Túramuri̱

Papru Sérasja̱i̱ Timiutéun júkiarma

16 Papru Sérasja̱i̱ Tírpin íirkutak Rístranam jeawarmiayi. Tura nui̱ Rístranam Yus shuaran Timiutéun wáinkiarmiayi. Ni nukurí̱ṉkia Israer shuar Yus shuarauyayi. Tura ni aparí̱ṉkia Kriaku aentsuyayi. 2 Tura Yus shuar Rístranmaya̱ tura Ikiuniu péprunmaya̱sha Timiutéuka péṉker wekaawai tiármiayi. 3 Kame Pápruka Timiutéun uyu̱ntusat tusa wakera asa Timiutéu aparí̱ Kriaku aentsu nekaawaru ásarmatai Israer shuar nui̱ pujuarmia nu yajauch enentáimprara̱i̱ṉ tusa tsupirmamtikiamiayi. 4 Tura ashí péprunam wá̱i̱rkutak wénak Jesusa akatrámuri̱ tura Yus shuara uuntri̱ Jerusaréṉnum pujusár jintíawarmia nuna súsaru ásar umikiarat tusar jintintraktak wéarmiayi. 5 Tu ujamu ásar Yus shuar nú arant Yusan enentáimturar kaka̱rarmiayi. Tura ashí tsawant kaweṉki̱ wéarmiayi.

Papru íimiarma

6 Tura Yusa Wakaní̱kia Páprun Yus Chichaman Asia nuṉkanam ujaktinian tsaṉkatkachmiayi. Tuma asamtai Príjianam tura Karaseanam wá̱i̱rkutak 7 Mísianam jeatniunam jeawarmiayi. Túrunawar “Pitinianam wetái” tiármiayi. Túrasha Yusa Wakaní̱ nui̱sha wétinian suritkiarmiayi. 8 Tuma asamtai Mísian menantkiar Trúasnum pachiniawarmiayi. 9 Nui̱ jeawar Papru kashi íimiarmiayi. Masetúnianmaya̱ áishmaṉkan wajan wáinmiayi. Nu áishmaṉ Páprun chicharuk “Winitritia yaintkiamnium” tímiayi. 10 Nuya̱ṉka tu íimiarmatai wisha Pápruja̱i̱ wetai tusar iwiarnarmiaji. Tura Yus iincha nú nuṉkanam ni chichame̱ etserkat tusa ti nekas untsurmakrin wéaji.

Jiripiusnum túrunamu

11 Tura nuya̱ṉka kanunam eṉkemprar Trúasnumia̱ jíinkir Samutrásia nuṉkanam jeamiaji. Tura kashin tsawa̱r nuya̱ṉka katia̱rar Niápuris péprunam jeamiaji. 12 Tura Niápurisnumia̱ náwek Jiripiusnum jeamiaji. Nui̱ Jiripiusnumka Rúmanmaya̱ aents matsamsa ármiayi. Tura nú péprusha Masetúnia nuṉkanam nekas úunt pepruyayi. Tura nui̱sha seturmaji. 13 Nuyá̱ sáwartin tsawa̱rmatai pepru ikiukir entsá supichik wémiaji. Yus áujsatniun iruntrarmia nui̱ pujusár nuwa̱ iruntrarmia nu Yus Chicham ujakármiaji. 14 Nui̱ Tiatira péprunmaya̱ nuwa̱ ni naari̱ Ritia wainkiamiaji. Nisha tarach yamákáin péṉkeran súriniuyayi. Yúsnasha shiir awajniuyayi. Yus Chichaman Papru etserkamia nuna nisha péṉker anturkamiayi. Túman Uunt Yus Papru chichaamun umirkat tusa ni enentái̱n takasmiayi. 15 Túruna nú nuwa̱ níniuri̱ji̱a̱i̱ imiantmiayi. Tura nuya̱sha chichaak “Yus shuar nekas ajasái túrutkurmeka winia je̱a̱rui̱ winitiárum” tímiayi. Tura nui̱ jeawakrin setumtikrampramiaji.

16 Tura nuyá̱ ukunam Yus áujsatai tusar wekaamar nuwa̱ch nekamin iwianch eṉkemtuamu iṉkiunmakmiaji. Nu nuwa̱chikia misatkauyayi. Nisha nékamkui nérenniuri̱sha tí kuitriniawarmiayi.

17 Tura nú nuwa̱ch iincha Pápruncha pataaturmamiaji. Tura kakantar untsumuk “Ju̱ áishmaṉsha nekas Uunt Yusan umirkaru áiniawai. Tuma asa nisha atumín uwempratin chichaman ujatmarme” tímiayi. 18 Tura nú nuwa̱chisha ti núkap tsawant tu wekaimiayi. Títmakui Papru ayanmar iwianchin chicharuk “Jesukrístu náari̱ji̱a̱i̱ tájame ni enentái̱ya̱ jiinkitia” tutai íwianchkia nú chichamaik jiinkimiayi.

