Isayas
Aṉkant awajsartin chicham étserma
40 “Wi shuar shiir enentáimtikrarum waramtiksatarum” tawai atumí Yusri̱. 2 Núnisrumek Jerusaréṉsha enentáimtikratarum. Asutniátniuri̱sha naṉkaamasuiti tura ni yajauch túramuri̱sha ashí tsaṉkuramuiti. Warí ashí ni tunaari̱n asutniátniuya nuja̱i̱ métek patas Uunt Yuska asutiáiti. 3 Aents kakantar untsumuk “Kampuntin atsunum Uunt Yusa jintí̱ iwiarturtarum. Aents atsamunmasha ii Yusri̱ jintí̱ naka awajtústarum.* 4 Tura chauna ainia nusha áimpramu ártatui. Núnisaṉ naint pujutra ainia nusha pakamámu ártatui. Jintia tunin ainia nusha naka awajnásartatui. Nuyá̱ nuṉka kayarkiámu ainia nusha iwiarkar pakamámu ártatui.* 5 Nuya̱ṉka Uunt Yus ni péṉkeri̱n paant awajsattawai. Warí Uunt Yus Niṉki tiniu asamtai ashí aents paant wáinkiartatui” tawai tímiayi. 6 Aents chicháa núnis chichamu “ju̱ ujakárta” takui̱ “warí títiataj” tímiajai. Tutai chichaak ashí aentska núpa̱iti tura ni péṉkeri̱sha kampunniunmaya̱ kuku̱jia ániuiti. 7 Nupa̱sha kaawai tura kuku̱jsha mayai̱ Yus akupeamu umpuim ja̱ja̱teatsuk. Tura aentska nuja̱i̱ métek áiniawai. 8 Kame núpa̱ka kaawai tura kuku̱jsha ja̱ja̱tui. Antsu ii Yusri̱ chichame̱ṉka peṉké amuukashtatui.* 9 Tura uwempratin chicham etserin asam Seuná, naint yakiya̱ nui̱ wakata. Kame Jerusaréṉká, yamaram chicham etserin asam sapijmiatsuk kakaram etserkata. Tura Jutanmaya̱ pepru chicharainiakum “¡Atumí Yusri̱ ju̱i̱ pujawai!” tu ujakárta. 10 Maa, Uunt Yuska ni kakarmari̱ji̱a̱i̱ tátatui tura taa kakaram akuptáiri̱ji̱a̱i̱ akupkáttawai. Iistá, aentsun ni túramuri̱ji̱a̱i̱ métek aṉkant aṉkant akikiártaj tusa takukí̱ tarittiawai. 11 Kame murikiu wáinin ni murikrí̱n wáiniuk kakaram akuptáiri̱ji̱a̱i̱ uchichíri̱nkia irurartatui. Murikchinkia miniakas jurukiartatui. Tura amuntsainia núnaka waitnentas yaruakartatui.
Uunt Yusa naṉkamanturi̱ṉkia apatkar nekapmachminiaiti
12 ¿Yaki nayantsancha ni uwejé̱ja̱i̱ weṉkuk nekapmait tura yaki nayaimpi esantí̱ncha ni uwejé̱ja̱i̱ nekapmait. Tura yaki náintniasha tura kampunniuncha kijin nekapmatai̱ji̱a̱i̱ nekapma núnisaṉ yaki nuṉka nekapmatai̱ji̱a̱i̱sha nekapmawit? 13 ¿Yaki Uunt Yusa enentái̱ncha jintintiait tura yaki chicharkasha unuiniaruit? 14 ¿Yanak péṉker chichartukam nekamtikruak tusa seamia tura yaki aya péṉkerja̱i̱ sumamtikiatniuncha unuiniaruit. Ya unuiniaruit tura yaki nekatai̱ncha nekamtikiamia? 15 Kame Yúsja̱i̱ṉkia untsurí nuṉka mátsatkamuka entsa nakitiatniua ántsaiti. Núnisaṉ nuṉka kijin nekapmatai̱niam eṉkeatniua ántsaiti tura Uunt Yuska antumiaṉnasha kijincha áitkias takuimniaiti. 16 Núnisaṉ ashí Ríwianunam taṉku írunna nusha tura kampunniuri̱ ti uunta nusha taṉkú maar Ni áestuatniuka peṉké jeatsui. 17 Kame untsurí nuṉkanam pujuinia nuka Yúsja̱i̱ṉkia peṉké ántar áiniawai. Warí niji̱a̱i̱ íismaka peṉké ántraiti.
