Karaseanam

Yáiniaiktarum

6 Túrasha yatsuru, Yus shuar tunáa túrashtimpiash. Atumsha nekas Yusja̱i̱ wekaarumna nu, nu wáinkiurmeka yátsum Yusja̱i̱ iwiarat tusarum yaiṉtarum. Tura naṉkamantu enentáimtumatsuk túratarum. Tura amesha nekaamata. Tunaanum iniara̱i̱j tusam anearam wekasata. 2 Kijinian júakui nuamtak yáiniaikchatniukait. Núnisrumek chíkich itiurchat pujakui nuamtak yáiniaiktarum. Túrakrumka Kristu akupeamuri̱ umíarme.

3 Shuar tujintiayat “naṉkamantuitjiai” tákuṉka anaṉmamui. 4 Shuar ní túramuri̱niak enentáimtumastiniaiti. Níniunak enentáimtumakuiṉkia tura péṉkeraitkiuiṉkia chikicha túramuri̱ íirtsuk antsu níniunak péṉker iis wararsattawai. 5 Iis, ashí ní kijintri̱niak júkishtinkiait.

6 Shuar Yus Chichaman unuimiátna nu, nu shuar nin jintíana nuna ashí takakna nuja̱i̱ yaiṉtí.

7 Anaṉmamawairap. Shuar Yusan anaṉkatniun tujintiawai. Ame araamna nuna nere̱ṉ júuktatme. Chíkich nere̱ áchattawai. Atumí enentái̱ncha núniskete. 8 Iistá. Shuar ni aya̱shi̱ wakeramunak tuke enentáimtakka jatai̱ nere̱a áintsaṉ araaiti. Nerekmatai̱ jákatniun júuktatui. Tura Yusa Wakaní̱ wakera nuna tuke enentáimtakka Yusja̱i̱ tuke shiir pujustinian júuktatui. 9 Nu asamtai péṉker túratin yawe̱tkishtiniaiti. Tura pimpitsuk takasar júuktin tsawant jeamtai páchitsuk júuktatji. 10 Tuma asamtai yáiṉmin ákuiṉkia ii jeajnia nu túratniuitji nekaska ii yachi̱ Yus shuar ainia nu yáiṉkiartin. Tura ashí shuarsha yáiṉtiniaiti.

Jesukrístunu ajasár yamaram akiiniatin nekas péṉkeraiti

11 Iimsakua winia uwejruja̱i̱ urutá uuntna áatjarum. 12 “Nekas tuke tsupirnaktiniaitme” tuinia nuka áyatik shuar shiir enentáimtursarti tusa tuíniawai. Kristu krúsnum jakamun étsereakuiṉkia itiurchat awajtúsara̱i̱ṉ tusar “tsupirnaktiniaitme” tuíniawai. Shuar “ashí akupkámun umiktajai” tusa Muisais timia núnisaṉ tsupirnaktiniaiti. 13 Pai. Tura nú shuar tsupirnaku áiniayat ashí akupkámun umiiniatsui. Muisais timia nuna ájapeni̱ṉ ikiuiniawai. Túmaitiat tsupirnakuk tusa wakerutmainiawai. Áyatik atumín “Pai, nisha tsupimiatkiakji” titiai tusar wakerutmainiawai. 14 Antsu wikia aya ii Uuntri̱ Jesukrístu krúsnum jakamunak wararsatniun enentáimjiai. Tu enentáimkiun Kristu krúsnum jakamia áintsanak ju̱ nuṉkanmaya̱ ana nuna jaka áintsaṉ páchiatsjai, tunaanum winia útsutkatin atsawai. 15 Krístunu ajasrikia tsupirnaktincha tsupirnakchaitkiursha mái̱ antraiti antsu yamaram akiiniatin nekas péṉkeraiti. 16 Ashí nekas Yus shuaran wi tájana nuja̱i̱ métek wekainia nuna Yus shiir enentáimias yaiṉtí tuke shiir pujustinian.

17 Yamaikia itiurchat najatawara̱i̱ṉ. Jesusa takatri̱ takaakui asutiuáwarma paant aya̱shrui̱ chimikma írunui.

18 Yatsuru, ii Uuntri̱ Jesukrístu atumín shiir yaintmakarti.

Nuke atí.