Túramuri̱

Yus shuara uuntri̱ Jerusaréṉnum iruntramu

15 Nu tsawantin áishmaṉ Israernum wéar Antiukíanam jeawar Yus shuaran jintintiáiniak “Muisais timia nútiksarmek tsupirnaktin ana nu túrachkurmeka uwemprashtatrume” tiármiayi. 2 Tuma asamtai Papru Pirnapíji̱a̱i̱, núchaiti tusar nú aishmaṉja̱i̱ ti kakaram chicharnaikiarmiayi. Túrasha nú enentáiniak enentáimsatniun tujintkiarmiayi. Tuma asamtai Antiukíanmaya̱ Yus shuar Páprun Pirnapíncha, atumsha chíkich aentsja̱i̱ Jerusaréṉnum wetarum tusar akupkarmiayi. “Tura nui̱ Jesusa akatrámuri̱sha Yus shuaran wainniusha iniasrum itiurmainkit tusarum péṉker nekaatarum” tiármiayi. 3 Papru Pirnapísha akupkámu ásar wénak Pinisianam tura Samarianmasha naṉkaamainiak Israer shuarcha Yus shuar ajasman Yus shuaran ujakármiayi. Tura Yus shuarsha nuna antukar ti warasarmiayi.

4 Tura Páprusha Pirnapísha Jerusaréṉnum jeawarmatai Jesusa akatrámuri̱sha Yus shuara wainniuri̱sha tura peṉké Yus shuarsha itiawarmiayi. Tura nisha túrunamia nuna mash etserkarmiayi. 5 Túrasha Pariséu shuarsha Kristu shuar ajasármia nu, wajakiar chichainiak “Muisais tsupirnaktinian akupkámia nuna tura nú arant ashí Muisais timia nunasha Israer shuarchasha umirkatin áiniawai” tiármiayi. 6 Nuya̱sha Jesusa akatrámuri̱sha Yus shuaran wainniusha nu chichaman nekaatai tusar iruntrarmiayi. 7 Tí chichasua umikiarmatai Pítiur wajaki̱ chicharainiak “Yatsurtiram, Yus nuik winiak chichartak ‘Israer shuarchasha winia uwemtai̱ chichamprun étserkumin antukar Krístun enentáimtusarat tusam ujakárta’ tu anaitiukmia nu nékarme. 8 Tura Yus Niṉki ashí aentsu enentái̱n neka asa Wí shuar ajasmin áiniawai tusa ni Wakaní̱n Israer shuarchancha susamiayi, iin suramsamiaj nútiksaṉ. 9 Yus iincha aushatka awajtámsachmaji. Antsu métekraketji. Tuma asamtai nisha Yusan enentáimtuiniakui Yuska enentái̱ya̱n ni tunaari̱n japirarmai. 10 15:​10-11 Tura iikia nékaji niya ántsarik Jesukrístu waitnenkartutariji̱a̱i̱ uwempraitji. Nuiṉkia ¿urukamtia Yus uwempraru áiniawai tai̱sha átum Muisais yaunchu akupkámia nu umikiarat tusarum wakerarum? Nu túrakrumka Yus túrana nu jeatsui tárume. Tura nuka kijin júkitniua áintsaṉchakait. Warí, ii úuntri̱sha tura iisha ashí Muisais timia nu umiktin tujintkiamji. Tuma asamtai ¿urukamtai kijin júkitinia núnis Israer shuarchasha áentskatin wakerarum?” tímiayi Pítiur.

12 Pítiur nuna tutai Pirnapísha Páprusha chichainiak “Israer shuarchasha ni kakarmari̱n nekaawarat tusa aentsti túrachminian túratniun Yuska tí yaintmakmaji” tú ujam mitia wáinkiar antúu pujuarmiayi. 13 Nuna ujasua amikmatai Sántiaksha chicharainiak “Yatsuru, antuktarum. 14 Nuik túrachman Yus túramia nuna ii yachi̱ Semuṉ Pítiur ujatmákji. Ju̱i̱ti, Yuska Israer shuarcha waitnentak Winia ajasarat tusa chikishtarchiniak achikiuiti, tímiayi. 15 Ju̱sha Yúsnan etserin yaunchu aarmia nu tímiatrusaṉ túrunayi. Ju̱i̱ti aarma.

19 Tuma asamtai yatsurtiram, wi tájarme Israer shuarcha Yus shuar ajasáru áiniana nu, imiatík awajsachmi. 20 15:​20-21 Íimiatarum, ashí péprunam Israer shuar iruntai̱niam yáunchuya̱n tuke sáwartin Muisaisa áarmari̱n jintintiáiniatsuk. Tuma asamtai áyatik áatratai ju̱ ‘Najankamu yus susamu ana nu iniaisatarum. Tura tsanirmawairap. Tura kajemtikramua nu yuáwairap. Tura numpasha umarairap’” tímiayi Jakupu.

