Túramuri̱

Pítiur túrunamun ujakma

11 Israer shuarchasha Yusa Chichame̱n umirkarai táman Jesusa akatrámuri̱sha tura Jutanmaya̱ Yus shuarsha antukarmiayi. 2 Túmainiak Pítiur Jerusaréṉnum jeamtai Israer shuar Yus shuar armia nu chichainiak 3 “¿Urukamtia Israer shuar áiniachusha iyumam? ¿Tura auja̱i̱ tsaniṉkiam urukamtai yurumámum?” tiármiayi.

4 Tutai Pítiur ashí yámankamtaikniumia̱ túrunamun ujakmiayi. 5 Chichaak “Wikia Júpiniam pujumjai. Tura nui̱ Yusan auju pujusan íimiarmajai. Tura waṉkaram tarachia ánin kuatru tsakari̱n jiṉkiakma nayaimpinmaya̱ táarun wainkiamjai. Tura wi pujamunam jeartimiai. 6 Tura nui̱ iyaj tukamán init yajasman, napincha, nanamtinniasha eṉketáinian wainkiamjai. 7 Tura ‘Pitrú nantakím maam yuátá’ túrutun chichaman antukmajai. 8 Túrutkui ‘Atsá Uuntá, ánin wapiknaka Israer shuar yúatin surimkiamua núnaka tuke yúchaitjiai’ tímiajai. 9 Atak nuyá̱ túrutuk ‘Wi, péṉkeraiti tájana nu, ámeka yajauchiti tiip’ turutmiai. 10 Nunasha menaintiú túrunan wainkiamjai. Túruna nayaimpiniam mash waketkimiai. 11 Nui̱ túruna pujái̱ menaintiú áishmaṉ Sesarianmaya̱ akupkámu winia e̱a̱tainiak wi pujamunam tarutiarmai. 12 Tura nui̱ Yusa Wakaní̱ chichartak ‘Arantutsuk auja̱i̱ wetá’ túrutkui wémajai. Tura ju̱ sais Yus shuarja̱i̱ wi wémajai. Túrunar ashiṉkiar Kurniriu je̱e̱n waya̱mji. 13 Nisha chichaak ‘Je̱a̱rui̱ Yusa suntari̱ wajan wainkiamjai. Tura nisha chichartak “Júpiniam Semuṉ Pítiur tatí tusam áishmaṉ akatrám akupkata. 14 Pítrusha taa itiura amesha tura áminiurmesha tunaaruminia̱ uwemprattam nuna turamtatui.” Yusa suntari̱ nuní̱ turutmiayi.’

15 Wi chichastasan juarai̱ yámankamtaik iin tarutrámpramiaj nútiksaṉ Yusa Wakaní̱ tarurarmiayi. 16 Nuiṉkia Uunt Jesus timian enentáimpramjai. Nisha tíchamka ‘Juaṉ entsaja̱i̱ṉ imiakratmiayi. Tura antsu Yusa Wakaní̱nkia imiantinia áintsaṉ atumí enentái̱n eṉkemprutmattarme.’ Nu timian enentáimpramjai. 17 Atumsha enentáimpratarum. Uunt Jesukrístun enentáimtusmiaj nui̱ iincha Yuska ni Wakaní̱n suramsamiaji. Tura iin suramsamiaj núnisaṉ Yus nincha ni Wakaní̱n súsarmiayi. Nuna tura asamtai wikia túrashtiniaiti Yusan títinkiaitiaj” tímiayi Pítiur.

18 Tura Pítiur táman antukar mitia wáinkiar “Nekasaiti Israer shuarchancha ni enentái̱n yapaji̱áwarmatai tuke iwiaaku átinian Yuska nin súsaruiti” tiármiayi. Tusar Yusa náari̱n ti shiir awajsarmiayi.

Yus shuar Antiukíanam wearma

19 Estepaṉkan máwarmia nui̱ chíkich Yus shuarnasha maatai tusar pataatiarmiayi. Túram chíkichkia pisarar Pinisia nuṉkanam Chipri nuṉkanmasha tura Antiukía péprunmasha wéarmiayi. Tura nui̱ jeawar Yus Chichaman chikichnaka ujatsuk aya Israer shuarnak ujakármiayi. 20 Tura niji̱a̱i̱ Chíprinmaya̱ pisararmia nu Serininmaya̱sha Yus shuar ármiayi. Nuka Antiukíanam jeawar Israer shuarchan Uunt Jesusa túramuri̱n ujakármiayi. 21 Tura Uunt Jesus ikiaká̱rma ásar nú nuṉkanmaya̱ aents ti untsurí yaunchu túrutairi̱n iniaisar Jesusan enentáimtuiniak Yus shuar ajasármiayi.

22 Tura nu chichaman antukar Jerusaréṉnumia̱ Yus shuar ame iyuta tusar Pirnapín Antiukíanam akupkarmiayi. 23 11:​23-24 Pirnapísha jeá Yus nú shuaran uwemtikrarma nuna wainiak warasmiayi. Pirnapísha péṉker áishmaṉkauyayi. Yusa Wakaní̱sha pimiutkamuyayi. Tura Yusan nekas umirkauyayi. Tuma asamtai nu shuaran mash jintintiáiniak chicharuk “Tuke enentáimji̱a̱i̱ umirkarum Yus nemarsatarum.” Tu chicharak ikiukmiayi. Tura nui̱sha nú arant untsurí aents Yusai̱ kaweṉkarmiayi.

25 Nuna turasua amik Pirnapí Sáurun wáinkiataj tusa Társunam wémiayi. Tura wainiak Antiukíanam jukimiayi. 26 Tura nui̱ jeawar nú péprunmaya̱ Yus shuarja̱i̱ iruntrar chikichík uwí pujusármiayi. Yus Chichaman untsurí shuaran ujaak pujuarmiayi. Tura nui̱ Antiukíanmaṉka Yus shuaran émkaka Kristu shuari̱ tiármiayi. 27 Nuyá̱ Yúsnan etserin Jerusaréṉnumia̱ Antiukíanam táarmiayi. 28 Kame káunkarmia nuyá̱ chikichík etserin ni naari̱ Akapu wajaki̱ Yusa Wakaní̱ nekatairi̱ji̱a̱i̱ chichaak “Ti tsuka ashí nuṉkanam átatui” tímiayi. (Nuka akupin Krautiu pujái̱ túrunamiayi.) 29 Tuma ásar Antiukíanmaya̱ Yus shuarka Jutanmaya̱ Yus shuaran yaiṉtai tusar ni takaku armia nuja̱i̱ métek aṉkant aṉkant súsarmiayi. 30 Nuyá̱ Pirnapíncha tura Sáuruncha nú kuitniasha susar Jutanmaya̱ Yus shuara úuntri̱n akuptúkarmiayi.