Isayas
Uunt Yúsnan takarin
42 Ju̱i̱ti Winia takartin anaikiamu yáiṉtatjana nu. Wi anaikiamu asamtai wakantrusha shiir enentáimtawai. Winia wakantrun nin súsaitjiai. Túramu asa nekasa nuja̱i̱ ashí nuṉkan sumamtikiawartatui. 2 Tura chichaaksha kakantar chichakchattawai. Núnisaṉ páasanmasha ántumtikiashtatui. 3 Tura pintiu punuancha kupikchattawai. Núnisaṉ ji kaji̱niuncha ikiajniákchattawai. Antsu nekasa nuja̱i̱ métek sumamtikiattawai. 4 Ju̱ nuṉkanam métek sumamtikiatniuri̱ umiimiam pimpikchattawai núnisaṉ yawe̱tnasha yawe̱rchattawai. Tura nayants yantam pujuinia nuka umiktin chicham Ni akupkámun nákasartatui.* 5 Kame nayaimpin najana ayapá̱ru asa nuṉkancha najana neremtikna núnisaṉ ju̱ nuṉkanam matsatainian mayatkatniun tura iwiaakmancha súana nu Uunt Yus chichaak jú̱nis tawai. 6 “Wi Uunt Yus nekasa nuja̱i̱ métek túrakun untsukmajme. Tuma asan eṉkesan ewekámsattajme. Núnisnak péṉker wainkian ashí aentsja̱i̱ chícham najanamua núnisan apujsattajme ántsamek ashí nuṉká tsáapnintri̱ átatme.* 7 Tura nuja̱i̱ kusuru ainia nusha paant íimtikiartatme nuyá̱ sepunam pujuiniasha ji̱i̱rartatme núnisaṉ kiritniunam sepunam pujuiniasha aṉkant awajsartatme.* 8 Wikia Uunt Yusaitjiai, Winia Naarka nuiti. Tura Winia péṉkeruncha chikichan súsashtatjai núnisaṉ Winia shiir awajtutai̱rja̱i̱ nakumka najanamu yusa nuna shiir enentáimtusara̱i̱ṉ tusan peṉké tsaṉkatkachartatjai. 9 Kame nekaatarum. Emka uminkiatniuya̱ nuka uminkiaiti antsu Wikia yamaram uminkiattana nuna ujajrume. Nusha jeatsa̱i̱ṉ atumniaka emka nékamtikiajrume” túramui Uunt Yus.*