Matéu

Emearun Jesus tsuarma

(Mar. 2:1-12; Ruk. 5:17-26)

9 Nuyá̱ Jesus kanunam eṉkemár antumiaṉ amaini̱ katiṉmiayi. Tura nui̱ ni pépruri̱n Kapernáumnum jeamiayi. 2 Nui̱ jeamtai shuar emearu jaan patak yanakin ejetiarmiayi. “Tsuártatui” nekas tu enentáimtuinia ásarmatai Jesus jaan chicharuk “Uchiru, kakaram ajasta. Ashí ame yajauch túramuram tsaṉkuramuiti.” 3 Takui̱ Israer shuara jintinniuri̱ yajauch enentáimprar “Ju̱ka Yusan ti yajauch chicharui” tiármiayi.

4 Tu enentáimiainian Jesus nekáa chicharainiak “¿Urukamtai imiá yajauch enentáimprum? 5 Túa imiá yúpichuchit. Shuara yajauch túramuri̱n tsaṉkuratin yúpichuchikiait. Tura emearu ‘Nantakim wekasata’ títin yúpichuchikiait. 6 Wi Aents Ajasua núchakaitiaj. Ju̱ nuṉkanam Wi yajauch túramun asakátratniuitjiai. Wátsek, nu nekaatarum tusan ju̱na iniakmastatjai.” Nuna tinia emearun “Wajaktia, kanutairam jukim je̱e̱miin wetá” tímiayi. 7 Tutai emearusha nantaki̱ ni je̱e̱n wémiayi. 8 Tura nuna Yus kakarman shuaran susa asamtai ashí aents wáinkiar ashamkar Yusan shiir enentáimtusarmiayi.

Matéu Jesusan némarma

(Mar. 2:13-17; Ruk. 5:27-32)

9 Nuyá̱ Jesus wémiayi. Nui̱ wesa Mateun kuít juutainium pujan wainiak “Nemartusta” tímiayi. Tutai Matéu nuna ikiuak Jesusan nemarmiayi.

10 Nú ukunmasha Matéu je̱e̱n yurumuk pujái̱ untsurí yajauch armia nu Israer shuar káunkar Jesusa unuiniamuri̱ji̱a̱i̱ irunar yurumiarmiayi. 11 Pariséusha nuna iisar Jesusa unuiniamuri̱n aniasarmiayi “¿Urukamtia atumí Úuntri̱ṉkia kuitia achinja̱i̱sha tunaarinniuja̱i̱sha irunar yuruma?” tiármiayi. 12 Tura Jesus nuna antuk chicharainiak “Péṉker ainia nuka tsuákratniun atsumainiatsui. Antsu jainia nu tsuákratniun atsumainiawai. 13 Werum ju̱ aarma unuimiutarum ‘Murik maam Winia surusum nuja̱i̱ “máakete” tátsujai. Antsu waitnenkartutai̱n wakerajai.’* Wikia ‘péṉkeraitjiai’ tuinian untsuktaj tusan táchaitjiai. Antsu tunáa shuar ni enentái̱n yapaji̱áwarat tusan táwitjiai” tímiayi.

Jesusan ijiarmátniun aniasarma

(Mar. 2:18-22; Ruk. 5:33-39)

14 Nuyá̱ imiakratin Juaṉka unuiniamuri̱ Jesusan tariar aniniak “Iikia tura Pariséusha ¿urukamtai ijiarmainiajⁱ tura ame unuiniamurmeka ijiarmainiatsu?” tiármiayi. 15 Tutai Jesus aya̱k “Kame nuatmanum ipiaamu ainia nu nuatusha pujamunmaṉ ajakmárua núnisar ¿kúntuts pujusárminkiait? Túrasha tsawant jeattawai nuatu junaktin antsu nui̱kia ijiarmáwartatui.

16 Tarach mamur ja̱a̱nakmatai yamaram tarach anujtúkchatniuiti. Túramka nijiam yamaram tarachia nu sumpeak mamushan nuna naṉkaamas já̱a̱kchattuak. 17 Núnisaṉ nijiamanch yamái nawamu muits arutnum yarachminiaiti. Túramka karíak muítsan ijiakar ukarámniaiti. Antsu nijiamanch yamái nawamu yamaram muítsnum yaratniuiti. Nu túramka muitscha tura nijiamchisha mái̱ peṉker ártatui” tímiayi.

