Ii yachi ii umaijiaisha shiir amajnaisar matsamsatniuitji

1, 2. Jehovasha imiankaska warinia turawarat tusa wakeriniait?

Jehovaka ashi aentsun shiir amajsarat tusa wakerawai. Ii ayashi aneajnia aitkiasan chikich aentscha aneastinian Jesús jintintramamiaji (Mat. 22:​37-39 TNM). Jehovan enentaimtuiniatsna nusha aitkiasrik shiir amajsatniuitji. Nu turakrikia Jehová turiniana aitkiasrik turattaji. Ninkia yajauch aentsnumsha penker aentsnumsha etsajai tsaapin awajeawai aintsan yumincha yutumtikiui (Mat. 5:45).

² Jehovaka ashi aentsun anenaiti tumaitkiusha nin umirainiana nuna nekaska ti anenaiti (Juaṉ 14:21). Ninkia wiya aintsan turin arat tusa wakeriniaiti tuma asa waitnennairum mai anenai ajatniuitrume tawai (1 Pit. 4:8; Rum. 12:10). Yaksha ii shuar ti aneajnia ainis aneastinian turutskesha ii amikri aneajnia ainis anenaistinian tawai.

3. Tuke mai anenai ajattsar wari turatniuitiaj?

³ Kristu aents armiania nuna Pablo junis timiayi: “Nuamtak yachi̱a núnisrum tuke mái̱ anenai ajatarum” tu timiayi (Isr. 13:1). Anenaiyamuka arak aratniua aintsankete. Arak aramu tsapakat tusar tuke ipiamtainti. Aintsan ii yachi ii umaijiai tuke mai anenai ajattsar kakartiniaitji. Jehovaka tuke mai anenai ajarat tusa wakerawai. Ii yachi ii umaisha urukamtai aneastiniaitiaj tura ainis turatai tusar wari turatniuitiaj nuka ju unuimiateamunam nekaattaji.

URUKAMTAI II YACHI II UMAIJIAISHA MAI ANENAI AJARTINIAITIAJ?

4. Yus Kanta 133:1 tana aintsan ii yachijiai iruntrar pujustin kajinmatkij tusar wari itiurkatniuitiaj? (Nakumkamusha iista).

⁴ (Yus Kanta 133:1 aujsata). Salmo papiin aaru junis timiayi: “Íiskuana, urutmá péṉkerait tura wakerú ajamainchukait nuamtak yachi̱ji̱a̱i̱ iruntrar chikichik enentáiji̱a̱i̱ pujusártinkia” tu timiayi. Yamamtaikkia tuna wajaku iijat nekapminiaitji tura tsawan nankaamakar weakui iiyakrisha pachischamniaitji. Aintsankete ii yachijiai yamamtaikkia iruntra pujamuka nuka penkeraiti timiniaitji. Turasha tsawan nankaamakar weakui ainis enentaimmiaka kajinmatkimniaitji. Ii yachi wainkiar itiur enentaimtusmiaj aitkiasrik enentaimtuki wetasar wari itiurkatniuitiaj? Iikia ii yachinkia imia penker ainiawai iruntramunmasha aintsan ainiawai tu enentaimtusartiniaitji.

5. Testigo de Jehovati mai anenai ajamun wainiainiak yama Yuusa chichame unuimiainiasha urukawarminiait?

⁵ Yama iruntainiam wear mai anena ajainian wainiainiaka juka nekas religionkash tumainti tiniu ainiawai. Jesús junis timiayi: “Anenaiyakrumni̱ṉkia nuja̱i̱ ashí shuar ‘Kristu unuiniamuri̱ áiniawai’ turamartatui” (Juaṉ 13:35). Carlaa naartin uunt unuimiatnum unuimia pujus Yuusa chichamen unuimiatan nankaamamiania nunanu nekaattaji. Uunt tuakmanum ipiam ayu winittiajai timiayi tura uunt tuakmanum pachiniak junis timiayi: Winia apar nukurkesha miniakruscha ainiawai, yamatain nukap miniakrukarmatai Jehová nekas anentana nuna nekaamjai, wisha jui pachitkia atasan wakerajai timiayi. Carlaka Yuusa chichamen unuimiatar 2024 uwitin imianmiayi. Yuusa chichame yama unuimiainiaka ti penkerana nu najankurin tura mai anenai ajamun wainiainiak Yuusna takakmastasa wakerin ainiawai (Mat. 5:16).

