Márkus
Jesus Jataranmaya̱n iwianchrukun tsuarma
(Mat. 8:28-34; Ruk. 8:26-39)
5 Nuyá̱ antumiaṉ amaini̱ Jataranam jeawarmiayi.
2 Jesus kanunmaya̱ jiinkimtai áishmaṉ iwianchruku, shuar jakaa iwiartai̱niumia̱ wárik taa Jesusan iṉkiuṉmiayi. 3 Nu shuar iwiartai̱nium tuke pujuyayi. Tura jiruja̱i̱nkia nin jiṉkiatniun tujintkiarmiayi. 4 Jiruja̱i̱ nawe̱nmasha uwejnumsha tuke jiṉkiamu ármiayi. Túramaitiat jiṉkiarman tsuriar tepet tepet awajmiayi. Tura ti kakaram asamtai nin nupetkachminiuyayi. 5 Tuke tsawai̱sha káshisha iwiartai̱nium murasha kayaja̱i̱ ijiumak untsumuu wekainiuyayi. 6 Jesusan arantian wainiak tseke tarí tikishmátramiayi. 7 5:7-8 Túrunamtai Jesus chicharuk “Ni enentái̱ya̱ iwianchiá, jiinkitia tájame” takui̱ íwianch kakantar chichaak “¿Winiasha urukamtai tarutnium Uunt Naṉkamantu Yusa Uchirí̱ Jesusá? Yus íirmanum wáitkiarsaip tájame” tímiayi. 9 Takui̱ Jesus chicharuk “¿Ame náarmesha yait?” Tutai nisha aya̱k “Untsurí ásar wikia Untsurí suntar tu anaikiamuitjiai” tímiayi.
10 Nuna ti umik nu nuṉkanmaya̱ akuptúka̱i̱ṉ tusa Jesusan ti seamiayi. 11 Nui̱sha nainnium nuntumas untsurí kuchi shushuṉmainiak matsamármiayi. 12 Tuma asamtai kuchiniam eṉkemátin tsaṉkatrukta tusar Jesusan seawarmiayi. 13 Tuíniakui Jesus “ayu” tímiayi. Takui̱ íwianch áishmaṉkai̱nia̱ jíinkiar kuchiniam eṉkemáwarmiayi. Kuchisha ti untsurí jimiará mir áchiawash. Ashí mash nánatanam iniaawar antumiaṉnum iniaṉkarmiayi. Nui̱sha entsá ki̱akar jakerarmiayi.
14 Túrunamtai kuchin wáinin pisarar péprunmasha shuarnumsha nuna etserarmiayi. Tuma asamtai iyutai tusar ashintiukarmiayi. 15 Túrawar Jesusai̱ jeawarmiayi. Jeawar áishmaṉ yaunchu iwianchrukun yamaikia péṉker ajasún pushiri̱n entsar pujan wáinkiarmiayi. Wáinkiar ashamkarmiayi. 16 Tura waketkiar kuchi túrunamuncha iwianchruku péṉker ajasmancha mash etserkarmiayi. 17 Tuma asamtai ni nuṉke̱ya̱ jiinkí̱ wetá tusa seawarmiayi. Jesus kanunam eṉkempramtai áishmaṉ nuik iwianchruku amia nu Jesusan chicharuk 18 “Wi ámiji̱a̱i̱ tuke tsaniṉkian wekasatjai” tímiayi. 19 Tura núnaka Jesus suritkiamiayi. “Antsu ame je̱e̱miin áminiurmi̱i̱n weme ashí Uunt Yus túrutma nu tura waitnentrampra nusha ujakárta” tímiayi. 20 Tutai áishmaṉsha wémiayi. Tura antsu Tekapurisnum Jesus nin péṉker awajsámia nuna ashí shuaran ujakmiayi. Nu nuṉkanmaya̱ shuarka nuna antukar ti enentáimprarmiayi.
