Israernum
6 Uunt ajastai. Krístunu ana nuyá̱ aya yúpichuchia nuke enentáimtutsuk nu arantcha unuimiártai. Kame emka unuimiártinia nu ju̱ áiniawai, shuar ni yajauchiri̱n jákatniunam júana nuna kúntuts ené enentáimiu ajas Yusan shiir enentáimtustincha, 2 imiantinnium nekaatniusha Yus shuar yaiṉmanum uwejé̱ awantsatniusha jakamunmaya̱ nantaktincha tura sumamtikiatin tsawanta nu nekaatniusha. 3 Tura Yus yáintmakrin nuna naṉkaamas nekaattaji.
4 Shuar Yusna nuna nekaaṉka tura Yus susamun takakkuṉka tura Yusa Shiir Wakaní̱ kakarmari̱n nekapsaitkiuṉka 5 tura Yusa Chichame̱ péṉkeri̱n nekaaṉka tura Yusa kakarmari̱ ukunam nuṉka yamarmanum takastatna nuna yamái nekapeakka, 6 nu shuar nuna nakitiak kanakniaka atak ni yajauchiri̱n ené enentáimiá ajasuítiat ikiuktinian nakitiak tujintkiattawai. Warí ní enentái̱ji̱a̱i̱ Yusa Uchirí̱n atak krúsnum matniua nútikiak ashí íimmianum natsanmai̱ awajui. 7 Kame yumi yútakui péṉker nuṉka arakan péṉker tsapamtikiuṉka arakmaun yaya̱wai. Túramtai Yus shiir enentáimiui. 8 Antsu nupá̱ jaṉkí tsapamtikiuṉka nu nuṉka yajauchiti. Yus áesak emesramniaiti.
Yus tsaṉkatramkamuja̱i̱ kakaram ajaji
9 Aneamu yatsuru, tu chicharkursha nú shuarchaitrumna nu nékaji. Antsu uwempra asarum nú peṉker túrattarme. 10 Yus tí peṉker asa átum takasmancha tura ni aneakrum Yus shuar yaiṉmancha kajinmátkishtatui. Tura yamaisha tuke túrarme. 11 Tura nuik túrarmena núnisrumek tuke iniaitsuk kakaram takasrum ashí Yus tsaṉkatramkatta nu wainkiattarme. Núnisaṉ atí tusar wakeraji. 12 Nakimtsuk kakaram ajastarum. Niniua nuna Yus ni shuari̱n susattawai. Tura shuar Yusan enentáimtak shiir enentáiji̱a̱i̱ nákakka nuna wainkiattawai. Tu takastarum tusar wakeraji.
13 6:13-14 Yus yaunchu Aprajámja̱i̱ chichaak “Ti nekas shiir awajsattajme tura tí nukap pampamtikrattajme”* tímiayi. Nuna taku imiá nekas tajai tusa tura chíkich Niji̱a̱i̱ naṉkaamas uunt atsakui imia Niṉki pachimias tumammiayi. 15 Tutai Aprajám yáitmataik nákas Yus timia nuna wainkiamiayi. 16 Shuar “nekas tajai Yus iirui” tákuṉka chíkich niji̱a̱i̱ naṉkaamas úuntan páchiawai. Tura tu chichasmataiṉkia nuya̱ṉka imiá nekas tana nu nekaamniaiti. 17 Tuma asamtai Yuska “ti nekasan yapají̱tsuk túrattajai” tusa imia Niṉki pachimias tumammiayi. Nuja̱i̱ ni tsaṉkatkamun júkiartatna nu shuar Yus ti nekas umiktatna nuna nékainiawai. 18 Yus peṉké waitruachmin asa áyatik ni tamaja̱i̱ nekasaiti. Nuna arant nuikia imia Niṉki pachimias ti ikiakátmaji iin. Nuja̱i̱ iisha uwempratai tusar Niní̱ weamkatikia tsaṉkatramkattajnia nu ti shiir enentáimsar wáinkiatin nákaji. 19 Nu enentáimsar kakaram ajaji. Yusai̱ya̱ iin umuchtiamkamnia peṉké atsawai. Yusai̱ áchitkia asakrin ti kakaram emettamji. 20 Jesussha emka Yusai̱ wayá̱ mash iwiarturmaji. Tura Mirkiseték amia núnisaṉ Nisha yamái tuke amuukashtinian Yúsnan pujurniu uuntri̱ ajasuíti.