je̱a̱mainia nusha aneararti. 13 Kame aents takakmasarua nuka ji áeskatniun takasáru ásarmatai péprusha ántar wáitsaruiti. Warí ju̱ka Ashí Akupin Uunt Yuschakait. 14 Antsu Uunt Yusa winchari̱ṉkia entsa nayantsanam pímiana núnis ashí nuṉkanam nekanattawai.
15 Núnisaṉ aents ni amikri̱n anampak misú íistaj tusa umutai̱ ti karía kakarma nuna aakka anearti. 16 Maa, arantutaitiatam peṉké wishiktai̱ya̱ núnikiume tuma asam yamaikia amesha nuke umaram amesha núnismek túrunata. Tura umutai̱ Uunt Yusa untsuuri̱n ana nu ámin kajertamkattawai tura páantniuitiatam peṉké natsanmai̱ wishiktai̱ ajastatme. 17 Kame Ríwianu emeskarum yajauch awajka asarum atumsha núnisrumek túrunattarme. Tura aents kajeṉkrum numpa ti ukarum nuṉkasha nuyá̱ péprusha ántsarmek aents nui̱ matsatainiasha emeskarum itiurchat awajka asakrumin yajasma yukartin áiniana nu atumniasha itiurchat awajtamtiatrume.
18 Kame aents nakumak najankarua nusha ¿warinma péṉkerait? Tura jiru imintrar nakumkar najankamu ainia nusha ¿warinma péṉker ainia? Warí aya anaṉkartuatniunak jintiniawai núnisaṉ nakumak chichachun najankayatcha ¿urukamtai timiá péṉkersha enentáimta? 19 Tura numin chicharainiak ‘¡Shintiarta!’ tura kayancha chichachunak ‘¡Wajaktia!’ tuinia nusha aneararti. ¿Warí unuikiarturtinian jeainiawak? Atsá, áyatik kuriji̱a̱i̱ tura kuít jiruja̱i̱ eṉkekma áiniawai tuma ásar iwiaaku wakaní̱n takakenatsui. 20 Antsu Uunt Yuska Ni Tunaarincha Uunt Je̱e̱n pujá asamtai ashí nuṉkanmaya̱ shuarsha tákamtak pujusárti” tímiayi.