19 Tura nuwa̱chi nérenniuri̱sha íwianch ji̱i̱ki̱ awematmian nekaawar Páprun Sérasnasha kajerak achikiar pepru uuntri̱ íisarat tusar ajapén júkiarmiayi. 20 Tura pepru úuntri̱i̱n ejeniar chicharainiak “Jú̱ aishmaṉ Israer shuar áiniawai. Tura iin páchim enentáimtikramainiaji. 21 Tura iisha Rúmanmaya̱ aents árin ii túrachminian iikia asumprachman jintintramainiaji” tiármiayi. 22 Tura nuya̱ṉka ashí aents Páprun Sérasnasha kajerkarmiayi. Túramtai pepru uuntri̱ chichainiak “Pushiri̱ áitkiarum numiji̱a̱i̱ asutiátarum” tiármiayi. 23 Tura nuyá̱ ti asuttsua amikiar sepunam eṉkeawarmiayi. Tura sepú wáinniun chicharuk “Tí peṉker iistá pisarara̱i̱ṉ” tiármiayi. 24 Nu chichaman antuk sepú wáinin ti init awayá̱miayi tura nawe̱n numi najanamuja̱i̱ tee chanuntamiayi. Tú tura ikiukmiayi. 25 Tura kashi ajapéṉ Papru Sérasja̱i̱ Yusan áujainiak kantampriarmiayi. Tura chíkich eṉkeamusha nuna antúu pujuarmiayi. 26 Tu pujuiniai̱ aya aneachma ti kakantar ú̱u̱rkamiayi. Tura sepusha muchitramiayi. Túrunamtai sepú wáitiri̱sha ashí urantrarmiayi. Tura aents jiruja̱i̱ eṉkekar jiṉkiamusha mash atiniákarmiayi. 27 Túrunamtai sepú wáinin shintiarmiayi. Tura wáitisha mash uranar aan wainiak eṉkeamusha jíiniar shiákchariash tusa ni puya̱ri̱niak ukuiniak mámattsa pujumiayi. 28 Tura Papru untsúak “Amek yajauch awajmamsaip. Ashí pujuiniaji” tímiayi.

29 Tutai sepú wainniusha jinia ekeemak tsékeṉki̱ waya̱miayi. Tura Papru Sérasja̱i̱ pujamunam kuraṉki̱ jearmiayi. 30 Tura a̱a̱ ji̱i̱ki̱ aniasmiayi “Uuntá, uwemprataj tusan ¿warí itiurkattaj?” tímiayi. 31 Tutai nisha chichainiak “Uunt Jesukrístu nekas enentáimtusta. Túrakmeka amesha tura áminiurmesha uwemprattarme” tiármiayi. 32 Tura nuyá̱ ashí ni je̱e̱n pujuarmia nunasha Yus Chichaman ujakármiayi. 33 Tura tsawant iraṉkai̱ sepú wáinin Páprun Sérasja̱i̱ numpamnamuri̱n nijiararmiayi. Túramtai nuya̱sha sepú wainniusha nua̱ri̱ji̱a̱i̱ uchirí̱ji̱a̱i̱ imianiarmiayi. 34 Túramtai nuya̱sha ni je̱e̱n itiariar ayurawarmiayi. Tura sepú wainniusha níniuri̱ji̱a̱i̱ Krístun enentáimtusar Kristu shuari̱ ajasu ásar ti shiir warasarmiayi.

35 Kashin tsawa̱r pepru uuntri̱ Páprun Sérasja̱i̱ akupkata tusar suntaran sepú wáinniun akuptúkarmiayi. 36 Tura nuya̱ṉka sepú wáinin Páprun chichaak “Yamaikia pepru uuntri̱ chichaman akuptúrmakai, átum wétinian. Tuma asamtai yamaikia péṉkerak jíinkitiarum” tímiayi. 37 Túrasha Papru suntaran chicharuk “Warí, iisha Ruma aents árini̱ṉ nisha chichaman iwiartsuk ashí shuar iimiainiai̱ṉ asutiámamji. Túrawar sepunam eṉketmamji. Tura ¿urukamtai yamaikia u̱u̱k akuptámkataj tusa wakeruinia? Atsá. Antsu uuntcha niṉki taar ji̱i̱rmaktiai” tímiayi.

38 Tutai suntarsha waketkiar pepru úuntri̱n nuna ujakármiayi. Tutai nisha Ruma aentsun nekaawar ti ashamkarmiayi. 39 Túmak ashamainiak Páprun Sérasan weriarmiayi tsaṉkurturtarum titiai tusar. Nuya̱sha sepunmaya̱ jí̱i̱kiar “Yamaikia waitneasrum wetarum” tiármiayi. 40 Papru Sérasja̱i̱ nuyá̱ jíinkiar Ritia je̱e̱n wéarmiayi. Tura Yus shuaran ikiaká̱rar ikiukiarmiayi.