Isayas
Jutá asutniáyat ántichu ajasma
1 Uunt akupin Usías tura Jutamsha Akaassha nuyá̱ Esekíassha Jutá nuṉkanam úunt akupin pujuarmia nu tsawantin Amusa uchirí̱ Isayas Jutá nuṉkanam tura Jerusaréṉ péprunam túrunattana nuna ímiaja̱i̱k wainkiamiayi. 2 Nayaimpir nayaimpitirmesha tura nuṉkamsha Uunt Yusa chichame̱ antuktarum. Warí Uunt Yus chichaak “Uchin tsakatmakan unuiniakarmajai. Túramaitiat nisha umirtutsuk kajertukarmai. 3 Tí waakaksha nérenniuri̱nkia nékaiti. Núnisaṉ umpurusha nérentin tui̱ ayurniuit nunasha nékawai. Tura Israer shuarka wi shuar áiniayat ántichu ásar peṉké nékachu áiniawai” tawai.
4 ¡Maa, tunáa matsamkamu tura yajauchi túrin shuartiram tura enentáimtsuk peṉké yajauchi túrinia uchirí̱tirmesha ausha urukakrumea ániarum! Warí Israer shuara Uunt Yusri̱ Tunaarincha nuyá̱ kanakrum nakitra iniaisarum ikiukniurme. 5 ¿Urukamtaik nu arantcha asutki̱ ematjarum, warí nu arantak ajattarum? Kame atumí muuke̱sha najamáiniawai núnisrumek ashí enentái̱mincha jaarme. 6 Nawe̱nmaya̱ juarki̱ muukmea tímianai aṉká péṉkerka peṉké atsawai. Antsu awatra tsupíamu ear kauru nijiarar penutcha penuarchamuitrume tura chimiat tusar asuitiji̱a̱i̱sha yakarchamuitrume.
7 Atumí nuṉke̱sha emeskamuiti núnisaṉ atumí pépruri̱sha ekemármaiti. Tura átum íimprumni̱ṉ atumí arakri̱ncha yajaya̱ kaunak amuk aya jú̱nik ikiuana núnis túramuitrume. 8 Seuna nawantri̱nkia uwa ajanam tura inchí ajanam aak áakmakar ikiukmiana núnin tura pepru téntakar matsamtúkma ánis niṉki juakai. 9 Tura Ashí Akupin Uunt Yus iin ishichkisha iwiaaku ujutamkachuitkiurni̱ṉkia Sutuma tura Kumura núnis ajasára̱a̱ji.
10 Sutumanmaya̱ akupniútirmesha Uunt Yusa chichame̱ antuktarum. Núnisrumek Kumuranmaya̱ aentstirmesha ii Yusri̱ akupkámu chicham anturkatarum. 11 Uunt Yus tawai “¿Urukamtai taṉku maa áesarmesha imiá súrarum? Murik aesa surarmena nunasha núnisaṉ taṉkú macharí̱ áesarum surarmena nunasha yamaikia nútsurjai. Núnisnak waaka numpe̱ncha tura muriknancha núnisnak chipiu áishmaṉnancha yamaikia nakitiajai. 12 Enentáimpratarum. Winia surustinia nuja̱i̱ Winí̱ weantúrkurmin ¿yaki atumín Winia Je̱e̱ru á̱a̱ri̱n najataikiu tusasha seatmarum? 13 Kame Winia surustinia nuka yamaikia antra itiartirap. Ántsanak kuṉkuin áesturmancha muí̱jiajai. Núnisaṉ nantu takamtai tura Sáwar tsawantcha núnisaṉ nekas enentáimturchiatrum iruntrumna nunasha katsuntratniun nakitkíjiai. Tura Winia enentáimturkuram yajauch enentái̱ji̱a̱i̱ iruntrumna núnaka peṉké katsunteatsjai. 14 Nu arantcha átum nantu takamtai námper nájankuram yajauch enentái̱ji̱a̱i̱ iruntrumna núnaka Winia Wakaniur muí̱jiawai. Tura nu kijin awajtakui pimpikin nakitkíjiai. 15 Tuma asan maṉkartuamu uwej númpak ajasu takuirum winia seatu asakrumin íischattajrume. Núnisnak tí seatkurmi̱ncha peṉké anturkashtatjarme. 16 Antsu átumka nijiamarum japimiarmena núnisrum tura atumí yajauch túrutai̱ Wi íimmianumka iniaisatarum. Nuyá̱ yajauch túrutai̱sha nekas iniaisatarum. 17 Tura péṉker túratin nekaatarum. Kame chikichna péṉkera nu e̱a̱tkarum kuítrincha ainia nusha mitiaikiasha tura waje̱sha péṉker wáinkiuram yaiṉtarum” tawai.
18 Nuyá̱ Uunt Yus chichaak “Wats winitiárum iiji̱a̱i̱ áujmatsarmi. Atumí yajauch túrutai̱ yamakái̱ya̱ núnisaitkiuisha micha imianú puju awajtústatjarme. Tura atumí tunaarí̱ ti kapa̱a̱kuitkiuisha murikiú ure̱ya imianú puju awajtústatjarme” tawai. 19 Tura atumí nekas enentái̱ji̱a̱i̱ Winia umirtin ajasrumka péṉker nuṉkanam arakmarum nekaska peṉkeri̱ yurumáttarme. 20 Antsu Wi tama umitsuk nakitiakrum nu arant ajakrumka mesetnum amukáttarme. Uunt Yus jú̱nis tíniuiti.
Seun asutiár péṉker awajsamu
21 1:21-23 ¡Seuncha ausha! ¿Itiura timiá peṉker Yusa umirniuitiatcha chíkich yusan umirkusha kuitji̱a̱i̱ aya̱shi̱n tsaṉkamin nuwa̱ núnikia? Warí tí peṉker nekasa nuna túrin ármiayi. Túrasha yamaikia maṉkartin matsatui. Kuítri̱sha tura wíniuri̱sha peṉké yajauch ajasárai. Sumamtikin ainia nusha aya kajen tura kasa ajasárai. Túmainiak mitiaikiancha tura waje̱ncha chichaman péṉker iwiartuiniatsui.
24 1:24-26 Tuma asamtai Ashí Akupin Uunt Yus Israera Yusri̱ kakaram asa nin kajerainia núnaka tura nemasri̱ncha yapajmiátkartatui. Tura amú amú awajsártatui. Nuya̱ṉka yaunchu amia núnisaṉ sumamtikniuncha tura aentsu chicharniuncha matsasártatui. Túrunamtai ju̱ka “Nekas péṉker tura naka túrin pépruiti” tunattawai.
27 1:27-31 Nekas ni yajauch túrutairi̱n iniaisarmatai nuja̱i̱ Seunka ataksha awaiṉkir péṉker awajsamu átatui. Antsu Yusa nakitiáinia nuka amukma ártatui. Numi ukat ukatniua nui̱ najanamu yus shiir awajmiarum nu natsa̱a̱rartatui. Tura nu enentáimtusrum kúntuts pujustatrume. Kakaram ainia nusha tura takatrí̱sha chirunka núnisaṉ mai̱ keekartatui. Túrasha nui̱ṉkia yaaksha nuna ikiajniáktin atsuttawai. Tu Israer shuaran Isayas ujakármiayi.