Jirimías

Úunt Akupin nekasa nuja̱i̱ métek náka túrin

23 Uunt Yus chichaak “Murikiu wáinnin Winia murikiur matsamtainmaya̱n murikiun ipisak emeṉkárarua nuka aneararti.” 2 Tuma asamtai Uunt Yus Israera Yusri̱ ní murikrí̱n wáinniun chicharuk “Winia murikiur péṉker wáintsuk awakkarum tsakiṉmakrum ipiskáitrurme. Nu túrakrum yajauch túraitrume tura átum nu tura asakrumin Wi íksanak atumín wáitsatniuja̱i̱ asutiáttajrume. 3 Tura Winia murikiur juákarun ashí nuṉkanam tsakiṉmakarmaj nuna ikiankaran ní sa̱a̱kri̱ni̱ṉ ataksha matsasártatjai. Túramka pampaṉkar tí untsurí ajasártatui. 4 Nútiksanak murikiu wáinniuncha apujtusartatjai. Tura nisha péṉker wainiainiam sapijmiainiachuk atakka ashamkachartatui. Núnisaṉ chikichkiksha meṉkakashtatui” tawai Uunt Yus.

5 Uunt Yus chichaak “Tsawant jeamtai Tawit shuarnumia̱n péṉkeran túrinian apujsattajai. Uunt akupin péṉker enentáimtai̱ji̱a̱i̱ akupea asa péṉker túratin tsaṉkatkamua nuna túrak ashí nuṉkanam nekasa nuja̱i̱ métek túrattawai. 6 Tura Ni akuptiatna nu tsawantinkia Jutanmaya̱ shuarka uwemprartatui. Núnisaṉ Israersha aṉkant sapijmiatsuk matsamsartatui. Túramu ásar ‘Uunt Yus ii nekasa nuja̱i̱ métek túrutai̱’ tu anaikiartatui.” 7 Nu arantcha Uunt Yus chichaak “Tsawant jeattana nui̱ṉkia ‘Iwiaaku Uunt Yus Israer shuaran Ejiptunmaya̱ ji̱i̱rarua nu iirui’ tuíniana núnaka atakka peṉké tíchartatui. 8 Antsu Israer shuar tsakiṉmakarma arakaani̱sha tura ashí nuṉkanam matsatainian awakearar ‘Iwiaaku Uunt Yus yajá matsatainian ikiankarua nu iirui’ tiártatui. Túram ni nuṉke̱ni̱ṉ matsamsartatui” tawai Uunt Yus.

Yúsnan ántar etserin kakantrarma

9 23:​9-10 “Yúsnan etserin ainia nuja̱i̱ winia enentái̱rui̱ tí itit nekapeakui ashí winia ukunchrusha kurainiawai. Ni jinti̱ṉkia yajauchiti tura ní kakarmari̱ji̱a̱i̱ṉ naka túrichuiti. Kame núṉkaka aya tsanirmatain ajaschaik. Yumiṉkramu asa aya jú̱nik juakai túruna sa̱a̱k írunna nusha kákaarai. Uunt Yus tura Ni chichame̱ tunaarincha asa nampekua núnikjiai tura winiu áishmaṉka aya̱shí̱n amutar itiurniuit nútikruamtai kúntuts nekaprajai. 11 Yúsnan etserniusha núnisaṉ Yúsnan pujurniusha Yusan enentáimtichu ajasárai. Ímia winia je̱a̱ruí̱sha ni yajauchiri̱n wáitkiaruitjiai” tawai Uunt Yus. 12 “Tura ni jinti̱nkia kiritniunam atajkintrar iniatai̱ átatui. Tura shitiam nui̱ iniarartatui Wi asutiáttajna nu uwí átatna nui̱ṉkia nin yajauchin Wi itiariártatjai” tawai Uunt Yus.

