Matéu
Jesus tias nuwa̱n áujmatsamu
25 “Yus akupeamunam pachinkiatin jú̱nis átatui. Nuatnaikiatin námper akui tias nuwa̱ natsa shirikpin akawar nuatkattana nu áishmaṉkan iṉkiuṉ je̱á̱ itiatai tusar wéarmai. 2 Seṉku nuwa̱ ímian enentáimcha armai. Tura chíkich seṉku nuwa̱ ti enentáimin armai. 3 Imian enentáimcha arma nú nuwa̱ka aya akamunak juíniak amukámtai yaraatniun asuitin júkicharmai. 4 Antsu chíkich seṉku núwa̱ka akamuncha juíniak amukámtai ataksha yaraatniun asuitin júkiarmai. 5 Tura jíinkiarmatai nuatnaikiatta nú aishmaṉ wari taachkui kari̱ pujakui kanararmai. 6 Nuyá̱ kashi ajapéṉ shuar untsumuk ‘Pai nuatkatin winiawai. Werirum iṉkiuṉtarum’ timiai. 7 Tu untsumun antukar nantakiar shirikpin akatai tusar pujursarmai. 8 Nuyá̱ seṉku nuwa̱ ímian enentáimcha arma nu chíkich nuwa̱ ti enentáimniun tiarmai ‘Iincha atumí asuitiri̱ ishichik ajamprusaitia. Ii shirikpiri̱sha kaji̱niawai.’ 9 Tutai chíkich seṉku nuwa̱ tiarmai ‘Atsá, warí iincha jeartámchattaji. Tura atumnia peṉké jeashtatui. Nekaska surutainium werum sumaka utumtarum’ tiarmai
10 Tura nuyá̱ seṉku nuwa̱ ímian enentáimcha arma nu asuitin sumak utitiai tusar wéaru ai̱ ukunam nuatkatin áishmaṉ tamai. Túramtai enentáimin nuwa̱ arma nuka nuatnaikiatin nampernum nuatkatniuja̱i̱ waya̱warmai. Túramtai wáitin epeniarmai. 11 Tura epeniarai ímian enentáimcha nu taar chicharainak ‘Uuntá, waiti uratritia’ tiarmai. 12 Tu untsumainiakui nu uunt kajerak chichaak ‘Cha, ¿yátsukaitrum? Peṉké nékatsjarme’ tiarmai.” 13 Jesus nuna áujmatas umik chichaak “Aents Ajasuitjiai tura tátin tsawantrusha tura úruk ai̱ṉ tátaj nusha nékatsrume. Tuma asarum tuke iwiarnarum pujustarum” tímiayi.
Kuit susamun áujmatsamu
14 “Núnisan Wi tátin jú̱nisaiti. Shuar chíkich nuṉkanam wéaku ni takarniúri̱n untsukar ni kuítri̱n akanák súsarmai. 15 Chikichkiniak seṉku mir kuítian susamai. Chikichnasha jimiará mir kuítian susamai. Tura chikichnasha chikichik mir kuítian susamai. Ni takastin jearma nuja̱i̱ métek súsarmai. Tura ikiuak yajá wemai. 16 Takarin seṉku mir kuítian achikmia nuja̱i̱ takakmas ataksha seṉku mir kuítian patakmai. 17 Chikitcha núnisaṉ jimiará míran achikmia nuja̱i̱ takakmas ataksha jimiará míran patakmai. 18 Tura chíkich shuar ni uuntri̱ kuítri̱n chikichik míran achikmia nuna nuṉká ta̱i̱ u̱kmai.
19 Nuyá̱ ukunam nu shuara uuntri̱ tamai. Tura kuítian súkiarmaj núja̱i̱sha warí itiurkarmaki̱ tusa iwiarattsa untsukarmai. 20 Emka seṉku mir kuítian achikmia nu tamai. Nuyá̱ ni úuntri̱n chíkich seṉku mir patakman súak timiai ‘Uuntá, seṉku mir kuit surusmame. Pai, atak seṉku míran patasmajai.’ 21 Takui̱ ni uuntri̱ chichaak ‘Ti péṉker takakmawitme. Nekas uminiaitme. Ishichkiji̱a̱i̱sha ti péṉker takakma asakmin tí nukap yamaikia amastatjai. Winí̱ waya̱m wiji̱a̱i̱ ti shiir warasta’ timiai. 22 Nuyá̱ chíkich shuar jimiará míran achikmia nu tarí timiai ‘Uuntá, jimiará mir surusmame. Pai, ataksha jimiará míran patasmajai.’ 23 Takui̱ ni uuntri̱ chichaak ‘Ti peṉker takakmawitme. Nekas uminiaitme. Ishichkiji̱a̱i̱sha ti péṉker takakma asakmin tí nukap yamaikia amastatjai. Winí̱ waya̱m wiji̱a̱i̱ ti shiir warasta’ timiai.