6. Ii yachi ii umaijiai shiir amajnaisar pujakrinkia nisha itiurtamkartataj?

⁶ Ii yachi ii umaijiai shiir amajnaisar pujakrikia penker pujuttaji. Pablo Kristu aents armiania nuna junis timiayi: “Kame kashinkia yajauch túramuja̱i̱ anaṉnam enentáimin Yusna nakitrashtapash. Tuma asamtai yamaik tura ashí tsawant ikiakánairtarum” tu timiayi (Isr. 3:13). Yuusnum majat ajasakrincha Jehovaka ii yachi ii umainkesha ikiakakratkat tusa utsukminiaiti (YKan. 73:​2, 17, 23). Ii yachi ii umainsha ikiakatmainiakrin kakarminiaitji.

7. Mai anenai aja asar uruksaria matsateaj? (Colosenses 3:​13, 14 TNM).

⁷ Mai anenai ajattsar kakainiana nui iisha irutraji tuma asar penker pujuwitji (1 Juaṉ 4:11). Anenaiya asar tsankurnainiaitji ainis turakur iruntrar matsamniuitji (Efes. 4:​2-6 TNM; Colosenses 3:​13, 14 TNM aujsata). Tuma asar ii iruntairincha ti penker iruntrar nankaamawitji, chikichniumka ainis iruntrar ti penker nankaamachu ainiawai.

SHIIR ENENTAIMTUNAISARTAI

8. Iruntrar matsamsarat tusa Jehovasha itiur yainmaj?

⁸ Tunaartiniaitiatar Jehová yainmakrin ashi nunkanmaya ii yachi ii umaijiai iruntrar pujuwitji (1 Kur. 12:25). Yuusa chichamenka junis tawai: “Warí, imia Niṉki Yus atumín mái̱ anenai ajatniun jintintrámawarmatai nékarme” tu tawai (1 Tis. 4:9). Yuuska shiir amajnaisar matsamsatai tusar wari itiurkatniuitiaj nuna turameaji. Iikia Jehová jintintruat tusar wakerin asar ni tana nu umirniuitji (Isr. 4:12; San. 1:25). Testigos de Jehovatikia Jehová umirkattsar kakaaji.

9. Rúmanam 12:​9-13 nuisha shiir enentaimtunaistinniasha wari ta?

⁹ Yuusa chichamesha ii yachi ii umaijiai shiir amajnaisar pujustinniash itiur yainmaj? Rúmanam 12:​9-13 (aujsata) nui Pablo nuna aujmattsamiayi. Ii yachi ii umai shiir enentaimtuinia asar warinkisha turatniuitiajnia nuna Pablo timiayi. Ii yachi ii umai shiir enentaimtuinia asar awajirarmataisha tsankuratniuitji tura nijiai tsanka arminiaitji (Ipi. 4:32). Chikich shiir enentaimtursarat tu enentaimtsuk ii nekaska ii yachi ii umai shiir enentaimtuinia asar warinkisha turatniuitji. Nu turakrikia Jesús timiania aintsan yaksha warinkish amajnia nujaisha nankaamas antsu suakur imiankaska warastatji (Tur. 20:35).

10. Yaksha utsuma nekarkia itiurkatniuitiaj? (Nakumkamusha iista).

¹⁰ Shiir enentaimtunaistiniaitji Pablo timiania nui arusan junasha timiayi: Nakimtsuk takakmastarum tu timiayi. Takakmastinian wakerinkia wara warat ajawiti tura takatan najanat tusa suamsha penker takakmawiti. Nekatai̱n Jintinkiartin 3:​27, 28 nui junis tawai: “Shuar nekas atsuma, yáiṉtin jeakmeka nakittsuk yaiṉtá” tu tawai. Ainis asamtai yaksha utsuma nekakrikia yaintiniaitji, chikich tsawantin yaintajai turutskesha chikich yainchartimpiash tu enentaimsashtiniaitji (1 Juaṉ 3:​17, 18).

11. Iruntrar matsamsattsar itiurkatniuitiaj?

¹¹ Chikich shiir enentaimtiniaitkiurkia kajertamainiakrincha warikmasar tsankurartiniaitji. Ipisiunam 4:​26, 27 junis tawai: “Kame tsawant takamtsuk nú kajekmaja̱i̱ pujursaip. Iwianchi uuntri̱ yajauch awajtámsatin tsaṉkatkaip” tawai. Jehovaka ni chichamenka tsankurartiniaitji tawai. Colosenses 3:13 TNM nui turamji: “Shiir enentaijiai mai tsankurnai ajatarum”. Ii yachi ii umai awajirarmataisha tsankureakrikia nijiai shiir amajnaisar pujuartatji. Ainis turakrinkia Yuusa kakarmarinkia chikichki ainis iruntrarat tusa yainmaktatji (Efes. 4:3 TNM). Tsankurnaiyakrikia penker iruntrar matsamsattaji.

