2 Kurintiunam
1 Wi Pápruitjiai Jesukrístu akatrámu. Yus nuna wakerakui ni akatrámuri̱ anaikiamuitjiai. Ii yachi̱ Timiutéuja̱i̱ Yus shuar Kurintiunam íruntrumna nuna áatjarme. Kame ashí Akaya nuṉkanam Yusna ajasurmena nunasha áatjarme. 2 Apa Yussha ii Uuntri̱ Jesukrístusha shiir enentáimturma ásar atumí enentái̱n aṉkant shiir pujakrumin ni waitnenkartutariji̱a̱i̱ yaintmakarat tusan wakerajrume.
Papru wáitsamu
3 Ii Uuntri̱ Jesukrístu Aparí̱, ii Yusri̱ ana nuna naari̱ uunt awajsatai. Nisha ii Aparí̱nti. Iin waitnentramaji. Tura Nisha ii Yúsri̱nti. Tuma asa iin tuke atsaṉtamji. 4 Ii wáitiajnia nui̱ Yuska iin atsaṉtamji. Tura iin atsaṉtamjinia nútiksarik iisha chíkich shuar wáitiainia nuna atsaṉkrarat tusa túrutmaji. 5 Warí, Kristu wáitsamuri̱ núkap pachinkiaitjinia núnisrik ni atsaṉkramuri̱n núkap pachinkiaitji. 6 Tuma asamtai, wáitiajnia nu, Yusa uwemtikrampratniuri̱ tura ni atsaṉkratniuri̱ atumsha takustarum tusar wáitiaji. Tura Yus iin atsaṉtampramjinia nu, Yusa uwemtikrampratniuri̱ tura ni atsaṉkratniuri̱ átum takustarum tusar atsaṉkramuitji. Wats, átum uwemtikramu tura atsaṉkramu asarum ii wáitsajnia nútiksarmek wáitiayatrum shiir enentáimsarum katsuntramniaitrume. 7 Tura “túrattawai” tu enentáimtajrume. Warí, átum iiji̱a̱i̱ métek wáitsaitrume. Núnisaṉ iiji̱a̱i̱ métek Yus atsaṉtamtsurmek.
8 Yatsurtiram, iikia Ásianam ti itiurchat wáinkiamjinia nu nekaatarum tusar wakeraji. Imiá itiurchat wáinkiar iikia katsuntratin jeachmaji. 9 Nu itiurchatnumia̱ “iwiaaku jíinkishtatji” tu enentáimsamji. Túrasha “iikia tujinchaitji” tu enentáimtumatsuk antsu jakamunmaya̱n inianniua nú Yusan enentáimtusarat tusa nu túrunamji. 10 1:10-11 Jakamnia itiurchatnumia̱ Yuska uwemtikrampramji. Tura yamaisha uwemtikrampratajtsa pujurtamji. Tura atumsha iin Yus áujkartakrumni̱ṉkia “Yuska tuke uwemtikramprattaji” taji. Tura untsurí shuar Yus aujsa asakrumin ii uwempra asakrin untsurí shuar Yusan yumiṉsartatui.
Kurintiunam wau wéchatniun Papru ujakma
12 Yatsurtiram, ju̱ nekaatarum tusar wakeraji. Ju̱ nuṉkanam pujusár tura nekaska atumji̱a̱i̱ pujusár anaṉtsuk tura Yus umirkar wekaimji. Aya ii nekatairi̱ji̱a̱i̱ṉ wekaichmaji. Antsu Yus iin waitnentrama asa péṉker wekasatniun yaintmakmaji. Nu nekaar shiir enentáimji. 13 Áatjarmena nu páantaiti. Átum áujsarum nekaatin jearmena nunak aarjai. Chikichan nekaachminian aatsjai. Péṉker nekaatarum tusan wakerajrume. 14 Ishichik nékayatrumek nú nukap tuke nekaki̱ wetarum tusan wakerajrume. Nuiṉkia Jesukrístu tátinia nú tsawantai̱ átum winia shiir enentáimtursattarme. Tura átum péṉker wekasa asakrumin shiir enentáimtustatjarme. 15 Tura ii shiir enentáimtuniaj nuna nékakun ataksha Yusa waitnenkartutairi̱ nekapsak tusan ataksha atumíin irastinian wakerimjiai. 16 Masetúnianmaani̱ wéakun íirkuta naṉkaikitjiarum tusan enentáimmiajai. Tura wáketkuncha ataksha iistajrum tusan wakerimjiai. Túramtai wi Jutanam wéakui átum yáintkiatarum tusan atumín íistinian wakerimjiai. 17 Nuiṉkia ¿urukamtai túrachmaj. Péṉker enentáimtsukek “wetajai” tímiaj. Wi Yus shuarcha núnisaṉ jimiará chichamtiniaiti, tú enentáimtursarumek? 18 Núchaiti. Yus tana nuna tímiatrusaṉ umíana nútiksarik iikia ii chichame̱ umiktai tusar wakeraji. Jú̱ chichamaik “Ee, atsá” tátsuji. 19 Wisha Serpanuja̱i̱ Timiutéuja̱i̱ Yusa Uchirí̱ Jesukrístunun ujakmajrume. Nisha jú̱ chichamaik “Ee, atsá” tíchaiti. Antsu ni tana nuna tuke umíawai. 20 Níji̱a̱i̱sha Yus tana nu tímiatrusaṉ uminiui. Tuma asamtai Jesukrístu enentáimtakur “ni tana nuna nekas túrattawai” tu enentáimji. Tu enentáimsar Yusa naari̱ shiir awajeaji. 21 Atumniasha iincha ikiakátmajnia nu Yúsaiti. Krístunu ajasu asakrin túrutmaji. Tura anaitiamak Niniu awajtamji. 22 Tura ukunam ii achiktatjinia nuna, nekas amastatjai tusa Yus ni Wakaní̱n ii enentái̱n apujturmaji. Nuja̱i̱ Níniuitji tusar paant nékaji.
23 Atumíin itiurchatan wáinki̱a̱i̱j tusan nakitiakun atumí pépruri̱n Kurintiunam jeachmajai. Wáitrakuiṉkia “Yus íirsati” tajai. 24 “Aya wi tájana nútiksarmek Yus enentáimtustarum” waantu enentáimtumasar nu títin nakitiaji. Yus nekas enentáimtusmaja̱i̱ kaka̱a̱rme. Antsu nekas warastarum tusar wakeraji.