Yus Kanta
Yus Tawitian nekas tajai timia
Istra shuar Etan kantamámu
89 Waitnenkartin Úunt Yusrun tuke kantamprakun yapajtsuk péṉker túrutairmin ashí aentsun nekamtikiawartatjai.
Yamaisha ukunmasha nú ukunam pujuartatna nunasha paant awajtúsartatjai.
2 “Waitnenkartutairmeka tuke átatui
tura nayaimpinmasha yapajtsuk ame péṉker túrutairmesha tuke átatui” títiatjai.
3 Yusru ame tímiam nuna enentáimtajai.
“Winia anaikiamur Tawitji̱a̱i̱ chichaman nájankun
nekas umiktatjai tusan chicharkun
4 ‘Amé wean iniaṉnatsuk átatui
tura yamaisha ukunmasha aminí̱ya̱ akupin tuke átinian iwiarturuitjiai’ tákum” turutmiame. (Séraj)
5 Uunt Yusá ame péṉkerumin tura ímiatrusketmena nuna,
nayaimpiniam ashí ame suntarum irunturmarar shiir awajtámainiawai.
6 Warí, nayaimpinmasha ¿yaki Uunt Yusja̱i̱ méteksha ajasat?
¿Uunt Yus suntarumin yaki Amé íirkasha páchitkia aint?
7 Yusá, Ame suntarum ti untsurí téntakmakar
matsatainia nuja̱i̱ iisam ti kakarmaitme tura ashamaintme.
8 Maa Ashí Tujintkiachu Yusá
¿yaki Ámiji̱a̱i̱ métekait? Imiá kakarmaitme.
Yapajtsuk umin asakmin nekas péṉker enentáimtamna nuka tí paantaiti.
9 Nayants tamparakuisha chicharkam miaaku awajniuitme.
10 Tura Amek Raapsha* maa áitkiasmek nupetkamame
nuyá̱ Ame kakarmarmiji̱a̱i̱ṉ nemasrumsha tsakiṉmakmame.
11 Nayaimpisha, nuṉkasha Áminiu áiniawai
tura nui̱ ashí írunna nusha Amek najankamiame.
12 Arakaani̱ tura nuṉkaani̱sha amek najankaitme.
Tapur naintkia núnisaṉ Irmun naintcha aentsua núnis Ámin shiir kantamprútmainiawai.
13 Ame kunturmesha tura uwejmesha kakarmaiti
núnisaṉ ame untsuurumsha kakarmarmin paant awajeawai.
14 Yus asam pujutái̱rminkia aya péṉkerkete.
Péṉker túratniusha tura naka wekasatniusha Ame pujutái̱rminkia aeprukma núnis takurmakainiawai.
Núnisaṉ nekasa nusha tura waitnenkartutaisha Aminí̱ya̱ eem wénawai.
15 Uunt Yusá, ashí aents Ámin shiir awajtámainiak kantamprútmainian antukaruka shiir awajsamu ártí.
Nisha Ame waitnenkartutairmi tsáapnintri̱i̱n wekasartatui.
16 Ame Náarmin páchinia nu tuke tsawant warasartatui.
Núnisaṉ Ame péṉker túriniaitmena núja̱i̱sha shiir awajnásartatui.
17 Warí Ame kakarmarmiji̱a̱i̱ naṉkamantu asam nisha ikiakáiniame.
Ántsamek Ame wakeramurmiji̱a̱i̱ iincha kakaram awajkartustatme.
18 Uunt Yuska tantara núnisaiti.
Israer shuara Yusri̱ṉkia tunaarincha asa ii Úunt Akupniuri̱nti.
19 Yaunchu Ámin umirtamin armia nuka mesekranam chicharainiakum
“Wi shuarnak kakarman anaikian páantin awajsan yáiṉmiajai.
20 Yamaikia winia takartin átatna nuna Tawitian anaikian
akankan úunt akupin atí tusan asuitiji̱a̱i̱ muuknum ukatrajai.
21 Niṉkia tuke yá̱i̱tiajai.
Túran winia kakarmarja̱i̱ ikiaká̱i̱tiajai.
22 Tuma asa nin nakitiáinia nusha peṉké nupetkachartatui.
Kame nemasri̱sha anaṉkachartatui.
23 Antsu ni nemasri̱ya̱ṉka ayampríttiajai.
Nuna túran nin kajerainia núnaka nupetmatkattajai.