12. Tsankurnairarat tusa Jehovasha itiur yainmaj?

¹² Yaksha itiurchat amajtusu tsankuratin itiurchat aminiaiti tumaitkiusha Yuus yainkratkui ainis turamniaitji. Waitnennairatniuitrume tura takakmau atiniaitrume nuna tinia Yuusa chichamenka junasha tawai: Warinkisha turatniun Yuusa kakarmari yainmaktarum tu tawai. Yuusa kakarmari yainmakrin waitnenkratin tura wakerusmajai tsankukratin atatji (Romanos 12:11 TNM). Tuma asar Jehová ni kakarmarin sukartusat tusa seawitji (Luc. 11:13 TNM).

YAKSHA ITIURCHAT ENENTAIMTIKSAIRAP

13. Wari urukamtaiya itiurchat enentamtunaiyamniaitiaj?

¹³ Kristu aentstikia chikich chikich irutraji (1 Ti. 2:​3, 4). Chikich chikich irutra asar iwiarmamkursha metekcha iwiarmampramniaitji. Nuyasha tsuamakrisha metekcha warijiainsha tsuamarminiaitji. Nuyasha warinkisha najankur warastai takursha metekcha najanniuitji. Warinkisha metekcha najanin asar itiurchat enentaimtunaisminiaitji (Rum. 14:4; 1 Kur. 1:10). Yuuska mai anenai ajatniuitrume turameaji tuma asamtai chikichjai iismaka ii najaneajnia nu timia penkeraiti tu enentaimchaitji (Jir. 2:3).

14. Wari turattsaria kakartiniaitiaj?

¹⁴ Kristu aentstikia itiurchat enentaimtunaisaij tusar ikiakanairtiniaitji (1 Tis. 5:11). Yuusnumia aran ajasar pujuiniasha turutskesha jiikmia pujuiniasha yamaipiattaku Jehovai waketkiaruiti. Ainis turawaru asarmatai iikia warasmajai shiir amajainiaji (2 Kur. 2:8). Ii umai 10 uwi Yuusnumia aran ajas puja iruntainiam we junis timiayi: Mashiniu warasmajai amikmatawarmayi tu timiayi (Tur. 3:​19, 20). Ainis warasmajai amikmam ii umaisha itiur enentaimsamia? Ni junis tawai: Waras pujusat tusa Jehová ataksha yaintiun nekaamamiajai tu tawai. Kristu aents ainiana nu ikiakartai tusar warinkish turakrinkia itiurchat nankaamainiana nuna ikiakararat tusa Jesús yainmakminiaitji (Mat. 11:​28, 29).

15. Chikich shiir enentaimtiksatai tusar chikitcha wari turatniuitiaj? (Nakumkamusha iista).

¹⁵ Ii tajinia nujaisha chikich Kristu aents shiir enentaimtiksatniuitji. Apatkun iniareaka narukiash tusa amamkes iiniaiti. Aintsan iin anturtamainiajnia nu iikiakartai takurkia ii titiatajnia nu penkerashit tusar amamkesar enentaimsatniuitji (YKan. 141:3; Ipi. 4:29).

16. Ya nekassha chikich aents shiir enentaimsamnian chichasartiniait?

¹⁶ Nekaska nuatka ainiana nu tura uchirtin ainiana nusha shiir enentaimtiksamnian chichau artiniaiti (Kurs. 3:​19, 21; Tit 2:4). Uuntri anaikiamu ainiana nusha Kristu aents ainiana nuna ikiakainiak shiir enentaimtiksarminiaiti (Is. 32:​1, 2 TNM; Kar. 6:1). Itiurchat nankaamakrin yaksha ni chichamejai ikiakatmakrin shiir enentaimsamniaitiajnia nuna Yuusa chichame aujmatui (Neka. 15:23).

NEKAS ANENAISARTAI

17. Ii yachi ii umai nekas aneastasar wari turatniuitiaj?

¹⁷ Apóstol Juan junis timiayi: “Uchiru, aya chíchamja̱i̱ṉ anenain áchatniuitji antsu nekas aneniakur péṉker túrar yáiniaiktiniaitji” (1 Juaṉ 3:18). Ii yachi ii umainkia nekas aneasartiniaitji. Ii yachi ii umaijiai iruntrar nankaamakrikia ni ti aneasartatji. Iruntainiam tura Yuusa chichame etsermanum nijiai iruntrar nankaamastasar warinkish turawartai. Nuyasha ni jeen weri iiyuttsar tsawan ankatniuitji. Ainis turakrinkia “Warí, imia Niṉki Yus atumín mái̱ anenai ajatniun jintintrámawarmatai nékarme” tu turamiartatji (1 Tis. 4:9). Nuyasha “Íiskuana, urutmá péṉkerait tura wakerú ajamainchukait nuamtak yachi̱ji̱a̱i̱ iruntrar chikichik enentáiji̱a̱i̱ pujusártinkia” tu titiatji (YKan. 133:1).