AKANKAMU 51

Ii chichamusha penker atiniaiti

Papiiniumia iistin

Jehovaka chichamtin najakrataiti. Jehová chichamtin najakrata asa penkera nuna chichasarat tusa wakerawai (Sántiak 1:26 aujsata). Nuyanka Jehová waramtiksatai tusar itiur chichaktiniaitiaj?

1. Itiur chichaktiniaitiaj?

Yuus papii tawai: “Tuma asamtai tuke túrarmena núnisrumek shiir enentáimtiknaisarum mai̱ ikiakánai ajatarum” (1 Tisarúnikianam [1 Tesalonicenses] 5:11). Yaksha majat puja nekamek? Ikiakartasam wari turamniaitiam? Shiir enentaimtajme tusam ni urukuit nuna aujmattsamniaitme. Yaksha majat pujakui ikiakartasam Yuus papiinmaya tuimpia aujtusaintiam? Nukap iruneawai. Warintia titiatam nuin enentaimsaip antsu itiur titiatam nuisha enentaimsata. Yaksha ikiakakmeka shiir chichamjai waitnentsam aujmattsata (Nekatai̱n Jintinkiartin [Proverbios] 15:1).

2. Itiur chichakchatniuitiaj?

Yuus papii junis tawai: “Mui̱jmiai̱ chicham chichasairap” (Ipisiunam [Efesios] 4:29 aujsata). Yajauch chicham chichaschatniuitji. Antumtikshim chichaschatniuitji. Yaksha tsanumprashtiniaitji tura aujmattsashtiniaitji (Nekatai̱n Jintinkiartin [Proverbios] 16:28 aujsata).

3. Penkera nu aujmattsatniuncha wari yainmakminiaitiaj?

Ii enentaimmia tura itiur nekapeaj nuka chichamujai paant ajawiti (Rúkas [Lucas] 6:45). Tuma asamtai ashi penkera nu chichaktiniaitji tura chikich shiir antukminia nu tura chikich aentsnasha penker enentaimtusminia nusha chichaktiniaitji (Jiripiusnum [Filipenses] 4:8). Penkera nu chichastasrikia peliculasha penkera nu iistiniaitji tura nampesmasha penkera nu antuktiniaitji, nuya ii amikrisha penker artiniaiti (Nekatai̱n Jintinkiartin [Proverbios] 13:20). Chichatsuk emka enentaimsatniuitji. Ii tutai itiurak enentaimsat tu enentaimsata. Yuus papii junis tawai: “Shuar yajauch chichamtinkia ni chichame̱ja̱i̱ puya̱ja̱i̱ íjiutniua áitkias ni írutkamuri̱ enentái̱n wáitkiawai antsu péṉker chichamtinia nuna chichame̱nka tsuákaiti” (Nekatai̱n Jintinkiartin [Proverbios] 12:18).

PENKER NEKAATAI

Jehová waramtiksatai tusar nuya chikitcha ii chichamujai kakarat tusar itiur chichastiniaitiaj nu nekaatai.

4. Esetram enentaimsam chichakta

Penker enentaimtsuk warinsha takurkia urukamtai taja tu enentaimsattaji (Sántiak 3:2). Gálatas 5:22, 23 TNM aujsarum juna aujmattsatarum:

Jui aujsajnia nui enentaimsam uruku atasam wakeram? Urukamtai ainis atasam wakeram?

1 Kurintiunam 15:33 aujsarum juna aujmattsatarum:

Amikrum chichainiamu tura peliculanam chichainiamu nuya nampetnum tana nu antakum amesha itiurak chichaktatam?

Aishman ni najaneana aitkiasan ni nuarincha kajekmajai tana nuna nakumkamu irunu: 1. Kejekmajai chichas nampean antawai. 2. Televisionnum maaniniamun iniankainiamun ni amikrijiai iiyak chara chara ajawai. — Yajauchia nu najaneakrikia turutskesha penkera nu najaneakrikia itiur chichau atataj?

Aishman ni najaneana aitkiasan ni nuarincha aneasmajai tana nuna nakumkamu irunu: 1. Yuusa chichamen aujui. 2. Aishman ni nuarijiai metek wajas iruntainiam ni amikrin aujainiawai. — Yajauchia nu najaneakrikia turutskesha penkera nu najaneakrikia itiur chichau atataj?

Eclesiastés 3:1, 7 TNM aujsarum juna aujmattsatarum:

Urutain chichakchatniuitiaj?

5. Chikich aujmatkumka ni penkeri aujmattsata

Ii tajinia nujai chikich aents yajauch enentaimtiksaij tusar wari itiurkatniuitiaj? VIDEO iisrum juna aujmattsatarum:

VIDEO: Chikich aents penker awajsamnia chichasartai (4:07)

Aishman itiur chichaj nuna yapajiatniuitjiai urukamtai tu enentaimia?
Penkera nuna chichau atasa itiurkamia?

Nekatai̱n Jintinkiartin [Proverbios] 3:7 aujsarum juna aujmattsatarum:

Chikich aentsna yajauch aujmattsatin wakerakrikia warinma enentaimsatniuitiaj?

Sántiak 3:8, 9 aujsarum juna aujmattsatarum:

Yaksha yajauch aujmatramsaitkiui jui aarmash itiura yainmakminiait?

6. Ame aishrumjai turutskesha nuarmijiai aujmatkumka kajetsuk aujmattsata

Jehovaka nuarijiai turutskesha aishrijiai kajernaitsuk aujnaisarat tusa wakerawai. VIDEO iisrum juna aujmattsatarum:

VIDEO: Nuatnaikiaru mai anenai tura mai arantunai ajainiakka penker pujuartatui (3:08)

Nuatnaikiaruka kajernaitsuk aujmattsatai tusar warinia turawartiniait?

Ipisiunam [Efesios] 4:31, 32 aujsarum juna aujmattsatarum:

Nuatnaikiaruka penker pujustai tusar itiur chichakartiniait?

Jehovasha ni uchirin Jesusan itiur enentaimta nuna tiniuyayi. Matéu 17:5 aujsarum juna aujmattsatarum:

Jehová shiir chichamtiniana nunisam ame jeemin pujuiniajai chichastasam wari turatniuitiam?

Nuwa ni nawanchiri nakumkamun iis warareawai. — Yaksha penkeran najanamtainkia wararsata.

CHIKICHKIA JUNIS TINIU AINIAWAI: Wikia wi enentaimmian nakak tiniuitjiai. Yaksha wi takui kajeakka nuka niniuiti.

Amijiaisha ainis tuiniamu penkerashit? Urukamtai tu enentaimiam?

WARI NEKAAM

Ii tajinia nujai chikich aents ikiakarminiaitji turutskesha majat enentaimtiksamniaitji. Warintiataj, urutaiya titiataj tura itiura titiataj nuisha enentaimsatniuitji.