1 Kurintiunam
Tsanirmatin tí tunaiti
5 Shuar atumíin ti tunaan tura awai. Ju̱ yamái ashí nekanaiti. Nu shuar ni aparí̱ nuwé̱ tsanirmataiti. Timianú tunáa tsanirmamu Yus shuarchanumsha nékashtainti. 2 ¿Nu tunaaja̱i̱sha tuke naṉkamantu enentáimprumek? Antsu úttiniaitrume. Nu shuar tunaan túraka atumíiya̱ akankatniuiti. 3 Aya̱shur pujachkuisha wi nui̱ pujá áintsaṉ nuna tunaari̱n paant nekaamjai tura asutiátniuiti tajai. 4 Tuma asamtai átum káunkakrumin ii Uuntri̱ Jesukrístu kakarmari̱ji̱a̱i̱ tura wi nui̱ pujá áintsanak ii Uuntri̱ Jesukrístu kakarmari̱ji̱a̱i̱ 5 nu shuar iwianchi úuntri̱n surunkatniuiti ni aya̱shi̱ wakeramuri̱ amukati tusa. Nuja̱i̱ ni wakaní̱ ii Uuntri̱ Jesukrístu támatai uwemprattawai.
6 “Iikia péṉkeraitji” tárumna nu ántraiti, tunáa atumíin tuke akui. Iis, “Karía ishichik yuminnium eṉketam mash karimtiktsuk” tiniu áiniawai. Núnis átatui ju̱ tunaaja̱i̱. 7 Tuma asamtai nu karía yajauch awajtámsa̱i̱j tusarum ukartarum. Núnisrum ju̱ tunaanumia̱ kanakrum péṉker átatrume. Yaunchu enentái karía núnis amuukatniuiti. Ashí yamarmak yuminia áintsaṉ ajasuitrume. Paṉ karin eṉketáchma enentáimpratai. Israer shuar Paskua nampernum aya paṉ karin eṉketáchman yuu áiniawai. Atumí tunaarí̱ atsakui atumsha nu námper paṉka áintsarum péṉker ajasuitrume. Paskua nampertincha Israer shuar murikiun main áiniawai. Núnisaṉ Kristu jaka ii murikri̱a áinis ajasuíti. 8 Tuma asamtai iisha Paskua námper nájankur pujakur tuke núnisaṉ shiir wekasatniuitji. Tuma asamtai ashí yajauch tunaasha írunna nuka yaunchu nawamu karía áintsaṉkete. Nuka atsutniuiti. Antsu nekas ana nuka shiir enentáimsar wekasatniuitji. Nuka yuminia áintsaṉkete.
9 Nuik papin áatramajrumna nui̱ tsanirma ainia nú shuarja̱i̱ṉkia pachischatniuitrume tímiajrume. 10 Ju̱ nuṉkanam Yus shuarchaka aya tsanirma, aya kuítniak ikiauwin, kásamniuk, aya najankamu yusan tikishmátin áiniatsuk. Nú shuarja̱i̱ṉkia peṉké íischatniuitkiurmeka ju̱ nuṉkanmaya̱ jiinkintrume. Núnaka tátsujai. 11 Antsu wi tájana nu ju̱i̱ti, shuar “Yus shuaraitjiai” tákunka tura tunáa túriniaitkuiṉkia niji̱a̱i̱ íischatniuitrume. Tsanirmasha, kuítian ikiauwincha, ántar yusan tikishmátniusha, tsanumniusha, nampencha, kasasha “Yus shuaraitjiai” tákuiṉkia íischatniuitrume. Tura peṉké niji̱a̱i̱ yurumáshtiniaitrume. 12 5:12-13 Yus shuarcha tunaarí̱ pachischatniuitjiai. Yus núnaka íistatui. Átumka antsu atumíin Yus shuar ainia nuna tunaarí̱ íistiniaitrume. Tuma asamtai nu shuar tunaarintin atumíiya̱ akankatarum.*