Isayas

Uunt Yus niṉki takarniúri̱n Israeran aṉkant awajsaiti

43 Yamaikia Uunt Yus ámin najatma jú̱nis túramui. Jakupá sapijmiakaip warí Wi sumakuitjiame. Israerá ámeka Wíniaitme tuma asakmin Wi anaikiamjame. 2 Entsá wekakminish Wi ámiji̱a̱i̱ṉkia pujuttajai tura entsá katíakminish ama̱a̱rkachartatui. Jinium naṉkamakmesh esashtatme núnisam ji keaksha áminkia peṉké itiurtámkashtatui. 3 Wikia ámin uwemtikramin Israernumia̱ tunaarincha Úunt Yusaitjiai. Áminkia Ejiptuja̱i̱ yapaji̱áitjiame. Núnisnak Itiupíancha Séwaja̱i̱ amiin surukmajai. 4 Warí Wi iismasha ti shiir enentáimtusar naat awajmáinme. Tuma asakmin aneajme. Tuma asan aentsnasha tura uunt nuṉka mátsatkamu ainia nunasha ámiji̱a̱i̱ yapaji̱áwartatjai. 5 Sapijmiakaip, warí Wi ámiji̱a̱i̱ṉkia pujajai. Kame amé shuarnaka nantu tatainmaya̱n ikiankartatjai antsu áminkia etsa̱ akatainmaya̱n itiattajme. 6 Araki̱a̱ṉka surusta tiártatjai antsu nuṉkaani̱a̱ṉka emetawairap tiártatjai. Winia uchirka jeashtanmaya̱sha nútiksarmek nawantruka nuṉka náṉkata ímiania̱sha ikiatruktarum. 7 Winia naarja̱i̱ untsukarma káunkarua núnaka Winia paant awajtiarat tusan najankarmiajai. Ti nekas Wi najankamu áiniawai. 8 Aents jí̱ntiniaitiat kusurú tura kuíshtiniaitiat empekua núnis ainia nu ji̱i̱rtarum. 9 Ashí aents tura uunt nuṉka mátsatka árumna nusha ashí iruntratarum. Nuya̱sha iincha ¿yaki nunasha ujatmáktaj tura yáunchuya̱ nunasha iincha yaki antumtikramkaj? Wats aents nuna wáinkiaru ikiankatarum tura nuka núniskete tusar chíkich nuna antukar nuka nekasaiti tiartí.*