1 Kurintiunam

Yus akatrámu takatri̱

4 Jú̱nis ashí shuar enentáimturmastiniaitji. Iikia aya Kristu yáintri̱ntji. Kristu akatrámuri̱ntji Yusna yaunchu nekaachma ana nu yamái etserkatin. 2 Wátsek, akatrámuka tana nuja̱i̱ métek umiktiniaiti. 3 4:3-4 Wi umikmancha umikchamuncha ii Uuntri̱ Kristu nékawai. Átum enentáimturarmena nusha tura chíkich aents enentáimturainia nusha wíji̱a̱i̱ṉkia ántraiti. Imia wíkisha nekamatsjai. Kame winia tunaarun peṉké wáintsujai tura aya nuja̱i̱ “péṉkeraitjiai” tíchamniaitjiai. Yus niṉki iirui. 5 Tsawant jeamtai ii Uuntri̱ Kristu atak tátatui. Tura ashí yamái kiritniunam u̱kma nuna tura shuar ashí enentáimprarma nunasha paant awajsattawai. Nu tsawant jeatsa̱i̱ṉ shuar umikiuashit tusarum enentáimtusairap. Tura nu tsawantai̱ Yus ashí péṉker umikiarun shiir awajsattawai. Péṉker umikiuncha ishichik umikiuncha takasmaja̱i̱ métek Yus shiir awajsattawai.

6 Átum “Ju̱ shuar péṉkeraiti tura chíkich péṉkerchaiti” tu akannáirarum peṉké tíchatniuitrume, yatsuru. Nuka paant atí tusan “Átum ‘Wi Páprunuitjiai’ tura ‘Wi Apurusnaitjiai’ tiirap” tajai. Antsu aya Yus Papinium áarmaja̱i̱ métek enentáimsatarum. 7 Ámeka chíkich shuarja̱i̱ méteketme. Tura ashí takakmena nusha Yus amasmaiti. Tura Yus amasu asamtai ¿itiurak áminiukea áintsam nuja̱i̱ naṉkamantu ajai tu enentáimtumam?

8 ¿Ti kuítrinniua áintsaṉ tura ashí takakua áintsaṉ enentáimtsurmek. Iin naṉkakarum úunt akupin ajasua áintsaṉ enentáimtsurmek? Nekas úunt akupin ajasrumka maak. Nuiṉkia iisha atumji̱a̱i̱ akupkaintji. 9 Chíkich shuar mash naṉkamantua áinis áiniakuisha Yus iin ni akatrámuri̱n ashí amúamunam apujtamsaitji. Tu enentáimpramniaiti. “Yajauch áiniawai, maatai” tu pujurtamji shuar. Tura Yusa suntarí̱sha ashí ju̱yá̱ shuarsha iin iistai tusar káutramkaitji. 10 Iikia atumji̱a̱i̱ jeatsji. Kristu shuari̱ asakrin nékachua áinis enentáimturmaji shuar. Átum antsu Krístunam tí nékachuashitrum. Iikia kakarmachuitji. Átum timiá kakarmaitrume. Átumka tí peṉkeraitrume. Antsu iikia muí̱jtiaintji. 11 Tuke yamaisha tsukamaji, kitiamaji, entsartin atsumaji. Katsumpramji. Je̱a̱sha atsumaji. 12 Ii uwejé̱ja̱i̱ takaakur ti pimpíaji. Shuar katsekramainiaji túrasha iikia shiir chichamja̱i̱ aya̱ji. Itiurchat awajtámainiakuisha katsunteaji. 13 Tsanumprutmakrincha tuke shiir chichaaji. Tsuata áintsarik tuke yamaisha ashí yajauchia núnisaṉ ajapramatniun enentáimturmainiaji.

14 Atumín iniatsá̱rtajtsan ju̱ní̱ áattsujrume. Antsu winia aneamu uchirua áintsaṉ jintintjarme. 15 Atumín Yus Chichaman ujaakun Yus shuar ajastinian unuiniamjarme. Nuja̱i̱ Jesukrístu enentáimtakrumin atumí aparí̱ya áintsaṉ ajasmajai. Chíkich shuar Krístunun jintintrámatin timiá untsurí ákuisha aya wiki atumí aparí̱ntjiai. 16 Tuma asamtai wi wekaajna áintsaṉ atumsha wekasatarum.

17 Nu túratarum tusan winia aneamu uchirun Timiutéun akuptúkmajrume. Nisha ii Uuntri̱ Krístun enentáimtamunam winia uchiruiti tura Krístun enentáimtak tuke shiir wekaawai. Túrasha wi Krístuja̱i̱ wekaamun ataksha enentáimtikramprattawai. Núiti ashí Yus shuarnum wena jintíajna nuka. 18 Papru yamaikia iraishtatui tu enentáimturainiak chíkich chíkich naṉkamantuitjiai tu enentáimtumainiawai. 19 Antsu Yus wakerakuiṉkia wárik íitjiam tusan wakerajai. Nuiṉkia naṉkamantu chichame̱ṉ antukchattajai antsu wátskea, ni túramuri̱sha iistai. 20 Yus akupeana nú shuar aya chíchainiatsui antsu Yusa kakarmari̱n iniaktuiniawai. 21 Wátsek, ¿warí enentáimprum? Átum tuke núnisaṉ enentáimkiurminkia wi wini̱n asutiátniuitjarme. Tura péṉker enentáimkiurminkia aneakun shiir chichasminiaitjiarme. ¿Atumsha túa wakerarum?