18 Atumsha Yussha ¿yája̱i̱m métek awajsatarum tura warí nakumkarmek nekapmatarum? 19 Kame najanta unuimiátra nu, nakumak najanattsa emka iminniuiti tura súrin ainia nuka kuri iminiak tanur najanniuiti. Nunisaṉ nuṉkutai̱ kuitji̱a̱i̱ najanin ainia nusha iminiar najanin áiniawai. 20 Aents kuítrincha nuka ántar yusan najana enentáimtustajtsa numi mamurchamnia nuna wainiak, najanin ti neka nuna nakumka najanamu muchitkiachminian najatruat tusa e̱a̱witi.
21 Antsu ¿átumka nékatsrumek tura antukchakaitrum. Yama naṉkamtaik amia núnaka atumniaka ujatmákchakaitrum. Tura nuṉka itiur najanamuit nuka nekaachukaitrum? 22 Uunt Yuska nuṉká tenteá nui̱ pujawai. Tura nuṉká pujuiniana núnaka manchia núnin íiniawai. Niṉkia nayaimpinkia tarachji̱a̱i̱ métek tura nuap je̱a̱ núnis ayapá̱ruiti. 23 Tuma asa úunt akupin ainia nunasha amuiniawai tura ju̱ nuṉkanam naṉkamantu ainia núnaka peṉké ántar awajsártatui. 24 Tuma asa árak yama araamu yama nukarak kaṉkapra núnis áinianak naṉkamantu ainia núnaka Yus mayai̱ji̱a̱i̱ umpuim kaakarmatai nase umpuak tsuátan júana nútikiawartatui.
25 Yus Tunaarincha nu iin aninmak “Atumsha Winiasha yája̱i̱ṉ apattukrum íirsatarum. ¿Wisha yája̱i̱ṉ méteketaj?” tawai. 26 Atumsha nayaimpinmaani̱ nakaasa iimsakua ¿ya ju̱na najankaruit? Ni yaan ekemsati tusa ashí ikiusmiayi. Tura ashí yaa náari̱n nékawai. Ni kakarmari̱ timianú kakaram asamtai yaa ainia nusha Yusan ashí umirainiak chikichkisha támtsuk ashí eketáiniawai. 27 Jakup Israera shuari̱ áyatrumsha ausha ¿urukamtai Uunt Yuska ii wekaamunka wáitramtsuji tura ii itiurchatri̱ncha nekartamtsuji tárum? 28 ¿Átumka nékatsrumek tura antukchakaitrum? Uunt Yuska tuke pujuwiti tura ashí nuṉkan najana nú Yuska pimpitniasha peṉké pimpichuiti tura ni nekatairi̱sha peṉké amuichaiti. 29 Tura pimpikin ainia núnaka kakarman súwiti núnisaṉ kakarmachu ainia nunasha ikiakáiniaiti. 30 Uchi ainia nusha pimpí pimpí ajasár kakarmachu nekapainiawai tura natsa ainia nusha tukumkar iniainiawai. 31 Túrasha Uunt Yusan nákainia nuka ataksha kakaram ajasár ukukuí nanaak yakí̱ wekaana núnis wekasartatui. Tura tsékenaksha peṉké pimpikchartatui núnisaṉ wekainiaksha yawe̱rchartatui.*