AENTS WAKETRUKIM IYUTA
AKANKAMU 9
Waitnenkratin ata
Yuusa chichame jintinkratma: “Warainia nuja̱i̱ warastarum. Kúntuts pujuinia núja̱i̱sha úttiarum” (Rum. 12:15).
Jesús warinia turamia
1. VIDEO iista turutskesh Márkus 6:30-34 aujsata. Turam ju anintramu aimkiata:
Jesús ni unuiniamurijiaisha urukamtai yaksha atsuiniamunam wetinian wakeriarmia?
Jesús untsuri aentsun wainiak Yuusa chichamen urukamtai ujakmia?
Jesús turamia nuna wari nekaamniaitiaj?
2. Aents waitnentainiakrikia aya Yuusa chichame etserkatin enentaimchattaji antsu yaintasar wakerittiaji.
Jesusa aintsamek najanata
3. Amamkesam anturkata. Aents chichakuinkia tsurintsuk amamkesam anturkata. Aents warinkish takuinkia turutskesha ni enentaimian ujatmakuinkia anturtsuk iniaisaip. Amamkesam antureakminkia nekas yaintasam wakeramna nuna aentscha nekamattawai.
4. Aents yaintin enentaimsata. Aujmattsarumna nui enentaimsam juni animiasta:
Nu aentscha urukamtai Yuusa chichamen penker nekaatniuit?
Yuusa chichamen unuimiakka yamaisha tura ukunmataisha uruksan pujumniait?
5. Nin yainminia nu jintintiata. Ni nekaattsa wakeramun Yuusa chichamen unuimiak itiur nekaamniait nu warik jintintiata.