Matéu
Jesus takarniun pachis áujmatsamu
20 “Yus akupeamunam pachinkiatin jú̱nisaiti. Nuṉká nérentin ni araamuri̱n júuktaj tusa káshik iniamar jiintiukmiai. 2 Chikichík tenariu kuit jean tsawant takamtsuk akiktajrume tusa chichas ni araamun júuktinian akupkarmiayi. 3 Nantu takuntai̱sha ataksha jiinkí̱ shuar yujan wainiak 4 timiai ‘Atumsha winia arakur júuktin yáintkiatarum. Péṉker akiktajrume’ tutai wéarmai. 5 Ataksha tutupin ai̱ nuyá̱ aaṉkusha jiinkí̱ tu tiar akupkarmai. 6 Ataksha nantu patamsai̱ jiinkimiai. Tura shuaran yujan wainiak ‘¿Urukamtai takakmatskesha aní̱ yujarum?’ timiai. 7 ‘Warí, iincha iniatmainiatsji’ tiarmai. Tuíniakui chichaak ‘Atumsha winia nuṉkarui̱ takautarum. Péṉker akiktajrume’ timiai. 8 Kirit ajátekái̱ takatrí̱n wáinniun chicharuk ‘Takatan takasáru untsukam akikiárta. Kí̱arai̱ naṉkamawaru emka akikiárta. Túram káshik naṉkamawaruja̱i̱ amukta’ timiai. 9 Takui̱ nantu patamsa ai̱ naṉkamawaru waya̱warmatai chikichík tenariu kuit jean ashí akikiármai. 10 Mash umintramtai nuyá̱ emka naṉkamawaru waya̱war ‘nuna naṉkaamas achikchatjiash’ tu enentáimsarmai. Tura chikichík tenariu kuit jean achikiármai. 11 Achikiar nérenniun itiurchat enentáimturarmai. 12 Tura tiarmai ‘Iikia ashí tsawant nantuja̱i̱ wáitsachjik. Ju̱ shuarsha nantu patamsa ai̱ naṉkamawaruka peṉké ishichik takasarai. Túrasha iiji̱a̱i̱ métek akikiárume’ tiarmai. 13 Tutai nérentin chikichkiniak iniakmas timiai ‘Umpá, peṉké kasartsujme. Káshik chikichík tenariu kuit jeá chichasar iiji̱a̱i̱ iwiarachjik. 14 Pai, ame kuítrum achikiume. Nantu patamsai̱ takasuncha ámiji̱a̱i̱ métek akiktinian wakerajai. 15 Warí, winia kuítruja̱i̱ wi wakeramun túrachminkiaitiaj. Antsu wi tsaṉka asamtai ¿yajauchik enentáimturam?’ timiai.
16 Núnisaiti Yus shuarnum. Émkaru ainia nu uku ártatui. Tura ukunmaya̱ áiniana nu, emka ártatui. Untsurí ipiaamu áiniawai tura ishichik achikma áiniawai” Jesus tu áujmatsamiayi.
Jesus ataksha ni jákatniuri̱n etserkamu
(Mar. 10:32-34; Ruk. 18:31-34)
17 Jesus Jerusaréṉnum jintiá wesa ni unuiniamuri̱n akankin chicharainiak 18 “Iistarum, Jerusaréṉnum wéaji. Nui̱sha Yúsnan pujurniu úuntri̱n tura ni jintinniuri̱ncha Winia surutkartatui. Nui̱sha wi Aents Ajasu ai̱ṉ ‘mantamnati’ turutiartatui. 19 Tura Israer shuarchanum surutkartatui. Nui̱ katsekrukar awattiar krúsnum máwarti tusar túrutawartatui. Túrasha jákayatan menaintiú tsawantai̱ nantaktiatjai” tímiayi.
Jakupu tura Juaṉka nukurí̱ Jesusan seamu
(Mar. 10:35-45)
20 Nuyá̱ Jakupusha Juaṉsha, mai̱ Sepetéu uchirí̱, nukurí̱ji̱a̱i̱ tariar Jesusan tikishmátrarmiayi. Tura nukurí̱ Jesusan waitnentrutrarat tusa seamiayi. 21 “¿Warí wakeram?” Jesus tímiayi. Tutai nuwa̱ chichaak “Ame úunt akupin ajastatmena nui̱ winia uchir chikichik untsuurnumaani̱ chikitcha menanmaani̱ akupkarti tusam apujsarta” 22 takui̱ Jesus chicharainiak “Átum seatrumna nu nékatsrume. ¿Wi wáitsattajna nuja̱i̱ métek túramniakaitrum? Wi wáitsatniun yapá umartinia áinis umartiniaitjiai. Núnisaṉ wáitsatniuja̱i̱ imiaitniua áintsaṉ imiantiniaitjiai. ¿Nú piniṉnumia̱ umarminkiaitrum. Núnisaṉ imiantminkiaitrum?” Tutai “Páchitskea” tiármiayi. 23 Tuíniakui Jesus chichainiak “Ayu. Winia piniṉkruí̱ya̱ umartatrume. Wi imiantiatjana nuja̱i̱ imiantiatrume. Antsu Wiji̱a̱i̱ tsaniṉkia pujustinniaka Wikia íischatniuitjiai antsu winia Apar iwiarturu ainia nuna nui̱ apujsattawai” tímiayi.
24 Chíkich tias unuiniamuri̱ nuna antukar nu jímiaran kajerkarmiayi. 25 Túmainiakui Jesus untsukar chicharainiak “Ju̱ nékarme, Israer shuarchanum nuna uuntri̱ ajasár ni shuari̱n nérenniua áinis ti akupénawai. Ni úuntri̱sha waantu enentáimsar witjiai akupniun tu enentáimtikiainiawai. 26 Antsu atumji̱a̱i̱ṉkia núnis áchatniuiti. Naṉkamantu ajastaj tákuṉka chikicha yaintri̱ átiniaiti. 27 Atumí̱nia uunt átaj tákumka nuiṉkia ashí shuara yaintri̱ ajasti. 28 Wisha Aents Ajasuitiatan Winia yáintkiarat tusan táchaitjiai antsu shuaran yáiṉtaj tusan táwitjiai. Untsurí shuara tunaarí̱ tumashri̱n akikmatkataj tusan jákatniuitjiai. Nuna tarimjiai” tímiayi Jesus.
Ji̱ kusuru jímiaran Jesus tsuarma
(Mar. 10:46-52; Ruk. 18:35-43)
29 Jirikiúnmaya̱ wénakui untsurí aents Nin nemariarmiayi. 30 Nui̱ jintiá yantam jímiar ji̱ kusuru pujuarmiayi. Jesus wéawai táman antukar kakantar untsukarmiayi. “Uuntá, úunt akupin Tawitia Uchirí̱nchukaitiam. Waitnentrurta” tiármiayi. 31 Tuíniakui “Takamátsatarum” tútaisha nú naṉkaamas untsumkarmiayi. “Uuntá, Tawitia Uchiri̱yá waitnentrurta” tiármiayi. 32 Tuíniakui Jesus wajas ji̱ kusurun untsukar aniasarmiayi “¿Warí itiurtukat tusarum wakerutarum?” 33 Tutai “Uuntá, iimtiai tusar wakeraji” tiármiayi. 34 Tuíniakui Jesus nin waitnentrar ni ji̱n antiṉkiarmiayi. Nu chichamaik íimiar nisha Jesusan nemariarmiayi.