Juaṉ

Jesus ni unuiniamuri̱n Yusan áujtawai

17 Nuna ti Jesus nayaimpinmaani̱ íimias áujeak “Aparu, yamái jeayi ame Uchiram shiir awajsatin. Túrawakmin ame Uchirmesha péṉker awajtámsamniaiti. 2 Ashí aentsun akupkatin tsaṉkatkaitme. Núja̱i̱ṉkia Nin susamna nú shuaran yamaram iwiaakman tuke amuukashtinian súsaiti.

3 Kame ju̱i̱ti tuke amukashtin iwiaakma. Amek nekas Yúsaitmena nuna tura Jesukrístu Ame akupkámuiti nú nekaatniua nuiti.

4 Ashí túratniun akuptúkmamna nuna amukuitjiai. Túran ju̱ nuṉkanam shiir awajsaitjiame. 5 Nuna túramtai Aparu, ti yaunchu jú̱ nuṉka atsai̱sha Ámiji̱a̱i̱ pujakui shiir awajtúsmamna núnismek yamaisha shiir awajtusta.

6 Ashí jú̱ nuṉkanmaya̱ surusármamna nú shuaran Ámin nekamtikiamjai. Áminiu áiniakui surusármame. Nisha ame chichammin umirtámkaruiti. 7 Ashí Wi takaajna nu Amek surusuitme. Nisha nuna nekaawaru áiniawai. 8 Ame chichamem surusmam nuna ujakam nisha umirtámkaruiti. Ame akuptúkakmin Amiiní̱ya̱ táwitjiai. Nu nekasaiti tu enentáimtuiniawai.

9 Ni yaiṉkiarta tusan seajme. Jú̱ nuṉkanmaya̱ shuaran Ámin enentáimturmainiatsna nuna seattsujai. Antsu Ame surusármamna nuna Áminiu ajasármatai yaiṉkiarta tusan seajme. 10 Ashí Winia ana nuka Áminiuiti. Tura ashí Áminiu ana nuka Wíniaiti. Winia péṉkerusha ni túramuja̱i̱ shiir awajsaiti.

11 Yamaikia Wikia jú̱ nuṉkanam pujuschattajai tura nu shuarka ju̱i̱ pujuartatui. Tuma asamtai Ámiji̱a̱i̱ pujustajtsan winiakui ashí surusármam nuka, Tunaarincha Aparu, ame kakaram náarmiji̱a̱i̱ wáinkiarta. Wisha Ámiji̱a̱i̱ chikichik ájinia núnisaṉ nisha ashí iruntrar chikichik ajasárti. 12 Ju̱i̱ niji̱a̱i̱ pujakun ame kakaram náarmiji̱a̱i̱ ti péṉker wáinkiarmajai. Antsu Yus Chichamnum aarma uminkiati tusa aya chikichik meṉkakaiti. Nisha tuke emesnartinia núiti.

13 Yamaikia Amiini̱ winiajai. Tura ju̱i̱ tuke pujakun Wi warajna núnisar nisha ti shiir warasarat tusan ju̱na tájame. 14 Wikia jú̱ nuṉkanmaya̱nchuitjiai. Nisha núnisaṉ jú̱ nuṉkanmaya̱nchu áiniawai. Tuma asamtai Ame chichammin Wi súsarmatai jú̱ nuṉkanmaya̱ shuarka nin muí̱jkiarmai. 15 Jú̱ nuṉkanmaya̱ ji̱i̱ra̱i̱ tusan seatsjame. Antsu emesmau nin nupetkar yajauch awajsara̱i̱ṉ tusan seajme. 16 Wi ju̱ya̱nchuitiaj áintsaṉ nisha ju̱ya̱nchu áiniawai. 17 Ti nekasa nuja̱i̱ péṉker shiir awajsarta. Ame chichamem imiá nekasaiti. 18 Ju̱ nuṉkanam akuptúkmam áintsanak Wisha nin ju̱ nuṉkanam akupkaruitjiai. 19 Nisha nekasa nuja̱i̱ mátrachu ti shiir ajasárti tusan Wisha mátrachu shiir awajmámsaitjiai.

20 Aya níniunkeka seatainiatsjame antsu ashí ni chichame̱ncha antukar Winia nekas enentáimtursartatna nusha ame yaiṉkiarta tusan seajme. 21 Núja̱i̱ṉkia ashí nisha chikichik ajasárti. Wisha Amesha, Aparu, chikichik ájinia núnisaṉ nisha Iiji̱a̱i̱ chikichik ajasártai tusan seajme. Nuja̱i̱ ju̱ nuṉkanmaya̱ shuar akuptúkuitmena nuna nekaawartatui. 22 Ame páantniuram surusuitmena núnisnak Wisha winia páantniurun súsaruitjiai. Iikia chikichik ájinia núnisaṉ nisha chikichik ajasárti tusan túraitjiai. 23 Amesha Winí̱ init pujakmin tura Wi ni enentái̱n pujakui nisha peṉké chikichik ajasárti. Túramtai Ame akuptúkuitmena tura Winia anenmena áintsam nu shuarsha aneamna nuna ashí shuar nekaawartatui.

24 Aparu, shuar surusmam nu Wi pujustatjana nui̱ pujusárti tusan seajme. Kame ju̱ nuṉká nájanchamunmaṉ tuke anentin asam ti shiir awajtúsuitme. Tura ti shiir awajtúsmamna nuna íisarti tusan nuna seajme. 25 Tí peṉker Aparu ju̱ nuṉkanmaya̱ shuar Ámin nekarmainiatsui. Antsu Wikia nékajme. Núnisaṉ Wí shuarsha ame akuptúkman nékainiawai. 26 Nú shuaran Ame Náarmin nekaawarti tusan jintintiáitjiai tura nu arantcha jintintiáttajai. Núja̱i̱ṉkia Winia anenniuitmena nuka niin atí tura Wisha niin atajai” tú aujsamiayi Jesus.