Juup

Juup Uunt Yusan ai̱kma

42 Juup Uunt Yusan aya̱k

Juup ni amikrí̱n Yusan seatmia

7 Uunt Yus Júupan nu chichaman tuasua umik Uunt Yus Temannumia̱ aentsun Eripiásan chicharuk “Ámin, jimiará amikrumji̱a̱i̱ Winia takartin Juup enentáimturna ímiatrus enentáimtursarum chichascha asakrumin kajerkajrume. 8 Yamaikia Juupai̱ wetarum tura wéakrum waaka uchirí̱ siati nuyá̱ murikiu uchirí̱sha siati jukitiarum. Tura nuna maa áesturmak atumín seatramarti. Niṉkia nekas anturkattajai. Antsu nuiṉkia átum winia takartin Juup enentáimturna tímiatrus winia péṉker chichartukcha asakrumnisha yajauchikia awajkashtatjarme.” 9 Tura nuna takui̱ Temannumia̱ Eripiássha, Suánmaya̱ Pirtatcha tura Naamannumia̱ Supaarsha Uunt Yus timia nuna umikiar wéarmiayi. Tura Juup Uunt Yusan seatiarmia nuna anturkamiayi.

Yus Júupan péṉker awajsamu

10 Nuyá̱ Juup ni amikrí̱n seatmia nui̱ ni wáitiamuri̱ya̱ Uunt Yus ayamtikiar tura yaunchu ni warirí̱n takakuya núja̱i̱sha naṉkaamas ataksha susamiayi. 11 Antsu nuiṉkia ni je̱e̱n yachi̱sha umai̱sha tura yaunchu ni amikrí̱ armia nusha káutkar niji̱a̱i̱ métek yurumáwarmiayi. Nuyá̱ nin Uunt Yus tí waitsatniun tsaṉkatkamia nuna enentáimtusar atsaṉkrar ni shuari̱ armia nu kuítniasha tura uwejnum kuri awetai̱ncha súsarmiayi. 12 Tura Yus Júupan ni iwiaakmari̱ iniaṉnamu tsawantai̱ ataksha péṉker pujutnum yumiṉkiak emka pujusmia nuna naṉkaamas shiir awajsámiayi. Warí, nuiṉkia murikrí̱sha katurse mir, kamiyuri̱sha sais mir tura jimiará waakaja̱i̱ nuṉka pukutaiṉkia mir tura umpururi̱ṉkia mir ármiayi. 13 Nuyá̱ uchirí̱nkia siati áishmaṉkan tura menaintiú nawantri̱nniuyayi. 14 Nawantri̱ iwiá̱i̱ náari̱ṉkia Jimimauyayi tura patai̱ṉkia Sesea náartiniuyayi nuyá̱ nuna patai̱ṉkia Kiriniapúkauyayi. 15 Ashí nuṉkanmasha Juupa nawantri̱ya imianú shíirmaka peṉké atsumiayi. Juup ni uchirí̱n áishmaṉnasha tura nuwa̱ncha ni warirí̱n akantúr métekrak súsarmiayi. 16 Juup ataksha siantu kuaraintia uwí pujusmiayi. Tuma asa tiraṉki̱ncha tura nuyá̱ tiraṉki̱ncha wainkiamiayi. 17 Nuyá̱ peṉké weamas jakamiayi.*