Israernum
Tí peṉker chichaman Jesus takartamji
8 Nekas ju̱na tájame, Yúsnan pujurniu uuntri̱ Jesus iin ti shiir yaintma asa akupin pujutai̱nium Yusa untsuurí̱ni̱ nayaimpiniam pujusuiti. 2 Nekas Yusa Je̱e̱ nayaimpinma nu aents najanachma antsu Yus najanamuiti. Nui̱ Jesus Yúsnan pujurui. 3 Ashí Yúsnan pujurniu uuntri̱ ainia nu, shuar Yúsnan susamuncha tura taṉku maar Yus sútai̱ncha Yusan ashí súsatin áiniawai. Núnisaṉ Jesukrístusha Yusan súsatniuiti. 4 Ju̱yá̱ Yúsnan pujurin Muisais timia nuna Yusan yamaisha susamin akui Jesus ju̱ nuṉkanam pujakka Yúsnan pujurin áchainti. Antsu nayaimpiniam takaawai. 5 Yus yaunchu Muisaisan nayaimpiniam írunna nuna iniaktus chichaak “Ámin nainnium iniaktusmajmena nuja̱i̱ métek ashí najanata”* tímiayi. Túramu asamtai ashí yaunchu Yúsnan pujurin Muisais najanamuja̱i̱ takainia nu aya nayaimpiniam ana nuna nakumkamuja̱i̱ṉ takainiawai. 6 Antsu Jesus ti nekasa nuja̱i̱ nayaimpiniam takaawai. Muisais akupkámuka shuaran péṉker awajsachminiaiti. Antsu Yus iin tí peṉker awajtámsattaji. Kame yamaram chichamnum Yus ashí túrutmattajnia nu Muisais akupkámunam ana nuna naṉkaamas tí peṉker áiniawai. Tuma asamtai naṉkaamas péṉker chichaman Jesus takartamji.
7 Kame emka chicham Yus Muisaisja̱i̱ yaunchu najanamia nu, nekas péṉkeraitkiuiṉkia yamaram chichaman najanacha̱a̱yi. 8 Antsu péṉkercha áiniakui Israer shuaran chicharainiak
“Uunt Yus tawai, Tsawant jeamtai
ashí Israer shuarja̱i̱ yamaram chichaman najanattajai.
9 Yaunchu ju̱ shuara úuntri̱n Ejiptunmaya̱ yaruakmiaj nui̱ emka chichaman najanamjai.
Tura yamaram chichaman najanattaj nu núnischa átatui.
Emka nuna uminiachkui ajapan iniaisarmajai, tímiayi Uunt Yus.
10 Tura nu arantcha tawai, Tsawant jeamtai Israer shuarja̱i̱ yamaram chichaman najanattaj nuka jú̱nis átatui.
Wi akupeajna nuna enentái̱n paant enentáimtikrartatjai.
Nuyá̱ ni Yusri̱ ártatjai tura nisha Wí shuar ártatui.
11 Nui̱sha Yusan nekaat tusa ni ai̱sha ni yachi̱sha jintinniáiyachartatui.
Warí ashí shuar, uchisha uuntcha niṉki nekarawartatui.
12 Tura ashí ni yajauchiri̱ncha tsaṉkuraran
kame ni tunaari̱n atak peṉké enentáimtuschartatjai”* tímiayi. 13 Wats emka chicham yajauch ajakui Yus yamaram chichaman nájaneak pujurui. Tura yajauch ajasua nuka wárik ajapnattawai.