Ipisiunam
Israer shuarchanum Papru étserma
3 Nu asamtai atumín Israer shuarchatirmin yáiṉtaj tusan wi Papru Jesukrístunu étserkun sepunam pujajai. 2 Yus anentak Yus Chichaman atumín etserkatniun akatar akuptúkuiti. Nu nékatsrumek. 3 Yus nuna túrutak yaunchu nekaachmancha paant awajtúrsamiayi. Núnaka ishichik áatraitjiarme. 4 Nu áujsarum Krístunu yaunchu nekaachman yamaikia paant nékajna nu nekaattarme. 5 Nú chichaman yáunchusha chikichkinkesha ujankachmiayi. Túrasha yamaikia Yusa Wakaní̱ Kristu akatrámuri̱ncha etserniuri̱ncha nu chichaman paant awajtúsarai. 6 Nu chicham ju̱i̱ti. Uwempratin chichaman umirkar Israer shuarcha Israer shuarja̱i̱ métek Krístuja̱i̱ tsaniṉkiaru ásar chikichik shuar ajasártatui. Tura nu arantcha Yus ni shuari̱n ashí shíiran tsaṉkatkatniun anajmatrama nui̱ métek pachinkiartatui. 7 Yus ni kakarmari̱ji̱a̱i̱ winia yáintiuk tura ti anentu asa nu uwempratin chichaman etserkat tusa akattúrmiayi. 8 Ashí Yus shuarja̱i̱ naṉkaamas wi péṉkercha ai̱ṉ Israer shuarchanum shiir chichaman etserkat tusa Yus tsaṉkatrukmiayi. Krístuja̱i̱ṉkia kuitji̱a̱i̱ naṉkaamas péṉker, enentáimtustin jeatsjinia nu, takakji. Nusha ti shiir chichamaiti. 9 Yuska, ashí najana nu, nu enentáimmian yáunchusha etsertsuk yamaikia ashí shuar nu chichaman nekaawarat tusa winia akattúrmiayi. 10 Yamaikia ashí nayaimpiniam pujuinia nuka Yus ni shuari̱i̱n túrunamun iisar Yuska imiá neka asa ashí enentáimniua nuna paant nékainiawai. 11 Yus jú̱nis túratniun yáunchuk enentáimpramiayi. Tura ii Uuntri̱ Jesukrístuja̱i̱ mash uminkiamiayi. 12 Tura Krístuja̱i̱ Yusai̱ yúpichuch jeaji. Tura Nin nekas enentáimtusar sapijmiatsuk Nin tantamniaitji. 13 Tuma asamtai tájarme atumín yáiṉtaj tusan sepunam pujakui kúntuts enentáimprairap. Antsu nuja̱i̱ Yus atumín ti shiir awajtámkurmin átum warasuk tusan wakerajrume.
Kristu ti aneṉkratniuiti
14 Nu asamtai ii Uuntri̱ Jesukrístu Aparí̱n tikishmátran áujtajrume. 15 Ashí nayaimpinmasha tura nuṉkasha Yus shuar ájinia nu nekas ni shuari̱ áiniaji. 16 Yus ti kakaram asa ni Wakaní̱ji̱a̱i̱ atumí enentái̱n pujureak ashí ni kakarmari̱ya̱n atumín suramsarat tusan áujtajrume. 17 Yus nekas enentáimtakrumin Kristu atumí enentái̱n pujusat tusan áujtajrume. Tuke yapají̱tsuk aneṉkratin átarum tusan áujtajrume. 18 Túrakrum ashí Yus shuarja̱i̱ Kristu aneṉkrattairi̱ nekaattarme. Imiá uunt asa naṉkantsuk tuke amuukachminiaiti. 19 Nu aneṉkrattai ashí takamtsuk nekaachmin ai̱ṉ nekaatarum tusan áujtajrume. Nuja̱i̱ Yus takamtsuk pimiutramkattarme.
20 Nekas Yus shiir awajnásti. Ni ti kakaram asa ii seajnia nuna naṉkaamas tura enentáimprachminia nunasha naṉkaamas iin pujurtamuk ashí túramniaiti. 21 Ashí Yus shuarja̱i̱sha tura Krístuja̱i̱sha Yusa péṉkeri̱ tuke paant wantini̱ṉ atí. Yus tuke iniaitsuk shiir awajnásti. Núnisaṉ atí.