22 Nuyá̱ Jesusa akatrámuri̱sha Yus shuaran wainniusha nuyá̱ ashí Yus shuaraim enentáimsarmiayi. “Papru Pirnapíji̱a̱i̱ wéakui shuar niji̱a̱i̱ nenakar Antiukíanam akupkatai” tiármiayi. Tuma ásar Jútas Parsapasan, Sérasnasha anaikiarmiayi. Nisha mái̱ uunt Yus shuar ármiayi. 23 Tura niji̱a̱i̱ ju̱ papin áarman akupkarmiayi.

“Iisha Jesusa akatrámuri̱ tura Yus shuara uuntri̱ tura ashí Yus shuaraitjinia nu atumín Israer shuarcha árumna nu, Antiukíanam, Sírianam tura Sirisianmasha ju̱ papí akupeaji. 24 Ju̱yá̱ aents ii chichame̱ja̱i̱nchu atumíin jeartámarai. Túrawar tsupirnaktin ana nu tura ashí Muisais akupkámia nu túratarum, turammiarme. Nunasha ni chichame̱ja̱i̱ṉ turamarmayi. Nu chicham atumsha antukrum nusháa enentáimprarum ‘enta nuya̱ṉka itiurkatjik’ tárume. 25 Tuma asamtai nu nekaar iisha métekrak enentáimsar jimiará áishmaṉ akupkatin anaikiamji. Jú̱ aishmaṉ ii aneamu yachi̱ Pápruja̱i̱ Pirnapíji̱a̱i̱sha atumín íirmasarat tusar akupeaji. 26 Papru tura Pirnapísha ii Uuntri̱ Jesukrístunam surumakarmiayi, ni takatrí̱sha tsuumai̱ ai̱ṉ túrami tusar. 27 Niji̱a̱i̱ Jútassha tura Sérassha akupeaji. Ii chichaajnia nuna nisha ni wene̱ja̱i̱ atumín ujatmákartatui. 28 15:​28-29 Kame túratin asamtai iisha Yusa Wakaní̱ji̱a̱i̱ ju̱ áartin enentáimsaji. Namaṉ najankamu yus susamu ana nu yuáwairap. Tura numpasha umarairap. Kajemtikramu ana nusha yuáwairap. Tura peṉké tsanirmawairap. Nuya̱sha chíkichkia nú naṉkaamas tíchattaji. Tura antsu nu iniaisarmeka péṉker átatrume.

Ayu, Yus waitmakarti.”

Tu áarman akupkarmiayi.

30 Tura Antiukíanam akupkam wéarmiayi. Nui̱ jeawar Yus shuaran irurar papin súsarmiayi. 31 Tura Antiukíanmaya̱ Yus shuarsha nu papin áujsar péṉker jintíamu chichaman áarman wáinkiar ti shiir enentáimsarmiayi. 32 Tura Jútassha, Sérassha, ímia nisha Yus Chichaman etserin ásar Yus Chichaman núkap jintintiawar Yus shuaran ikiaká̱rarmiayi. 33 Tura nui̱ ishichik tsawant pujusármatai Yus shuarka péṉker waketkitiarum tiar akupkarmiayi. 34 Tura Séras juáktinian wakerukmiayi. 35 Páprusha Pirnapíji̱a̱i̱ Antiukíanam juákarmiayi. Nisha chíkich aentsja̱i̱ Yus Chichaman étseruk pujuarmiayi.

Yúsnan ikiaká̱rtajtsa Papru ataksha wéamu

36 Nuyá̱ ukunam Papru Pirnapín chicharuk “Ashí péprunam iisha Yus Chicham etserkamaj nui̱ Yusai̱ ii yachi̱ ainia nusha urukak pujuinia iyutai” tímiayi. 37 Pirnapíkia Juaṉ Márkusan iiji̱a̱i̱ winit tusa wakerimiayi. 38 Tura Pampiria nuṉkanam Juaṉ Márkussha niisháa wéu asamtai tura Yusa takatrí̱n iniaisa asamtai Pápruka aya̱tniun nakitrámiayi. 39 Papru Pirnapíji̱a̱i̱ ti kakannairar kanakarmiayi. Tura Pirnapíkia Márkusan aya̱ki̱ Chípriniam wémiayi. 40 Pápruka Sérasan aya̱ki̱ wéakui Yus shuar Yus yainmakarti tinia akupkarmiayi. 41 Tura Siria nuṉkanmaani̱ Yus shuaran ikiaká̱rkutak Sirisianam jeamiayi.