1 Kurintiunam
1 Wi Pápruitjiai, Jesukrístu akatrámu. Yus nuna wakerak ni akatrámuri̱ atí tusa anaitiukmai. Wi, ii yachi̱ Sústinisja̱i̱, ju̱ papí akupeaji. 2 Ashí Yus shuar Kurintiu péprunam iruntrumna nútirmin ju̱ papin akuptajrume. Átumka Jesukrístuja̱i̱ tsaniṉkiu asarum yusna árume. Atumsha tura ashí shuar Jesukrístun enentáimtuinia nunasha Yus tí peṉker awajsatniun wakerawai. Nincha tura iincha Jesukrístu mái̱ metek Úuntri̱nti. 3 Yus ii Aparí̱ tura ii Uuntri̱ Jesukrístusha waitnentramainia ásar yaintmakarti tuke aṉkant shiir pujustinian.
Jesusja̱i̱ tsaniṉkia pujustin
4 Yusan áujkun yumiṉsan atumín shiir enentáimtajrume. Jesukrístuja̱i̱ tsaniṉkia pujakrumin Yus shiir enentáimturmawai. 5 Jesukrístuja̱i̱ tsaniṉkia pujakrumin Yus atumín ti yáintmawai ashí péṉker ana nu enentáimtakrum tuke shiir chichastinian. 6 Kristu ju̱na túramniaiti tíchamkaji. Ashí yamaikia uminkiayi. 7 Tuma asamtai ashí Yus súramna nu atsumatsrume. Nu túrakrum ii Uuntri̱ Jesukrístu tátin tuke nákarme. 8 Tura iniaitsuk tuke emettamattawai ii Uuntri̱ Jesukrístu támatai atumí tunaari̱n pachischatin. 9 Jesukrístu ii Úuntri̱nti. Niji̱a̱i̱ tsaniṉkia pujusúk tusa Yus achirmákmarme. Tura Ni tana nuna tuke umiktatui.
Yus shuar akantrámu
10 Yatsuru, ii Uuntri̱ Jesukrístu naari̱ pachisan seajrume métek enentáimpratarum tusan. Niisháa niisháa enentáimprairap antsu chikichik enentáiji̱a̱i̱ métek enentáimsa pujustarum. 11 Átum yajauch chicharnaisarum pujarme. Kruí shuari̱ tu ujatkarmatai tájarme. 12 Kame jú̱nis awai, Chíkich “Wi Páprunuitjiai” tuíniawai. Chíkichkia “Apurusnaitjiai” tuíniawai. Chikitcha “Wi Pítrunuitjiai” tuíniawai. Chikitcha “Wi Kristu shuaraitjiai” tuíniawai. 13 ¿Warí, nuiṉkia Kristu akantrámukait. Páprusha krúsnum jarutramkamaashi. Tura Papru naari̱ pachisa imiaimiukaitrum? 14 Atumín untsurí imiaichu asan shiir enentáimjiai. Aya Krispu Káyuja̱i̱ jímiarchiniak imiaimjiai. 15 Núja̱i̱ṉkia shuar “Papru náari̱i̱n imiaimiuitjiai” tíchamniaiti. 16 Maa, nekas Estepanasa shuari̱ncha imiaimjiai tura chíkich wi imiaimiun nékatsjai. 17 Kristu imiakrattia tusa akuptúkchamai antsu uwempratin chichaman etserkat tusa akuptúkmai. Tura ti neka chichainia núnisan chichaatsjai shuar wi shiir chichaamun enentáimprara̱i̱ṉ tusan. Antsu yúpichuch chichaajai Kristu krúsnum jakamuk paant atí tusan.
Kristu Yúsnan paant iniakmawai
18 Kristu krúsnum jarutramkamu étsereaji. Antsu Yus shuarchaka meṉkakatniunam wéana nu “ántraiti nu chicham” tu enentáimainiawai. Antsu Yus shuarti uwempratniunam wéakur “nu chichamja̱i̱ Yusa kakarmari̱ takusminiaiti” tu enentáimji. 19 Núnisaṉ tawai Yus Chicham yaunchu aarma
“Ju̱ nuṉkanmaya̱n ti neka áiniana nuna chichame̱n emesrattajai
tura tí unuimiararu áinianak ántar awajsattajai”*
tawai Yus ni chichame̱n. 20 Iis, ju̱ nuṉkanam uwempratin chicham íruntsuk. Nu chichaman ashí mash Yus ántar awajsaiti. Ti neka áiniana nusha, jintinkiartin áiniana nusha ashí ju̱ nuṉkanmaya̱n unuimiar ti chichastinian nékana nusha, nu shuar mash “wi tájana nuja̱i̱ péṉker pujusam uwemprattame” tu enentáimiainiawai. Tura núnaka mash Yus peṉké ántar najanaiti. 21 Aya ni nékamuja̱i̱ aents Yusan nekaacharmiayi. Núnisaṉ atí tusa Yus túramiayi timiá neka asa. Antsu ashí aentsun Yus ni chichame̱ja̱i̱ uwemtikratniun wakerimiayi. Chíkich “ántraiti” tuíniana nu chichamja̱i̱ṉki Yus Niin enentáimtuinia núnaka uwemtikratniun wakerak túramiayi. 22 Israer shuar “aentsti túrachminian iniakmasta wi nekaataj” tuíniawai. Kriaku shuarsha “ti enentáimsam mash péṉker jí̱i̱kim turuttia wisha métek enentáimprataj” tuíniawai. 23 Antsu iikia Kristu krúsnum jarutramkamuk étsereaji. Israer shuarsha “ju̱ chicham natsantaiti” tu enentáimiainiawai. Israer shuarchasha “ju̱ chicham ántraiti” tu enentáimiainiawai. 24 Tura Yus achikiárma Niniu ajasarat tusa Israer shuarsha Israer shuarchasha mái̱ metek “Kristu krúsnum jarutramak Yusa kakarmari̱ncha ni nekatairi̱ncha paant iniakmasmiayi” tu enentáimji. 25 “Yusa nekatairi̱ ántraiti” tuíniawai aents túrasha imiá nekas péṉkeraiti. “Yusa kakarmari̱sha jeatsui” tuíniawai aents túrasha imiá nekas kakarmaiti. 26 Yatsuru enentáimtumastarum. Yus achirmákmarme Niniu ajastinian tura ju̱ nuṉkanam ti neka ainia núnisaṉ atumíin ti neka íruntsui. Tí akupniusha tí naṉkamakusha atumíin íruntsui. 27 Antsu ju̱ nuṉkanam nékachua núnis ana nuna Yus achikiuiti tí neka nuna iniatsá̱rtinian. Tura ju̱ nuṉkanam kakarmachua núnis ana nunasha Yus achikiuiti kakarma nuna iniatsá̱rtinian. 28 Péejchachincha, nakittsamunchincha, ántrachincha Yus achikiuiti ashí naṉkamantu írunna nuna amuktinian. 29 Núja̱i̱ṉkia chikichkisha Yusja̱i̱ waantu enentáimprachminiaiti. 30 Tura Yus atumín Krístuja̱i̱ tsaniṉ apujtamsaiti. Tura Kristu enentáimtusar Yus nekas nekatai̱ṉkia nekaattaji. Kristu enentáimtakrin Yus shiir enentáimturmaji, péṉker awajtamji tura uwemtikramji. 31 Yus Papinium yaunchu aarma núniskete “Shuar naṉkamantu enentáimprataj tákuṉka ii Uuntri̱ Yus túramun wararsati.”*