AKANKAMU 37
Takat tura kuitcha itiur iistiniaitiaj?
Takatnum turutskesha kuitnium enentaimkium ti itiurchat enentaimsakaitiam? Ii utsumamu waitmaktin tura Jehová penker enentaimtustin yupichuchichu aminiaiti. Wari itiurkatniuitiaj nuna Yuusa chichame penker jintintrameaji.
1. Yuusa chichame takatnancha wari ta?
Yuuska takakmainiak warasarat tusa wakerawai. “Aentska [...] penker takakmak warakka nuka ti penkeraiti” ainis tawai Yuus papii (Eclesiastés 2:24 TNM). Jehovaka ti takakmawai. Iisha penker takakmakur Yuus urukuit aintsan najanji nuyasha shiir enentaimiaji.
Takakmastinkia penkeraiti, tumaitkiusha aya takatak pujureakur Yuusna nu najanatin kajinmatkishtiniaitji (Juaṉ 6:27). Yuusna nu emka najankurninkia Yuuska ii utsumajnia nuna amastatji.
2. Aya kuitniunman enentaimsatniuashit?
Aentska ni kuitrijiai ayamprumawiti tura aintsan aya kuitjiainkia warasar pujuschamniaiti tawai Yuus papii (Nekatai̱n Jintinkiartin [Proverbios] 10:15). Nuyasha kuit aneaschatniuitji tura ii takakeajnia nujai shiir enentaimsar pujustiniaitji ainisha turamji (Israernum [Hebreos] 13:5 aujsata). Ii takakmajai warasar pujakrikia nukap takustaj tu enentaimchattaji, nuyasha antrar tumashmakchattaji (Nekatai̱n Jintinkiartin [Proverbios] 22:7). Tura kuit achirmaktaj tusar nakuruschatniuitji nuyasha kuitian warik waitmaktaj tu enentaimsashtiniaitji.
3. Kuitjiaish wari itiurkamniaitiaj?
Yuuska tsankaiti. Ii takakma chikich ajameakur Yuus urukuit nunisrik tsanka atatji (1 Timiutéun 6:18). Iruntramurin kuitjiai yaimkiamniaitji, nuya utsumainiana nu yainkiarminiaitji. Nekaska ii yachi ii umai utsumainiakuinkia yainkiartiniaitji. Jehovaka urutma suaj nunaka iiyatsui antsu wari enentaijiainia suaj nuna penker iiyawai. Nekas enentaijiai suakrikia wara warat suaji nuya Jehovasha waramtiksattaji (Túramuri̱ [Hechos] 20:35 aujsata).
PENKER NEKAATAI
Aya takatnuman enentaimchakrikia nuya ii takakmajain wara warat enentaimiakrikia itiur pujuttaj nu nekaatai.
4. Penker takakmakum Jehová paant ujukata
Jehovajai penker pujakmeka penker takakmastatme. VIDEO iisrum juna aujmattsatarum:
Jason turania nu warimpia penker iisum?
Takakmayat warinia turiniuya?
Kurusenam [Colosenses] 3:23 aujsarum juna aujmattsatarum:
Urukamtai asump enentaijiai takakmastiniaitiaj?
Takakmastin penkeraiti tumaitkiusha nekaska Jehová emka enentaimtustiniaitji.
5. Ii takakmajain warasar pujakrikia urukattaj?
Aentska kuitian nukap ikiaunkatniun wakerincha iruneawai. Tumaitkiusha Yuus papiinium nu aitkiawairap turameaji. 1 Timiutéun 6:6-8 aujsarum juna aujmattsatarum:
Yuusa chichamen warintia jintintrameaj?
Kuit nukap achiakchakrisha warasar pujusminiaitji. VIDEO iisrum juna aujmattsatarum:
Kuitian nukap achiakainiashkusha urukamtai waras pujuinia?
Kuit achiakeatar ti nukap takustasar wakerakrisha Jesús ainis enentaimmia penkerchaiti tusa apatak aujmattsamiayi. Rúkas [Lucas] 12:15-21 aujsarum juna aujmattsatarum:
Jesús apatak aujmattsamia nu warinia jintintrameaj? (Akantramuri 15 iistarum).
Nekatai̱n Jintinkiartin [Proverbios] 10:22 aujsarum 1 Timiutéun 6:10 nui tana nujai apatka iistarum. Turarum juna aujmattsatarum:
Warimpia imia penkerait, Yuusa amikri atiniak turutskesha kuit nukap takustiniak? Urukamtai tu enentaimiam?
Kuit ti wakerakur urukattaj?
6. Jehovaka ii utsumamun amastatji
Takat tura kuit wainkiatin yupichuchichuitkiui Yuus enentaimtustincha itiurchat aminiaiti. Nu itiurak nupetkamniait nu nekaatai tusarum VIDEO iistarum. Turarum juna aujmattsatarum:
Aents wari itiurchatna wainkiamia?
Itiurchata wainkiasha warinia turamia?
Matéu 6:25-34 aujsarum juna aujmattsatarum:
Yuusna emka najaneakrinkia nisha itiurtamkattaj?
CHIKICHKIA JUNIS TINIU AINIAWAI: Kuitian waitmaktasan takakmastiniaitjiai tuma asan iruntramunam wetinian jeatsjai.
Jehová emka enentaimtustinian penkeraiti tama Yuusa chichamen tuimpia aujsaitiam?
WARI NEKAAM
Takat nuya kuit waitmaktin penkeraiti tumaitkiusha Jehovainia aran ajaschatniuitji.
Awakeasrik nekaatin
Takakmakrisha aya takatnuman enentaimsashtinian wari yainmakminiaitiaj?
Ii takakmajain warasar pujakur wari urukattaj?
Jehovaka Kristu aentsnaka ni utsumamurin susartatjai tana nu nekasaiti tusam wari itiurkatniuitiam?
NUKAP NEKAATA
Yuusa chichame kuitkia yajauchiti tawash nu nekaata.
Kuitjiai itiura yaimiakur Jehová waramtiksamniaitiaj nu nekaata.
Kuitjiai yaimkiatniuncha Yuusa chichamesh wari ta? (jw.org nui aarma irunu)
Kuit wainkiattsar warinsha nakurustin yajauchiashit?
Yuusa chichame tana nu nekaata: Kuit takuttsar nakurutai (¡Despertad!, marzo 2015)
Kasa kuitjiai nakuru wemiania nu nuna turatniun urukamtai iniaisamia nu nekaata.
Kawai tsekenan iistinian ti wakeriniuyajai (La Atalaya, 1 de noviembre 2011)