Awakúk
Awakúk Yusan shiir awajeamu
3 Yúsnan etserin Awakúk sekunútja̱i̱ kantamua núnis Yusan shiir awajma.
2 “Maa Uunt Yusá, naṉkamantuitmena nuna antukjai núnisnak Ame túramuncha wainkian sapijmiakun jaká enentáimiá ajajai. Núnismek tsawant naṉkamakuisha ataksha enentáimtikiarturam jintinkiartuata. Tura kajektatmena nui̱sha waitnenkarturtin enentáimprata.
3 Yuska Temannumia̱
tura Tunaarinchaka Paran náinniumia̱ tátatui. (Séraj)
Nuna winchari̱ṉkia nayaimpiniam ashí piakai
tura ashí nuṉkanam Niṉkia ti shiir enentáimtuiniawai. 4 Ni winchari̱ṉkia tsáapninji̱a̱i̱ métekete tura peemia tímianu wincharpátin Ni uwejé̱ya̱ṉka jiiniainiawai. Nuyá̱ Ni kakarmari̱ṉkia nui̱ u̱kma áiniawai. 5 Núnisaṉ Ni wéamunam játai̱ṉkia eem wemai. Tura Ni nawe̱ya̱ṉka ji keá jiiniainiawai. 6 Tura Ni wajasmataiṉkia nuṉkasha muchitiáiniawai núnisaṉ íimiakuiṉkia aentssha purushnintiá ajainiawai. Naintcha tuke irunniuitiat yumpunainiawai. Tura yáunchuya̱ naint tépeprak áiniana nusha Nin tikishmátainiawai. Warí Ni túrutairi̱ṉkia peṉké náṉkatkachuiti. 7 Núnisaṉ Kusan nuṉkanam matsatainia wáitiainiancha tura Matiannum pujuinia nuna je̱e̱sha muchitiainian wáinkiarjai.
8 Maa, Uunt Yusá, yamaikia ¿entsak kajerkarum? Ame kawairumiin ekemkamamna tura nupetmatai kárurmiin eṉkempramamna nuiṉkia ¿nayantsak kajerkamam?
9 Warí yamaikia Ame tíshimkiurmesha ti paant awajsáme
tura Ame chichakmarmesha naṉki tí nukap iwiarkamua tímiatrusaṉ aya ajasárai. (Séraj)
Tura nuṉkasha entsaja̱i̱ tesakar tesakar awajsaitme. 10 Núnisaṉ naintcha waitmakar ú̱u̱rkarmai nuyá̱ entsasha ama̱a̱rak naṉkaamasarmai. Núnisaṉ nánata sáisaintiak arma nusha kakaram untsumainiak uwejé̱n takuiniarmai. 11 Ame tsentsakrumi tsáapnintri̱ji̱a̱i̱ tura naṉkirmi winchari̱ji̱a̱i̱ etsa̱sha tura kashí nantusha seturarmai. 12 Ame kajekmármiji̱a̱i̱ nuṉkasha najararmame tura kajekam uunt nuṉka mátsatkamusha tsai̱ tsai̱ awajsámame.
13 Tura amé shuar tura áminiu asuitiji̱a̱i̱ ukatra anaikiamua nusha uwemtikraram aṉkant awajsartaj tusam jiintiukmiame.
Túram Yusan enentáimtichu je̱e̱ taṉkiri̱nia̱ tsaíram tépakmari̱n kayanam ejetukmame. (Séraj)
14 Tura iin káutramak ipistamkarmajnia núnisaṉ kuítrincha ainia nuna ú̱saraṉ wáitkiainiak wararainia nuka ní naṉkiri̱ji̱a̱i̱ṉ muuknum ijiuram pana pana ji̱i̱rume. 15 Tura nayantsanam entsa saur saur ajamunmaṉ kawairmiin eketka wémame.
16 Nuna antukan takamtsuk purushniarmajai. Núnisnak chichamun antukan chichaktaj tukamán ajamjai. Tura ukunchrusha mamukárua núnikiarmai. Nuyá̱ makursha kurainiarmai. Tuma asamtai ni suntari̱ji̱a̱i̱ káutramkar wáitkiarmastin tsawant jeat tusan warinkisha itiurtsuk aya nunak enentáimtusan útkamaikia nákastatjai. 17 Maa, ajanam ikiu kuku̱jruiniachkuisha núnisaṉ árak ajanam nerenachkuisha uriwiu nere̱ táamkuisha tura ajanam araam tsapainiachkuisha núnisaṉ muriksha wenuke̱ya̱ amuwakuisha nuyá̱ waakasha sá̱a̱kniumia̱ amuwakuisha 18 nu tuma ai̱ṉ wikia winia Uunt Yusur uwemtikruru asamtai ti wararsattajai. 19 Aya winia Yúsrukete ikiakátna nu, niṉki japá nawe̱ya̱ imianú kakaram awajtus yakí̱ ewekáttsattawai” tímiayi.
Winia tuntuitiai̱r yáraṉ netukma ainia nuna túntuiniak kantan kantamáinia nuna úuntri̱n shiir enentáimtakun ju̱na súajai.