Jesus jimiará jaan tsuarma
(Mat. 9:18-26; Ruk. 8:40-56)
21 Ataksha Jesus kanuja̱i̱ katiṉmatai aents untsurí Nin irunturarmiayi. Jesuska antumiaṉka kaanmatkari̱ wajamiayi. 22 Tura Israer shuar iruntai̱ je̱a̱ náampruku, ni naari̱ Jairu, támiayi. Taa Jesusan wainiak piniakum tepersamiayi. 23 Piniakumar ti seak “Winia nawantur jarutui. Winitiá, túram péṉker ajasat tusam uwejmiji̱a̱i̱ antintrukta. Nuiṉkia jarutkashtatui” tímiayi. 24 Tutai Jesus niji̱a̱i̱ wémiayi. Tura untsurí shuar wena ásar Nin chánuarmiayi.
25 Nui̱ nuwa̱ ti jaa páchitkia wémiayi. Nisha tuse uwí numpan ajapeak wáitias pujuyayi. 26 Ti untsurí tsuákratniun nisha ímiasuyayi. Tura iyamsha ti wáitias pujuyayi. Tura ni kuítri̱ncha ashí ajapaitiat tsuámarchauyayi antsu tsuamsha nu arant ajauyayi. 27 Nu nuwa̱sha Jesus túramun antuku asa ni ukuurini̱ amayá̱ṉ ni pushiri̱n antiṉmiayi. 28 “Wi aya ni pushiri̱n antiṉnaka péṉkerapi ajasaintjia” tu enentáimias túramiayi. 29 Tura Jesusa pushiri̱n antiṉ nú chichamaik numpa ájapman meṉkakamiayi. Péṉker ajasman aya̱shi̱i̱n nekapramiayi. 30 Tura nuiṉ Jesuska ni kakarmari̱ji̱a̱i̱ tsuarman nekapmampramiayi. Tura nuna nekáa ayantár chichaak “¿Ya winia pushirun antiṉtruka?” 31 Tutai ni unuiniamuri̱ chicharainiak “Untsurí ámin antinmainiasha ¿urukamtai ‘ya winia antintkia’ tame?”
32 Tura Jesus yaki túruta tusa ashí iimpramiayi. 33 Nuiṉkia nuwa̱sha ni aya̱shi̱n túruna nuna nekáa ti ashamak kuraimiayi. Tura Jesusan jearí tikishmátramiayi. Tura ni túrunamuri̱n ashí paant ujakmiayi. 34 Takui̱ Jesus nin chicharuk “Nawantru, Winia nekas enentáimtursa asakmin péṉker awajtámsaitme. Shiir wetá tura tuke péṉker pujusta” tímiayi. 35 Tura Jesus nuna tuke chichas pujái̱ iruntai̱ je̱a̱ uuntri̱ je̱e̱nia̱ tariarmiayi. Tariar chicharainiak “Ame nawantrum jakayi. ¿Urukamtai Unuikiartin tuke itit awajsatam?” tiármiayi. 36 Tura Jesuska ni tiarmia nuna ántayat núnaka páchitsuk iruntai̱ je̱a̱ úuntri̱n chicharuk “Ashamkaip, áyatik nekas enentáimtursata” tímiayi. 37 Tura Niji̱a̱i̱ wétinian aya Pítruncha, Jakupuncha ni yachi̱ Juaṉja̱i̱ tsaṉkatkarmiayi. 38 Iruntai̱ je̱a̱ uuntri̱ je̱e̱n jeawar aents charaatum ajainian útainian untsumuk ajainiancha Jesus wainkiamiayi. 39 Tura nuwa̱ch peṉké jakaan nékayat wayá̱ nin chicharuk “¿Urukamtai timiá útrum tura waa waa ajarum? Nuwa̱ch jákachai antsu kanarai” tímiayi.
40 Nuna takui̱ wishikrarmiayi. Tura Jesus ashí ji̱i̱r akupkarmiayi. Áyatik nuwa̱chi aparí̱n, nukurí̱ncha tura Niji̱a̱i̱ táaruncha nuwa̱chi tepamuri̱n jukimiayi. 41 Tura waya̱war Jesuska nuwa̱chi uwejé̱n achik chicharuk “Taritia kumi.” Nusha shuar chichamja̱i̱nkia “nawantru nantaktia” tawai. 42 Nuwa̱ch tuse uwí takakuya nu, nú chichamaik nantaki̱ wekasamiayi. Túramtai nui̱ pujuarmiania nu ti enentáimprarmiayi. 43 Jesuska chichaak “Atumsha peṉké etserkairap” tímiayi. Tura “nuwa̱ch ayuratarum” tímiayi.