Jirimías
Achirar yajá yaruakma matsatun Jirimías papí áatrarma
29 Kame pepru úuntri̱n tura Yúsnan takarniuncha nuyá̱ Yúsnan etserniuncha núnisaraṉ ashí aentsun péprunmaya̱n achirar Jerusaréṉnumia̱ Papirúnianam Napukutunusúr yaruakarma tuke iwiaaku pujuarmia nuna Yúsnan etserin Jirimías papi̱n áatar Jerusaréṉnum pujus Papirúnianam akuptuiniak timia nuka ju̱i̱ti. 2 Nuka úunt akupin Jikiuníaska* tura nukurí̱sha nuyá̱ ni yáintri̱sha núnisaraṉ Jutanmaya̱ja̱i̱ Jerusaréṉnumia̱ úuntri̱sha ántsaṉ úweje̱ja̱i̱ṉ takakmastinian unuimiátkarusha áitkiasaraṉ jiruja̱i̱ takakma armia nusha ashí yaruakarma ai̱ nuka túrunamiayi. 3 Kame Papirúnianmaya̱ úunt akupin Napukutunusúrai̱ Sapana uchirí̱ Erasa tura Irkíasa uchirí̱ Jemaríasja̱i̱ Jutanmaya̱ úunt akupin Setekías Papirúnianam akupénakui Jirimíaska papinkia atakmas akupkámiayi. Nu papikia jú̱nis tímiayi. 4 “Tura Israera Yusri̱ Ashí Akupin Uunt Yus jú̱nis tawai. Wi tsaṉkatkam Jerusaréṉnumia̱ṉka achirar yaruakma Papirúnianam pujarmena nútiram ashí antuktarum. 5 Je̱a̱sha je̱a̱mkarum péṉker matsamsatarum. Tura arakmakrum péṉker yurumátarum. 6 Ántsarmek nuatkarum uchi áishmaṉsha nuwa̱sha yajutmaktarum. Atumí uchirí̱sha tura nawantri̱sha nuatmamtikiatarum. Tura nisha uchin áishmaṉnasha nuwa̱ncha yajutmakarti. Túmakrum menatsuk nui̱sha pampaṉtarum. 7 Núnisrumek Wi akuprámu yajá yaruakma matsatrumna nú peprusha péṉker atí tusarum enentáimtustarum. Nu péprusha aṉkant pujusti tusarum Uunt Yus seattiarum. Warí nui̱ péṉker akui atumsha péṉker matsamsashtatrumek. 8 Israera Yusri̱ Ashí Akupin Uunt Yus chichaak jú̱nis tíniuiti. Atumí yusri̱niun etserin tura nekamin atumíin pujuiniana nu anaṉkramawairap. Tura mesekar mesekrampramuri̱sha peṉké anturkairap. 9 Warí Winia náarun pachisar Wikia akupkacharmaitiat ántar etserainiawai tawai Uunt Yus.
10 Tura Papirúnianam Wi timiaj núnisaṉ sataintia uwí jeamtaikia atumín waitnentakun waketrukin tura Winia chichamprun umíakun ataksha ju̱i̱ṉ awakeartatjarme tawai Uunt Yus. 11 Wi atumín itiurkattajrum núnaka Wiki nékajai. Ukunam yajauch pujusa̱i̱rum antsu péṉker pujusmintrum tusan péṉker átinian tura shiir pujustinian iwiarturuitjiarmena nu nákastiniaitrume tawai Uunt Yus. 12 Nuiṉkia untsurkattarme. Tura kaunkarum seatkurminkia Wisha núnisnak anturkattajrume. 13 Átum nekas tuke enentái̱ji̱a̱i̱ e̱a̱tu asarum e̱a̱tkurmeka waitkiattarme. 14 Túrasha atumek e̱a̱tkarum waitkiattarme. Tura achirar yajá yaruakma átumka matsatrumin nuya̱ntka awakeartatjarme. Kame uunt nuṉka mátsatkamunam tura Wi ji̱i̱rá akuprámu tui̱ matsamsaitrum nui̱ pujarmini̱ṉ ashí ikiankan irurtatjarme. Túran tui̱ matsatrumnia̱ achira yaruaktarum tusan tsaṉkamkamjarum nui̱ṉ awakearan ataksha matsastatjarme tawai Uunt Yus.
