Isayas
Yajauch túrutaiṉkia aentsun Yusai̱ya̱ akanniuiti
59 Nekaatarum Uunt Yusa kunturi̱sha sútarach ajaschai uwemtikratniunka. Núnisaṉ anturtamkatniuncha empekchaiti. 2 Antsu atumí yajauchiri̱ṉ atumniaka Yusai̱ya̱ akantamearme. Núnisaṉ atumí tunaari̱ni̱ṉ anturtamkatniuncha nakitiak Ni yapi̱n ú̱rtamprume. 3 Warí atumí uwejé̱n numpak ajasurme tura atumí tsara uwejé̱sha yajauchin máatraiti. Nuyá̱ atumí wene̱ja̱i̱sha wait chicham chicharme núnisaṉ atumí iniai̱ji̱a̱i̱sha ishishmasrum yajauch chicham áujmatrume. 4 Yaaksha péṉker túratniun wakerak untsumtsui. Tura yaaksha nekasa nuja̱i̱ métek sumamtikiachmaiti. Naṉkamantu enentáimtumainia nuna anturainiak wait chichaman chichainiawai. Yajauch wakerutai̱n ajaprukar yajauchin takuiniawai. 5 Kajen napi nujintri̱n etektuiniawai tura tseré áṉkuri̱ncha najanainiawai. Nu nujintian yúakka jakattawai nuyá̱ apujeamka napi jiinkittiawai. 6 Kame nu áṉkusha entsarchamniaiti núnisaṉ ni najanamuri̱ji̱a̱i̱sha nukumákchamniaiti. Tura ni túrutairi̱sha aya yajauchikiti nuyá̱ ni uwejé̱ja̱i̱ ti emeskamusha írunui. 7 Tura nawe̱sha yajauchi tsékentainiawai. Túrawar tunaamkachua nuna wáurtus máwar numpe̱n uputuiniawai. Ni enentáimmiaka yajauch áiniawai. Tura wekainiaksha emeskar yajauch awajkartukmaikia wekain áiniawai. 8 Aṉkantu jintiancha núnisaṉ péṉker túratin jintiancha nékainiatsui. Ni jinti̱ṉkia tuníaru áiniawai tura nu jintianam wénaka aṉkant pujuschartatui.
9 Tuma asamtai nekasa nuka iinia kanakniuiti. Núnisaṉ naka túratniusha jeartámchaitji. Tsáapin nákaji túrasha aya kíritniuk wainji. Wincharpátniusha nákamji túrasha téenmaṉ wekainiaji. 10 Kusurua núnisar tanish takakní̱ ajaji. Wáinmachua núnisar akasar wekaaji. Tsawai̱sha tura káshisha tukumkiní̱ wekaaji. Kakaram áiniamunam jaka núniniaitji.* 11 Iikia chai̱ya núnisrik ashí útainiaji tura kúntuts chicháu yámpitsa núnisrik wáitnenmai ajaji. Péṉkera nu nákaji túrasha atsawai. Núnisaṉ ii uwempratniuka nákaji túrasha iiniya̱ṉka jeachat pujurtamji. 12 Warí Ame iismasha ii tunaari̱ṉkia ti pamparai. Nu arant íi tunaari̱ṉ paant awajtamji. Warí yajauch túramuka íini̱ṉ awai. Tura ti yajauch túraitjinia nu nekaamaji. 13 Ni wakeramusha umitsuk Uunt Yussha nakitrar ii Yúsri̱nchuiti tíniuitji. Ii Yúsri̱ji̱a̱i̱ wekayatar Yuska iniaisar ataksha Níiya̱ṉka kanaaji. Tura wáitkiastai tusar áujmatkur aya kájeaji núnisrik yajauch túrakur ii enentái̱ji̱a̱i̱ṉ waitruar chichawitji. 14 Kame naka túratniua nuka nakitniarai núnisaṉ nekasa nuja̱i̱ súmamtikiatniusha arant ajasái. Tura aents iruntai̱niam nekasa nu tukumeawai. Túmakui̱ naka enentáimin waya̱tniun tujintiawai. 15 Tura nekasa nuka meṉkakaiti núnisaṉ yajauchia nuyá̱ kanainiaka peṉkeri̱ atantrámu áiniawai.
Uunt Yus nuna wáinkiaiti tura nekasa nu túramusha atsá asamtai núnaka yajauch iyawai.
Uunt Yus Seúnan ataksha waitnentar awakearma
16 Kame Uunt Yus nuna íisash péṉkeran túrinniaka peṉké wainkiachmiayi. Tura nuna chichampruktin atsá asamtai ti enentáimpramiayi. Tuma asamtai ímia Niṉki uwemtikramnia tura Ni nekasa nuja̱i̱ métek túrutairi̱ṉ emetamiayi. 17 Tura nekasa nuja̱i̱ métek túrutai̱n mesetnum mániakur entsatai̱ jirun entsarua núnis netsepnum entsarmai. Núnisaṉ muuknumsha mesetnum etseṉkrutai̱n etseṉkrakua núnis uwemtikratniun etseṉkrukmai. Tura yapajmiáktaj tusar entsatái̱ pushincha entsarmai núnisaṉ tí kakaram nekas enentáiji̱a̱i̱ takastinia núnis wakeramun pushí takamtsuk entsartinia núnis entsarmai.* 18 Ni túrawarua nuja̱i̱ métek akikiártatui. Tura Nin nakitiáinianka Ni kajetáiri̱ji̱a̱i̱ núnisaṉ Ni nemasri̱nkia Ni suíri̱ji̱a̱i̱ akikiártatui. Nuyá̱ nayants yantam matsatainia nunasha akikiártatui. 19 Etsa̱ akatai̱ya̱ ímiania̱sha Uunt Yusa náari̱n ashamkartatui tura etsa̱ jintiai̱ya̱ ímiania̱sha Ni winchari̱ paant nekaawartatui. Warí Ni winiakka entsa kaya asakakmanum akaak urukniuit tura Uunt Yusa naseri̱ imiá kakarma nu umpuamua tímiatrus winittiawai. 20 Nuyá̱ Uwemtikkiartin Seúnnum tátatui. Tura Jakupa shuari̱ yajauch túrutairi̱n iniaisaruncha Uunt Yus chichaak 21 “Wikia chichaman niji̱a̱i̱ jú̱nis nájanjai. Winia wakaniur atumín pujurtamna tura Winia chichamprun ujakuitjiarmena nuya̱ṉka peṉké kanakchatniuitrume. Núnisaṉ atumí shuari̱sha nuna tiraṉki̱sha nuyá̱ tiraṉki̱sha yamaiya̱ juárkin ju̱ chichamnumia̱ṉka peṉké kanakchatin áiniawai” tawai Uunt Yus.*