Apukarípsis

Piniṉnumia̱ wáitsatin ukararma

16 Nuyá̱ Imiá Shiir Tesamunmaya̱ ti kakaram chichaamun antukmajai. Nusha siati suntaran tiarmai “Nuṉká werum Yusa kajetáiri̱ siati piniṉnum ana nu ashí ukartarum.” 2 Tutai emka suntar we, piniṉnumia̱n kukar ukarmai. Túramtai ashí aents Entsaya̱ Yajasma náari̱n anujmamprar ni nakumkamuri̱n shiir awajiarma nuna ti najamin kuchap jiintiurarmai.

3 Nuyá̱ chíkich suntar jímiara nu, we Yusa kajetáiri̱n nayantsanam ukarmai. Túramtai nayants jakáa numpe̱ya áinis ajasmai. Tura ashí nui̱ matsatuka nu kaji̱nkiarmai.

4 Nuyá̱ suntar menaintiua nu, entsanam tura púkuninmasha ukarmai. Túramtai ashí numpa ajasármai. 5 Nuyá̱ suntar entsá wáinniua nuna chichame̱n antukmajai.

“Uuntá, amek tí peṉker Yus asam jú̱tikiame. Yáunchusha tuke pujúu asam tí shiiraitme. 6 Iis, nu shuar amé shuarumincha tura ame chichammin etserniuncha máwar ni numpe̱n ukatraru ásarmatai Amesha núnismek numpa áarume. Maa, páchitsuk áitkianatin áiniawai.”

7 Tutai Yus áestutai̱nmaya̱ chichaman antukmajai.

“Ee, Uuntá. Nekas kakaram asam ashí ti tujinchaitme. Nekas túratniua nu tí peṉker túrin asam nu shuar túramuja̱i̱ métek akiruitme” timiai.

8 Nuyá̱ suntar kuatrua nu, tsawái̱ nantunam ukarmai. Túramtai jiji̱a̱i̱ aentsun esaamuja̱i̱ wáitkiastin kakaram sunasmai. 9 Tura aents ti sukuam wáitiarmia nu, nu wáitkiastinian nérenniun Yusan yajauch chicharkarmai.Tura ni tunaari̱n enentáimtsuk Nin shiir awajsatniuncha peṉké nakitrarmai.

10 Nuyá̱ suntar seṉkua nu Entsaya̱ Yajasma akupin pujutái̱ri̱n ukarmai. Túramtai ni nuṉke̱e̱n ashí kashi ajasmai. Tura aents ti najaimiainiak iniai̱ncha esamiarmai. 11 Tura núja̱i̱sha yajauch túratniuncha iniaisacharmai. Antsu kuchaprí̱ji̱a̱i̱sha tura ti najaimiainiak wáitiainiak nayaimpinmaya̱ Yusan ti yajauch chicharkarmai.

12 Nuyá̱ suntar saisa nu, Yúpratis entsanam ukarmai. Túramtai ku̱yu̱amai. Nuja̱i̱ etsa̱ tatainmaani̱ya̱ akupin taartí tusa jintiamnamai.

13 Tura nuyá̱ ju̱na wainkiamjai. Ti Kajen Yajasma wene̱ya̱sha, Entsaya̱ Yajasma wene̱ya̱sha tura núnisaṉ peṉké Kukaria̱ Yajasma ántar yúsnan etserniua nuna wene̱ya̱sha puachia núnin yajauch wakan menaint jíiniarmai. 14 Íwianch áiniak aents tujintiamun túruiniak ashí nuṉkanmaya̱ akupniun irurarmai. Ti Tujintkiachu Yusai̱ ni uunt tsawantri̱ jeamtai mesetan najanatai tusar weriarmai. 15 (Yamái Kristu “Aneara pujustarum, tawai. Nékachmanum kasa núnisnak jeattajai. Kánutsuk tuke iwiarnar pujak ni entsatái̱ri̱n péṉker wainia nú shuar ti shiir átatui. Misuchu asa natsa̱a̱rchattawai” tawai.) 16 Tura yajauch wakan úunt akupin áinian Armajetúṉnum irurarmai. Israer chichamnum nu nuṉka tu anaikiamuiti.

17 Nuyá̱ suntar siatia nu nasenam ukarmai. Túramtai nayaimpinmaya̱ Yusa Uunt Je̱e̱nia̱ ti kakaram chicham Yus akupin pujutái̱nmaya̱ chichaak “Mash uminkiai” timiai.

18 Tura nuya̱ṉka peemsha, chárpisha, ipiamtasha ajamai. Tura nuṉkasha ti kakaram ú̱u̱rkamai. Maa, aents jú̱ nuṉkanam yámankamtaik pujuarmia nuyá̱ jú̱nis ú̱u̱rkamuka atsuwiti. 19 Ti uunt péprusha menaint nakantramai. Ashí nuṉkanmaya̱ péprusha sa̱a̱nakiarmai. Nui̱sha Yus ti kajerak Papirúniancha kajinmáttsuk ni kajetáiri̱n yapá umutai̱ya áintsaṉ aarmai. 20 Entsá ajapén atentrasha tura murasha meṉkaramai. 21 Núnisaṉ nayaimpinmaya̱ uunt kaya núnisaṉ micha kákeramai. Ti uunt áiniak kintiarja̱i̱ métek kijin armai. Aentssha nuja̱i̱ ti wáitiainiayataṉ áyatik Yusan yajauch chicharkarmai.