15 Átum chichaakrum, ‘Papirúnianam Yúsnan etserniun Uunt Yus anaikiaiti’ tárume. 16 Tura Uunt Yus jú̱nis tawai. Uunt akupin Tawit pujutai̱niam pujana nuna núnisaṉ ashí aents jú̱ peprunam juákaru matsatna núnaka atumji̱a̱i̱ṉkia achir yarurmakcharma nunasha 17 Ashí Akupin Uunt Yus tawai. Nekaatarum, Wi mesetnasha tsukancha tura suṉkurnasha akuptúkartatjai. Warí niṉkia ikiu kausha núnisaran enentáimtusartatjai. Núnisaṉ tí kaush ásarmatai yúachmin íkiua núnis awajsartatjai. 18 Tura mesetja̱i̱ suṉkurja̱i̱ tsukaja̱i̱sha asutiáwartatjai. Wi nuní̱ turamtai ashí uunt nuṉka mátsatkamunam akupáinia nu ashamái̱ íirmartatui tura ashamái̱ yumiṉkramu tura wishiktai̱ wi ajapa iniaisámiajrumna ímianiaṉ átumka átatrume. 19 Yúsnan etserin Winia chichamprun etseriarma nu yámankamtaikniumia̱ iniaitsuk ujatmákarat tusan akuptúkmiajrumna nusha peṉké anturkachmarme tawai Uunt Yus. 20 Jerusaréṉnumia̱ ji̱i̱ran Papirúnianam akuprámaj nútirmesha Uunt Yusa chichame̱ antuktarum.
21 Ashí Akupin Uunt Yus Israera Yusri̱ tawai. Kuriasa uchirí̱ Akaap tura Masíasa uchirí̱ Setekías winia náarun pachisar ántar etserainiawai. Nekaatarum. Wi Papirúnianmaya̱ úunt akupniu Napukutunusúra uwejé̱e̱n íktusan iniaisattajai. Túramtai atumsha íimprumni̱ṉ Akaapan Setekíasja̱i̱ máwartatui. 22 Jutanmaya̱ Papirúnianam achirar yaruakma yumiṉkramu matsatna nuna chichainiak ‘Setekíasan tura Akaapan Papirúnianmaya̱ úunt akupniun jinium áesawarmia nútiksaṉ Uunt Yus amincha túrutmati’ tiártatui. 23 Warí Israernum ti yajauchin túriniak ni írutramuri̱ nuwé̱ armia nuja̱i̱ tsanirmawarmai. Tura Winia náarun pachisar wait chichaman Wi titiarum tíchamun chichasáruiti. Núnaka imiá nekas nékajai tawai Uunt Yus” Jirimías papin áarmiayi.
Yúsnan etserin Semayás ukunam túrunatniun étserma
24 Tura Nejeramnumia̱ Semayás ju̱ chicharkata. 25 Kame Ashí Akupin Uunt Yus Israera Yusri̱ chichartamuk “Ashí aents Jerusaréṉnum matsatainia nui̱ tura Masíasa uchirí̱ Yúsnan etserin Supunías núnisaṉ ashí Yúsnan etserin ainia nusha ame náarmek áaram papí akuptúkaruitme. Nu papinium Supunías ujaakum 26 ‘Yúsnan pujurin Juyata Uunt Yus ji̱i̱ki̱ ámin Yúsnan pujurin awajtámsaiti. Tura Uunt Yusa Je̱e̱n ashí áishmaṉ waurka ainia nu Yúsnan étserkui ame wáinkiarta tusa apujtamsaiti. Nu aents kuntujnum jiru wearmája̱i̱ jiṉkiawaram sepunam eṉkeawartiniaitme. 27 Yamaikia Anatútnumia̱ Jirimías étserna nuka ¿urukamtai chicharkachuitiam? 28 Warí niṉkia Papirúnianam akuptúrmak chichartamuk “Achira yaruakma matsatrumna nútirmeka núkap tsawant nui̱ṉ matsamsattarme. Tuma asamtai je̱a̱ je̱a̱mkatarum tura ajamtiarum túrarum nereana nuna nere yuátarum turamaji”’ tusam áarmame” Yus tawai.
29 Nuyá̱ Yúsnan pujurin Supunías Yúsnan etserin Jirimías ántamunam papin áujtusmiayi. 30 Nuyá̱ Uunt Yusa chichame̱ Jirimíasan tarí chicharuk 31 “Ashí achirma matsatainia nu ju̱ nékamtikiawarta. Nejeramnumia̱ Semayásan Uunt Yus jú̱nis chicharuk ‘Wi akupkachmaitiat Semayás étserui tusa wáitian táyat nekasaiti tumamtikiainiawai.’ 32 Tuma asa Uunt Yus jú̱nis chicharuk ‘Nekaata. Tuma asamtai Semayásan Nejeramnumia̱n ní shuari̱miak wi asutiáttajai. Túran ní aentskesha chikichkiksha juákchattawai tura Winia shuarun péṉker awajsartatjana nunasha wáinkiashtatui. Warí Uunt Yus umirkashtinian útsukuiti’” tímiayi Uunt Yus.