Taniar
Áishmaṉ riniu entsaru ímiaja̱i̱k wainma
10 Tura Siru menaintiú uwí Pirsia nuṉkanam úunt akupin ajas pujamunam Taniarka, chíkich naari̱ Pirtisasár, chícham nekamtiknamiayi. Nu chichamsha ti itiurchatan pachis nekasa nuna ujamiayi. Tura chichamnasha antuk nuyá̱ ímiaja̱i̱k wainkiamia nunasha paant nekaamiayi. 2 Wi Taniaraitiajna jú̱naka nu tsawantinkia menaintiú tumiṉ tí kuntuts pujusmajai. 3 Núnisnak nu menaintiú tumiṉ jeamamka yurumak kunturmancha núnisaṉ namaṉnaksha yúachmajai. Tura wíniunkesha umarchamjai. Ántsanak asuitinkisha ukatmamkachmajai. 4 Nuyá̱ emka nantu tsawant paintikuátrutin uunt entsa Tíkrisa yantamén wisha wajamjai. 5 Nuyá̱ paṉkái̱ íimiaj tukamán áishmaṉ riniu pushí entsaru tura Ujasnumia̱ kuriji̱a̱i̱ najanamu emenmaman wáinmiajai. 6 Núnisaṉ ni aya̱shí̱nkia krisuritiu kaya ániuyi. Tura yapiṉkia peemja̱i̱ métekeyi. Ni ji̱sha shirikip keana ímianuyi. Tura kunturi̱sha, nawe̱sha, yaṉkú jiru jiamu wincha ajasua núnisauyi. Ni chichame̱ṉka untsurí shuar irunar tétete ajainiana tímianuyi. 7 Núnaka aya wi Taniaraitjiana ju̱na ímiaja̱i̱k wainkiamjai. Túrasha wiji̱a̱i̱ pujuarma nuka wáinkiacharmai. Túmainiayat ti sapijmiakar ú̱mkatai tusar pisarármai. 8 Kame wiki juákan núnaka wainkiamjai. Túran sapijmiakan putsú putsú ajasan kakarmachu pimpí pimpí ajasmajai. 9 Nuya̱ṉka ni chichame̱ antukmajai. Tura nuna ántaj tukamán tekem iniantan ti kanarmajai.
Taniar ikiaká̱rma
10 Tumai̱ uwej antintiak ishintiátar kurá kura̱i̱ṉ tikishmamtikrur tura shitiamtikrur apujtusmai. 11 Tura chichartak “Ti aneamu Taniará títiatjamna nu émamkesam antukta. Túram yamaikia wajaktia. Warí, wikia ame akuptúkmaitjiai” turutmiai. Túrutkui kurayatnak wajakmiajai. 12 Nuya̱ṉka chichartak “Taniará sapijmiakaip. Warí, nekas enentáiji̱a̱i̱ tura péejchach ajasam ame Yúsrum anturkataj tusam yama naṉkamtaik seamamna nuya̱ṉ anturkamuitme. Tuma asamtai wi tarijme. 13 Túrasha Pirsia akupniúri̱ chichamprin* paintiúnu tsawant árenkamai. Tuma asamtai wikia Pirsia nuṉka akupniúri̱ arma nuja̱i̱ juákmajai. Túrasha Yusa suntari̱ nekas naṉkamantua nú Mikiair yaintkiattsa tarutmiai. 14 Tuma asamtai amukatin tsawantin ame shuarum urukawartata nuna paant nekamtikiattsan wikia tarijme. Warí, ímiaja̱i̱k wainkiamam nuka nu tsawantaiti” turutmiayi.
15 Tu chichartakui múutmaran peṉké chichatsuk nuṉká tsuntsumamjai. 16 Tura aentsua núnin wenuruí̱ antintkiamai. Túrutamtai winí̱ naka wajama nuna chicharkun “Winia uuntru, ímiaja̱i̱k wáinkiaj nuja̱i̱ métek ti najamniun wainkiajai núnisnak kakarmachu ajasjai. 17 Tura ¿winia uuntru takarniúri̱sha itiura winia úuntruja̱i̱sha chichastata? Warí, wikia yamaikia kakarmachu ajasan jakamnia nekapeajai” tímiajai.
18 Nuya̱ṉka aentsua aniu nu ataksha antintiak ikiakátramai. 19 Tura chichartak “Ti aneamu áishmaṉká sapijmiakaip. Aṉkant átinkia ámiji̱a̱i̱ atí. Núnismek katsuntram kakaram ajasta” turutmiai. Túrutkui kakaram ajasan chicharkun “Winia uuntru ikiakátra asam yamaikia chichakta” tímiajai.
20 Nuiṉkia ni chichartak “¿Nékamek, urukamtai ámin tarijiam? Yamaikia iwianchi suntari̱ Pirsia nuṉka úunt akupniu chichamprinji̱a̱i̱ mánaiktajtsan waketkitniuitjiai. Tura nuja̱i̱ mánaikia amukmatai iwianchi suntari̱ Kresia nuṉka akupniu chichamprinia nu tátatui. 21 Tura nekasa nú papinium chícham aarma ana nuna paant awajtústatjame. Tura nuja̱i̱ mániakuisha winia yáintkiatniuka peṉké atsawai. Antsu áyatik atumí uuntri̱ Mikiairak yaintkiattawai” turutmiayi.