Yus Kanta

Warí wait ajá pujakun atsuma pujajai.

 2 Wikia ¿Amiiniak? enentáimtin asamtai wínia wakaniur waitrukta.

Winia Yusruá Ame takartámin Amiiniak nekas enentáimturmawa nu uwemtikrata.

 3 Jiuwáa winia waitnentrurta.

Warí, ashí tsawant Ámin untsúajme.

 4 Ame takartámniu wakaní̱sha waramtiksata.

Warí Uuntá winia enentái̱rnaka Ámin íktusjame.

 5 Warí Uuntá Ámeka péṉkeraitme tura tsaṉkurkartiniaitme.

Ame uunt waitnenkartutairmiji̱a̱i̱ ashí Ámin untsurmainia nuka waitnenniuitme.

 6 Jiuwaá wi seajmena nusha antukta

tura wi chichasan untsumaj nusha anturtukta.

 7 Jakamnia nekapeamunmaya̱ tsawantin Ame ai̱rkai tusan untsuktatjame

tura Ámeka ai̱rkattame.

 8 Uuntá ántar yus ainia nusha Ámiji̱a̱i̱ métekka peṉké atsawai.

Núnisaṉ Ame najantkamurmiji̱a̱i̱ métekka peṉké atsawai.

 9 Ashí uunt nuṉka mátsatkamu Ame najantkamamna nu Ame pujamunam taar tikishmátramprartatui.

Túrawar Ame náarmincha páantin shiir awajsártatui.

10 Warí Ámeka tí uuntaitme tura aents túrachminia nu túriniaitme.

Aya Amek Yúsaitme.

11 Jiuwáa Ame jintim nekaprutáta

túrawakmin Ame jintimín naka wekaasataj.

Amiiniak esetran enentáimtin átaj

túran Ame náarmin arantúkan ashamkataj.

12 Maa winia Jiuwáa Yusru takamtsuk winia enentái̱rja̱i̱ shiir awajsattajme

túran Ame náarminkia tuke naṉkamantu awajsattajai.

13 Warí, Ame waitnentram nuka tí úuntaiti.

Túram winia jaka matsamtai̱niam Seúrnum init pujustinniumia̱ aṉkant awajtúsuitme.

14 Yusá naṉkamantu enentáimtuma ainia nu winia wajatrurarai

tura maṉkartin ainia nuka mantuataj turutainiawai.

Tura nu aents ainia nusha aranturmaktinian nékainiatsui.

15 Túrasha Ámeka Uuntá waitnenkartin péṉker aneaku Yúsaitme.

Núnisaṉ wárik kajechuitme tura waitnenkartutairmeka tura nekasa nu túrutairmesha amuichaiti.

16 Wini̱ni̱ waketkim íirsata túram waitnentrurta.

Ame takarniúram Ame kakarmaram susata

tura uwemtikrurta nuwa̱ Ame takartámniun uchirí̱ntjiai.

17 ¡Ame túramurmiji̱a̱i̱ aneṉkrattairam iniaktursata!

Ame Jiuwá yaintkiam atsaṉtamna nuna wáinkiar muí̱jruinia nu natsa̱a̱rarat.