2 Kurintiunam

4 Yus iin waitnentrama asa ni chichame̱n etserkatniun ataktamsaitji. Tuma asamtai yawe̱tsuk takaaji. 2 U̱ka túratin ana nuyá̱ tura natsanmai̱ ana nuya̱sha kanakmiaji. Anaṉkatai tusar wekaatsji. Tura Yus Chichamja̱i̱ nakuratsji. Étserkur aya Yus Chicham tana núchik étserji. Ashí aents nuna antukar “nekas núiti Yus Chicham” tiarat tusar túraji. Wi tájana nuna Yus nékawai. 3 Uwempratin chicham ii étserjinia nu páantaiti. Áyatik meṉkakatniunam weena nu “páantchaiti” tuíniawai. 4 Iwianchi uuntri̱ ju̱ nuṉká yusri̱ ana nu, nu aentsu enentái̱n ukusturuiti. Krístunu shiir chichaman ii étsermaja̱i̱ tsáapnin enentáimprara̱i̱ṉ tusa ukustawai. Krístuka Yusan ímiatrusaṉ nakumui. 5 Iisha étserkur Jesukrístu ii Úuntri̱nti tu étsereaji. Iikia atumí úuntri̱ntji tátsuji. Antsu Jesus ii uuntri̱ asamtai atumí yáintri̱ntji, taji. 6 Yaunchu kiritin aan Yus tsáapin ati tusa tsáapnin awajsachmakia. Nú Yúsaiti ii enentái̱n tsáapnin awajtámsamia nu. Nu tsáapniji̱a̱i̱ ni shíirmari̱n Jesukrístu iniakmana nuna ashí aents nekaawarat tusar Jesukrístunu étsereaji.

Yusak enentáimtusar wekasatin

7 Nu tsáapin imiá péṉker ana nuna ii aya̱shi̱i̱n Yus ikiusuiti. Tura ii aya̱shi̱ kakarmachu, nuwe najanamua ánin asamtai, warí, kakaram ájinia nu Yusai̱ya̱nchukait. Ii ai̱ nuna nekaawarat tusa Yuska ni tsáapnintri̱n ii aya̱shi̱i̱n ikiusuiti. 8 Tuma asamtai ii itiurchatri̱ árentmaku árini̱ṉ tuke jiinkimniaitji. “Itiurkatjik” taji, túrasha Yus yáintmaji. 9 Aents pataaturmainiakrincha Yus ikiurmatsji. Emesrataj tukamá tujintiainiawai. 10 Kame Krístun mátaj tusa tuke wakeriarmia núnisaṉ iincha tuke mantamatai turamainiaji. Túrasha mantamnachu asar Kristu kakarmari̱ ii aya̱shi̱i̱n iniakmaji. 11 Iisha Jesusna ajasu asar wekaajnia nui̱ tuke tsawant tsuumainium jasattuk ajaji. Túrar ii aya̱shi̱ jakamniaitiat nu aya̱shnium Jesusa iwiaakmari̱ paant iniakmaji. 12 Iisha Yus Chicham étserkur ii aya̱shi̱i̱n jasattuk ajaji, tuma ai̱ṉ atumsha umikiu asarum nekas iwiaaku átin wainkiarme.

13 Yus Papinium yaunchu áarmanum “Yusan enentáimtusmajai tuma asan etserkamjai”* tátsuk. Iisha núnisrik Yus enentáimtusar wekaaji. Tuma asar étserji. 14 Yus kakarmaiti. Ii Uuntri̱ Jesusan jakamunmaya̱n iniantkímiayi. Iincha núnisaṉ Jesusja̱i̱ iniantamkittiaji. Tura atumji̱a̱i̱ métek ni pujamunam juramkittiaji. Nusha paant nékaji. 15 Atumsha untsurí aentssha Yus Chicham antukakrumin Yus yaintmakurme. Tuma asamtai atumsha nútiksarmek Yus yumiṉsarum pujarme. Nuja̱i̱ Yusa naari̱ uunt awajsamuiti. Nu nekaar wáitsatin ashamatsji. 16 Tura yawe̱atsji. Ii aya̱shi̱ amuiki̱ wéakuisha ii enentái̱ṉkia yamaram ajakí̱ wéawai. 17 Warí, ukunam tuke shiir pujustatjinia nu enentáimtakrikia, ju̱ nuṉkanam wáitiajnia nu, ti itiurchataitiat aya yamaiya̱ asa tiikia itiurchatchaiti tura wárik naṉkaamawai. Túrasha ii itiurchatri̱ji̱a̱i̱ Yuska ti shiir ana nuna amukachmin ana nunasha núkap suramsattaji. 18 Tuma asamtai wáinjinia nu ti enentáimtatsji. Antsu wáintsujnia nu nekas enentáimtaji. Wáinjinia nusha aya yamaiya̱iti. Antsu wáintsujnia nuka tuke amuukachminiaiti.