Jesus Jairu nawantri̱n tura chíkich nuwa̱ncha tsuarma

(Mar. 5:21-43; Ruk. 8:40-56)

18 Jesus chicháa pujái̱ Israer shuara uuntri̱ Jesusan tarí tikishmátar chicharuk “Winia nawantur jarutkayi. Ame winim uwejmiji̱a̱i̱ antintrukakminkia nantaktiatui.” 19 Tutai Jesus ni unuiniamuri̱ji̱a̱i̱ wajakiar nin wéarmiayi. 20 Tura jintiá wenai̱ nuwa̱ tuse uwí numpá ájapeak wáitias pujú asa Jesusa úkuri̱ni̱ amayá̱ṉ ni pushiri̱n antiṉmiayi. 21 Áyatik ni pushiri̱n antiṉnaka péṉker ajastatjai tu enentáimpramiayi. 22 Nuna nekáa Jesus ayantár nuwa̱n chicharuk “Shiir enentáimprata, nawantru. Yus nekas enentáimtusu asam péṉker ajasume” tutai nu chichamtaik ni jáamuri̱ya̱ péṉker ajasmiayi.

23 Nuyá̱ Jesus uunta je̱e̱n jeamiayi. Tura nui̱ charaatum ajainiancha tura jakaan iwiarsatai tusar péeman umpuiniancha wainiak 24 chicharainiak “A̱a̱ jíintratarum. Nuwa̱chikia jákachai antsu aya kanarai.” Peṉké jakaan nékayat túratta nuna neka asa “aya kanarai” tímiayi. Takui̱ aents Nin wishikrarmiayi. 25 Tura nuna ashí ji̱i̱r Jesus je̱á̱ wayá̱ nuwa̱chin uwejnum achik inianteam nantakmiayi. 26 Nu túramu ashí nu nuṉkanam etsernarmiayi.

Jesus jimiará kusurun tsuarma

27 Nuyá̱ Jesus wéakui jimiará shuar ji̱ kusuru untsumki̱ pataatukarmiayi. “Uuntá, ii Uuntri̱ Tawit ame we̱a̱trum asamtai iin waitnenkarturta” tiármiayi. 28 Jesus je̱á̱ waya̱mtai ji̱ kusuru tariarmiayi. Tariaram Jesus aniasar “¿Ju̱na túramniaiti túrutrumek?” tímiayi. Nisha “Ee, Uuntá” tiármiayi. 29 Tuíniakui Jesus ni ji̱n antinkiar chicharainiak “Átum nekas enentáimtarmena núnisaṉ túrunati” tímiayi. 30 Nuja̱i̱ ji̱ péṉker ajasármiayi. Nuyá̱ Jesus “Etserkairap. Shuar peṉké nekaawara̱i̱ṉ” tímiayi. 31 Támaitiat jíinkiar Jesus túramun ashí nu nuṉkanam etserkarmiayi.

Muut iwianchrukun Jesus tsuarma

32 Kame nuya̱ṉka jiiniainiamunam muut iwianchrukun Jesusan itiariármiayi. 33 Tura Jesus yajauch wakaní̱n ji̱i̱rki̱ akuptúkam nu chichachu chichakmiayi. Ashí nuna iisar ti enentáimprar chichainiak “¡Yáunchusha Israernum ju̱ja̱i̱ métek túramu peṉké wáinkiachmaiti!” tiármiayi. 34 Antsu Pariséuka yajauch enentáimtuiniak chichainiak “Nu shuar iwianchi uuntri̱ kakarmari̱ji̱a̱i̱ yajauch wakaní̱n ji̱i̱ki̱ akupeawai” tiármiayi.

Jesus shuaran waitnentamu

35 Jesus ashí péprunam we ni iruntai̱ri̱n wayá̱ uwempratin chichaman étseruk “Yus akupeana nui̱ eṉkemátarum” tu etsermiayi. Tura ashí najaimiayancha tura suṉkurja̱i̱ jáiniancha tsuámiayi. 36 Shuaran iisar murik wáinchatia núnis pimpikiar tura kúntuts pujuinia ásarmatai waitnentrarmiayi. 37 9:​37-38 Nuyá̱ ni unuiniamuri̱n chicharainiak “Ju̱ aents Yus Chicham ujaktiniaitji Yus shuar ajasarat tusar. Nu takat ti núkap awai tura takarin ishichik áiniawai. Nu takatka júuktinia áintsaṉkete. Júuktin tsawant jeamtai takáu táasmatai takamtikin ujaktin átsuk takaun akupkat tusa. Atumsha núnisrumek Yus seatarum ni shuari̱n akupak aentsun júukarat tusarum” tímiayi.