24 Nuyá̱ chíkich shuar chikichik míran achikmia nu tarí chichaak ‘Uuntá, ti kajen asakmin tura araachiatam tura atsaamprachiatam juurtuktarum tiniu asakmin 25 sapijmiakun ame kuítrumniaka nuṉká táutran ú̱kmajai. Pai, ju̱i̱ti ame surukmiam nu’ timiai. 26 Takui̱ ni uuntri̱ chichaak ‘Ámeka yajauchitme. Aya nákitme. Wi araachiatan tura atsaamprachiatan juurtuktarum tíniuitme túrutsumek. 27 Tu enentáimkiumka ¿urukamtai kuit iruntai̱niam ikiurtuschamam? Nuikia wi táakun patasan achikiá̱a̱jai’ timiai. 28 Nuna tinia nui̱ wajainian chichaak ‘Ju̱ shuar chikichík mir kuit atankírum tias mir kuítian takaka nu susatarum. 29 Kame núkap takakna nú shuar ataksha patatnástatui tura ampiniártatui. Antsu ishichik takakna nusha ishichik takakuitiat jurunkíttiawai. 30 Ju̱ umichu shuarsha a̱a̱ kiritniunam ajapatarum. Nui̱ ti wáitiak ti úttiatui’ timiai.” Tu áujmatsamiayi Jesus.
Akantratin átatna nu
31 Jesus áujmatuk tímiayi “Aents Ajasu ana nu ashí akupin ajas Yusa suntari̱ éṉkekma winittiawai. Tura Úunt Akupin shiir pujutái̱ri̱n pujustatui. 32 Túramtai ashí nuṉkanmaya̱ aents Nin iruntrartatui. Túrawarmatai akantrartatui. Murikiu wáinin kachurtinian tura kachurtichuja̱i̱ akanea nútiksaṉ aentsun akantrattawai. 33 Tura kachurtichunka, péṉkera nuna, untsuurí̱ni̱ awajsártatui. Tura kachurtinniaka, yajauchia nuna, menaari̱ni̱ awajsártatui. 34 Túran nekas Úunt Akupin untsuurí̱ni̱ wajainian títiatui ‘Atumniaka winia Apar shiir awajtámsaitrume. Wi akupeajna nui̱ winitiárum. Yus nuṉkan najanamia tímianaik átum nui̱ warastinian tsaṉkatramkamiarme. 35 Kame wi tsukamá wekái̱ ayurtuamiarme. Kitiama wekai̱sha umartin surusmiarme. Wait ajá wekai̱sha itiaararum ajamprusmiarme. 36 Pushir atsai̱sha átumka surusmiarme. Jaa tepai̱sha iiraimiarme. Sepunam eṉketai̱sha tarum iiraimiarme’ títiatui. 37 Tutai untsuurí̱ni̱ wajainian tiártatui ‘Uuntá, ¿urutía tsukamá wekaamnisha ayuramaji. Urutía iisha kitiama wekáa wainkiarsha umartincha amasmaji. 38 Tura urutía wait ajá wekaamnisha tura pushiram mamurmataisha iisha amasmaji. 39 Urutía iisha jaa tepamin tura sepunam eṉketmin wainkiarsha winitir íimiaji?’ tiártatui. 40 Tuíniakui Úunt Akupin chichainiak ‘Nekasan tájarme, ashí ju̱ wí shuar péejchachisha waitnentramarum nu winia anentakum túraitrume’ tiártatui.
41 Tura Úunt Akupin menaari̱ni̱ wajainian chichainiak ‘Atumsha yajá wetarum. Yajauchiji̱a̱i̱ yumiṉkramuitrume. Yus iwianchi uuntri̱ ni suntari̱ji̱a̱i̱ tuke kajinkiashtin jinium apeatniua nui̱ atumsha wétatrume. 42 Átumka wi tsukamai̱ ayurtuachmarme. Kitiamai̱sha umartin suruschamarme. 43 Wait ajá wekai̱sha ikiatrachmarme. Pushirun imiamprai̱sha entsartin suruschamarme. Jaa tepai̱sha tura sepunam eṉketai̱sha íiraichmarme’ tiártatui. 44 Tutai nisha chicharainiak ‘¿Urutía, Uuntá, tsukamamnisha kitiamamnisha tura wait ajakmincha, pushiram imiampramnisha, jáakmincha tura sepunam wait ajá pujamnisha íisha winitir yáiṉchamaji?’ tiártatui. 45 Úunt Akupin chichaak ‘Nekasan tájarme, ashí wí shuar péejchachisha waitnentrachmarum nui̱ winiasha túrutachuitrume’ tiártatui. 46 Nu shuarka tuke wáitsatniunam wéartatui. Tura Yus achikma ainia nusha tuke iwiaaku Yusja̱i̱ pujustinnium wéartatui” tímiayi Jesus.