13 “Samarianmaya̱ Yúsnan etserin mui̱jmiainian túruinian wáinkiaitjiai. Paara náari̱n etserainiawai túrawar Winia shuarun Israeran yajá emeṉkátrukaruiti. 14 Núnisaṉ Jerusaréṉnumia̱ Yúsnan etserin mui̱jmiainian túruinian wáinkiaitjiai. Tsanirmainiawai tura waitji̱a̱i̱ wekainiawai núnisaṉ yajauch aentsun yajauchiri̱ya̱ yapaji̱áwara̱i̱ṉ tusa yajauchiniam útsuiniawai. Tuma asa Wíji̱a̱i̱ṉkia ashí nu aentska Sutuma núnin ajasárai núnisaṉ Kumura peprua núnikiarai.” 15 Yúsnan etserin ainia nuna pachis Ashí Akupin Uunt Yus ju̱na tawai “Nekaata. Niṉkia yapan ayurawartatjai túran entsá tséas eṉkeamun árartatjai. Warí Jerusaréṉnumia̱ Yúsnan etserin ainia nuna etserkamuri̱ ashí nuṉkanam tí yajauch pampaṉkai.”

16 Ashí Akupin Uunt Yus jú̱nis tawai “Yúsnan etserin ainia nuna chichame̱ anturkairap. Warí átumka ‘ashí tí peṉkera nuna wainkiattajai’ tu enentáimpratarum tusar ántar ujatmainiawai. Kame ni enentáimsaṉ ímiaja̱i̱k wainkiamuncha ujatmainiawai túrasha nuka Uunt Yusa chichame̱nchuiti. 17 Winia nakitruinia núnaka iniaitsuk chicharainiak ‘Aṉkant pujustatme’ tuíniawai tura niní̱ wakera núnaka chicharainiak ‘Atumniaka itiurchatka tarutrámchartatui’ tuíniawai. 18 ¿Yaki Uunt Yus iruntrar chichamunam pachinkiait tura Ni chichame̱n anturak iisuit? ¿Yaki Ni chichame̱n esetas pujus anturkait? 19 Uunt Yusa kajetáiri̱ naseya núnis ti kakaram winittiawai. Auka nu nase péper péper ajakí̱ ti kakaram ajas Yusan umircha ainia nuna muuke̱n iniantrartatui. 20 Uunt Yusa suíri̱nkia túrutskeka tura Ni enentái̱ wakeramun umitskeka tsaṉkurchattawai. Tura tsawant amúamunmaṉka ti paant nekaatarme. 21 Túrasha wikia Yúsnan etserin ainia núnaka akupkacharuitjiai túramaitiat niṉki tsékeṉkiarmai. Wikia chichascharmajai túramaitiat niṉki etserkarmai. 22 Uunt Yus iruntrar chichamunam Winia chichamprun antukaruitkiuiṉkia winia shuarun winia chichamprun antumtikiara̱a̱yi. Nuyá̱ yajauch jintianmaya̱sha tura yajauch túrutainmaya̱sha awakeara̱a̱jai.

