AKANKAMU 41
Tsaninkiar tumatniun Yuusa chichame warintiua?
Tsaninkiar tepesar tumatain aujmattsatniun nakitniusha iruneawai. Tumaitkiusha Yuusa chichame nuna aujmateakka arantamujai paant aujmateawai. Yuusa chichame nuna aujmatu yainmaji. Yuusa chichamenka Yuusa enentai asa ainis paant aujmateawai. Ii najanmajai itiura waramtiksamniaitiaj nuna jintintrameaji. Nuyasha wari turakria tuke iwiaku pujumniaitiaj nunasha jintintramji.
1. Tsaninkiar tumatniuncha Jehovasha wari ta?
Tsaninkiar tumatniunka Jehová tsankamkaiti. Aishman nuwajai penker nuatnaikiaru ainiana nu tsaninkiar tumawarat tusa tsankatkaiti. Tura uchincha yajutmararminiaiti nuya anenaisarminiaiti. Tuma asamtai Yuusa chichame junis tawai: “Natsa asam nuwem wainkiamamna nujain warasta” (Proverbios 5:18, 19 TNM). Jehovaka Kristu aents nuatkaru turutskesha nuatnaikia ainiana nuka anannaiyawarain tusa nakitiawai. Kristu aentska penkesha tsanirmashtiniaiti (Israernum [Hebreos] 13:4 aujsata).
2. Wari turakria tsanirmatain?
Ashi tsanirma nusha Yuus ju nunkan iwiarattana nui penke wayashtin ainiawai tawai Yuusa chichame (1 Kurintiunam 6:9, 10). Yaunchuk Yuusa chichame aararmia nuin griego chichamjainkia tsanirmamun junis tiarmiayi: pornéia. Pornéia tana nuka juna aujmatuk tawai: 1) nuatnaikiachiat tsanin tepesar tumainiamun,a 2) mai aishmankak turutskesha mai nuwaksha tsanin tepesar tumainiamun, 3) yajasmajai tsaninkiar tumamu. Tsanirmatin kishmakrikia Jehová waramtiksattaji tura iisha penker pujuttaji (1 Tisarúnikianam [1 Tesalonicenses] 4:3).
PENKER NEKAATAI
Tsanirmawaij tusam wari itiurkatniuitiam nu nekaatai. Yajauchia nu najanchakmeka itiur pujuttam nusha nekaatai.
3. Tsanirmatin nakitrata
Yuusa umirin José yajauchia nuna najanawaij tusa kakarmiayi. Náṉkammari̱ [Génesis] 39:1-12 aujsarum juna aujmattsatarum:
José urukamtai jinki tsekenmia? (Akantramuri 9 iistarum).
José penkerak najanamia? Urukamtai tush enentaimiam?
Natsamaru ainia José turamia nunisan warinia turawartiniait? VIDEO iistarum.
Jehovaka tsanirmawarain tusa nakitiawai. 1 Kurintiunam 6:18 aujsarum juna aujmattsatarum:
Itiura tsanirmatnum iniarminiaitiaj?
Tsanirmawaij tusam wari itiurkatniuitiam?
4. Yajauchiniam iniaraij tusam kakarta
Tsanirmawaij tusar kakakrisha wari itiurchatan wainkiamniaitiaj? VIDEO iisrum juna aujmattsatarum:
Ii yachi tsanirmawaij tusa warinia itiurkamia?
Kristu aentscha yajauchin enentaimsaij tusar kakarartiniaiti. Yajauchia nui enentaimsaij tusam amesha wari turatniuitiam? Jiripiusnum [Filipenses] 4:8 aujsarum juna aujmattsatarum:
Warinma enentaimsatniuitiaj?
Yuusa chichame aujeakur nuya Yuusna takakmakur tunaanum yupichuch iniartajiash? Amesha warintia enentaimiam?
5. Yuus turamjinia nuka iin yainmaji
Jehovaka itiur penker pujusminiaitiaj nuna nekawai. Yajauchia nu najanchakrikia itiur pujuttaj nuna turameaji. Tura yajauchia nui iniararain tusa wari itiurkamniaitiaj nunasha turameaji. Nekatai̱n Jintinkiartin [Proverbios] 7:7-27 aujsarum VIDEO iistarum. Turarum juna aujmattsatarum:
Aishman natsa itiur itiurchatnum enkemkamia? (Nekatai̱n Jintinkiartin [Proverbios] 7:7-9 iistarum).
Nekatai̱n Jintinkiartin [Proverbios] 7:23, 26 tana aintsan tsanirmarkia itiurchatnum enkemtainti. Tsanirmashkurkia wari itiurchata wainkiashtataj?
Tsanirmashkurkia uruma nuisha tui pujuttaj?
Yuusa chichamen mai aishmankak turutskesha mai nuwak nuatnaikiachartiniaiti tana nuka penkerchaiti tiniusha irunainiawai. Tumaitkiusha Jehovaka anenkratin asa penker pujusar tuke iwiaku pujusarat tusa wakerawai. Tuke iwiaku pujutaj takurkia Yuus tana nu umiktiniaitji. 1 Kurintiunam 6:9, 10 aujsarum juna aujmattsatarum:
Mai nuwak turutskesha mai aishmankak nuatnaikiamu aya nukeash Yuusjai yajauchit?
Yuus waramtiksatai tusarkia yapajniakir wetiniaitji. Yapajniaki wetasar kakamuka antrachuiti. Yus Kanta [Salmo] 19:8, 11 aujsarum juna aujmattsatarum:
Yuus tana nu amijiaisha penkerashit? Urukamtai tu enentaimiam?
Jehovaka yajauchin najanin ainiancha, ni chichamen umikiarat tusa yainkiaruiti. Amincha yainmakminiaiti.
CHIKICHKIA JUNIS TINIU AINIAWAI: Penker nuatnaikiachuitkiusha anenainiakka tsaninkiar tepesarminiaiti. Nuka yajauchichuiti.
Amesha warintia enentaimiam?
WARI NEKAAM
Jehovaka aishman nuwan penker nuatak tsanin tepesat tusa tsankatkaiti.
Awakeasrik nekaatin
Wari najankuria tsanirmatain?
Tsanirmawaij tusar wari turamniaitiaj?
Yuus tana nu umiakrikia itiur pujuttaj?
NUKAP NEKAATA
Aishmanka nuwan penker nuatak pujusat tusa Yuuska wakerana nu nekaata.
Nuatnaikiachuitiatar tsaninkia pujamun Yuusa chichamencha wari ta? (jw.org nui aarma irunu)
Mai aishmankak turutskesh mai nuwak tsanirmachartiniaiti takursha kajerakur tatsuji urukamtai taji nu nekaata.
Mai aishmankak turutskesha mai nuwak anenaiyamu yajauchiashit? (jw.org nui aarma irunu)
Tsanirmashkurkia itiur pujuttaj nu nekaata.
Tsaninkia tepesar wenunmani turamu yajauchiashit? (jw.org nui aarma irunu)
Mai aishmankak tsanirmau Yuusan waramtiksamij tusa yapajniatniun wari yainmia? Ni aujmattsamu nekaata. Aranturkarmiayi tana nui aujsata.
Yuusa chichamen nekaawar yamaikia penker pujuiniawai (La Atalaya, 1 de abril 2011)
a Tsanirmamuka jusha aminiaiti: tsaninkia tepesa turunaitin, nuya wenunmani turutskesha tsumunmani turatin, nuya yajauch enentaimsar ayashi takarsatin.