24 Winia umitiairun tura waitnenkartutairun nin susattajai.
Tura ni kakarmari̱sha winia naarja̱i̱ páantin awajsamu átatui.
25 Núnisaṉ nayantsanmaya̱ juarki̱
entsa írunna ímianai akupin átatui.
26 Tura nisha chichartak ‘Ámeka winia aparuitme
tura winia Yúsruitme. Winia ayamprutkam uwemtikriniaitme’ turuttiatui.
27 Wisha uchí iwia̱i̱ri̱ya nútiksan apujsattajai.
Ju̱ nuṉkanmaya̱ akupin ainia nuna naṉkaamas úunt akupin átatui.*
28 Niṉkia Winia waitnenkartutairja̱i̱ tuke aneettajai.
Wi niji̱a̱i̱ chichaman najanamiaj nuka peṉké amukashtiniaiti.
29 Tuma asamtai aya ni weanak akupin awajsartatjai.
Nui̱ṉkia ni akupeamuri̱sha nayaimp náṉkatkachua ánis tuke átatui.
30 89:30-31 Túrasha wi akupkámu umiktin chicham najanamun umirtsuk nakitiáiniakuiṉkia,
numija̱i̱ asutiátniua nútiksanak ni tunaarí̱i̱n ti asutiáwartatjai.
33 Túmainiakuisha nin waitnentrartinniaka peṉké iniaisashtatjai.
Nekas chichaku asan yapajtsuk umiktatjai.
34 Wi chichaman najanamiaj núnaka kajinmáttsuk
ishichkisha peṉké yapaji̱áshtatjai.
35 Émkak Tawitian chicharkun nekas umiktatjai
tímiaj núnaka Wikia tunaari̱ncha asan peṉké anaṉkashtatjai.
36 Tawit weaka tuke pujusártiniaiti.
Wi íimmianum ni akupeamuri̱ṉkia etsa̱ ánis tuke ártiniaiti.
37 Kame kashi nantu nayaimpiniam
tuke eketna tímiatrus ártiniaiti” tu tímiame. (Séraj)
38 Túrasha Yusá, úunt akupin atí tusam anaiyakum asuiti muuknum ukatramamna nu
kajerkam muí̱jkiam ajapam iniaisaitme.
39 Nu arant Ame takartámniuja̱i̱ chícham najanamiam nu iniaisaitme
túram ni akupkatniuri̱ peṉké natsanmai̱ awajsaitme.
40 Tura ni ayamprumaktintri̱sha
ashí emestukuitme.
41 Túruna ayamprumakchamnia ajasu asamtai ashí jintiak naṉkaamainiak ashí kasarainiawai.
Nu arant niji̱a̱i̱ írutra nu íismaka natsanmai̱ ajasuíti.
42 Ni nemasri̱sha nupetkarat tusam tsaṉkatkaitme.
Túram ashí ni nemasri̱ waramtiksaruitme.
43 Núnismek meset unuimiátramuri̱sha ikiajtiúkim yá̱i̱tsuk nupetmakchamnia awajsaitme.
44 Ni akuptáiri̱sha páantniuchu awajsam
péejchach awajsaitme.
45 Tura natsa ai̱ṉ ni tsawantri̱sha sútamek awajtúsmame
túram natsanmai̱ wishiktai̱ awajsaitme. (Séraj)
46 Uunt Yusá, Ame kajetáirmesha ji kapá̱a̱ tímianua nusha
¿urutáik túkesha emeṉkáktam?
47 Wikia írara ántsaṉketjai. Tuma asamtai waitneasam enentáimtursata.
Maa, ¿itiur enentáimsamtsuk aentsush najanamiam?
48 ¿Ya aentsua tuke iwiaaku játsuksha pujustiniait?
¿Jaka matsamtainmaya̱ uwemtikrattamek? (Séraj)
49 Uuntá, yaunchu waitnenkartutairmesha ¿itiurkaitiam?
¿Warí chichakmaka yapají̱tsuk umin asam nekas túrattajai tusam waitnentratniuitjiame Tawit tíchamkiam?
50 Uunt Yusá, Ámin takartámniun untsurí nuṉkanmaya̱n kajerainiak shiir enentáimtikruiniatsui.
Yusru, nu iistá.
51 Uunt Yusá, warí Ame nemasrum ainia nuka
Ame anaikiamu túramuri̱ncha peṉké arantuiniatsui.
52 ¡Túrasha Uunt Yus tuke shiir awajsamu atí! Nuke atí.*