23 Nuya̱ṉka Wikia aya tíjiu̱chiya̱ Yúskaitiaj tura arantka pujuchu Yúsashitiaj tawai Uunt Yus. 24 Ya áentskesha wáitki̱a̱i̱n tusa Winia u̱mprutkamniasha ¿áwak? Nui̱kia Wikia nayaimpinmaṉka tura nuṉkasha takamtsukka piáknaka ¿pujatsjak?” tawai Uunt Yus. 25 “Yúsnan etserin ainia nu Winia náarun ántar pachisar ¡Mesekamprajai, mesekamprajai! tusar wait chichaman etserainiana nunasha anturkaruitjiai. 26 Maa, Yúsnan etserin ju̱ túrunattawai tusar wáitian etserainiak anaṉkartuatai tusar ní enentáimmianak etserainiana nuna enentái̱sha ¿urukutsuk ainia? tura nunasha ¿urutáitsuk iniaisarat? 27 Núja̱i̱nchuka mesekrampramuri̱n ni tsaníakmari̱n ujainia nuja̱i̱ yaunchu ni uuntri̱ Páaran enentáimtuiniak Wíniaka kajinmátrukiarmia nútiksaraṉ Wí shuarnaka ¿Winia náarun kajinmamtikiartaj tusaraṉ wakeruiniá? 28 Yúsnan etserin ainia nu ni mesekrampramuri̱n étserkuṉka etserkarti. Antsu Winia chichamprun nekas etserniuitkiuṉka nekasa nuna tímiatrusaṉ etserkati.” Túrasha Uunt Yus chichaak “Trikiu péṉkeri̱ji̱a̱i̱ tura tsuátri̱ji̱a̱i̱sha ¿warí nusha íistiniaitiaj?” tawai. 29 “Kame Winia chichampruka jiji̱a̱i̱ tura martiyu kayan tsayana núja̱i̱ṉkia métekchakait. 30 Tuma asamtai nekaatarum, Yúsnan etserin Winia chichamprun nuamtak mai̱ kásarnai ajainiana nuna yamaikia kajerkarjai” tawai Uunt Yus. 31 “Wats iisiana, Yúsnan etserin yuminchin chichasar ‘Uunt Yus tawai’ tusar ní chichame̱nak etserainiana nuna yamaikia kajerkarjai. 32 Wats ju̱sha nekaata tawai Uunt Yus. Kame Yúsnan etserin mesekar wait ainia nuna etserainiak ni waitri̱ji̱a̱i̱ yuminchin chichasar Winia shuarun awajimtikiainia nuna yamaikia kajerkarjai. Warí Wikia akuptancha akupkacharuitjiai núnisaṉ warí péṉkernaksha jú̱ peprunka peṉké itiarchartatui” tawai Uunt Yus.

33 “Tura jú̱ pepruksha tura Yúsnan etserniuksha núja̱i̱nchuka Yúsnan pujurniuksha anintrutmak ‘¿Jú̱ túrunattawai Uunt Yus tana nusha tuit?’ takui̱sha chicharkum ‘Jú̱ túrunattawai’ tana nuka átumetrume tuma asamtai atumniaka ajapa iniaisattajrume” tawai Uunt Yus. 34 “Kame Yúsnan etserin tura Yúsnan pujurin núja̱i̱nchuka yaaksha chichaak ‘Ju̱ etserkata Uunt Yus túrutui’ tákui̱ṉkia nú aishmaṉnaka jé̱e̱ntuk Wi asutiáttajai. 35 Tura aṉkant aṉkant ni yachi̱nkia núnisaṉ ni tsaníakmari̱ncha jú̱nisar tiártatui. ‘¿Uunt Yussha warinia chichaká?’ ‘¿Warintia aimkia?’ 36 Túrasha yamaikia ‘Ju̱ etserkata Uunt Yus túrutui’ títinkia atakka peṉké enentáimprashtatrume. Kame yaaksha nuna tákui̱ṉkia ní chichame̱nak kijin entsaktinia núnis awajtústatjai. Warí, aentsu chichame̱sha Uunt Yusa chichame̱ ¿áminkiait? Átumka ii Yusri̱ Ashí Akupin Uunt Yus Iwiaaku Yusa chichame̱ natsanmai̱ awajearme. 37 Tura Yúsnan etserniuka jú̱nisrum títiatrume. ‘¿Uunt Yussha warinia chichaká? ¿Warintia ái̱rmaka?’ 38 Túrasha chichaakum ‘Ju̱ etserkata Uunt Yus túrutui’ tusam Uunt Yus ju̱na tawai tákumka nuka tiirap tamaitiatrum nú tiniu asakrumin 39 atumniaka peṉké kajinmátkin tura péprun amasmajrumna nunasha ajapan iniaisattajrume. 40 Túrunawakrumin tuke mui̱jtiai̱ tura tuke natsanmai̱ awajtai̱ awajsattajrume. Túrasha nuka peṉké kajinmátnakchattawai” tawai Yus.