-
Yajauchia nu tura waitiamusha urukamtai ti nukap irunea?Warasam tuke iwiaku pujuttame - Yuusa chichame unuimiartai
-
-
Jusha nekaata
Satanás Jehovaka penkerchaiti timiania nui Yuusan tsanumpruamiayi. Jehová waitiamun amuktatna nui ni naarincha paant ujukattawai. Wikia penkeran najanniuitjiai tusa nuna turattawai. Yuusa naari paant ujukamu atiniaiti (Matéu 6:9, 10).
-
-
Jesussha warinia turatta?Warasam tuke iwiaku pujuttame - Yuusa chichame unuimiartai
-
-
AKANKAMU 33
Jesussha warinia turatta?
Yuus Jesusan uunt anaikiaiti. Jukerusan ju nunkan iwiarattawai. Wariniak turat nu nekaatai. Amesha nu tsawan jeat tusam nakasminiaitme.
1. Jesús uunt anaikiamu asa ju nunkanam penker ati tusasha wariniak najanat?
Armagedón mesettinkia Jesuska aents anaikiamu eketainiana nuna tura yajauch aents ainiana nunasha mash amuktatui (Apukarípsis 16:14, 16). Nu turunamtainkia ju chicham mash uminkiattawai: “Yusan umircha ainia nuka ishichik tsawant pujus amuukartatui” (Yus Kanta [Salmo] 37:10). Ashi aents penker nawamnaikiar matsamsarat tusa Jesús ju nunkan iwiarattawai (Isayas 11:4 aujsata).
2. Ju nunkanam Yuus wakeramu najannakui itiurak matsamsartataj?
Jesús ashi nunkanam uuntri ajasmatainkia “Yusan enentáimtinkia nuṉka sunasartatui. Túram nui tuke pujusártatui” (Yus Kanta [Salmo] 37:29). Ashi aents penker ajasarmatai aentska aya penkerak matsatainiakui tura Jehovan anenakui nuyasha mai anenai ajainiakuinkia itiurak aminiait? Ju nunkanam pujamuka ti penker atatui. Yaksha sunkurmakchattawai tura ashi aents tuke iwiaku pujuartatui.
3. Jesús yajauch aentsun amuk urukatin?
Yajauch aentsun amuk Jesús mil uwi uunt ajas pujuttawai. Nu tsawantin Jesús nuya nijiai uunt ajasartatna nu, aentsun tunaartincha ajasarat tusar yainkiartatui. Mil uwi amuwakui ju nunkaka shiiram ajastatui. Aentska Jehovan umirainia asarmatai warasar pujamu atatui. Nu turunamtainkia Jesús ni apari Jehová uunt ajas pujut tusa iniaisattawai. Nu turunamtai Yuusa naarinkia penker ujukamu atatui (Mateo 6:9, 10 TNM). Jehová penker asa ni aentsrin penker wainniuana nu paant nekanattawai. Nuyasha Iwianchin tura Iwianchi suntarincha aintsan yaksha umiachunka Jehová mash amuktatui (Apukarípsis 20:7-10). Yuus ju nunkan shiiram amajsattana nuka tuke atatui.
PENKER NEKAATAI
Yuus ni chichakman umiktatui urukamtai ainis taji nu nekaatai.
4. Naamkaru eketainiana nuka amuukartatui
Aentska tuke chikich aentsun itiurchat amajsattsa nupetkaiti (Eclesiastés 8:9 TNM). Aents itiurchat amajkartusaruana nuna iwiarat tusa Jehová Jesusan anaikiaiti.
Taniar 2:44 tura 2 Tisarúnikianam [2 Tesalonicenses] 1:6-8 aujsarum juna aujmattsatarum:
Aents anaikiamu eketainiana nuna tura nin yayainiana nunasha Jehová Jesusjai itiurkartin?
Jehová Jesusjai uruku asar penker yaimkiartatui tame?
5. Jesuska nekas penker yainkratkattawai
Jesuska ashi nunkanam uunt asa warinkisha penkera nuna turattawai. Jesús aentsun yaintasa wakerana nu nekaattsarum tura Jesús kakarman achiakeana nusha nekaattsarum VIDEO iistarum.
Jesús ju nunkanam pujus najanamiania nunaka uruma nui turatin asa ainis turamiayi. Jui aarma irunna nusha tua uminkiat tusam wakeram? Uruma nui turunattana nu Yuus papiinium aujsatarum.
JESÚS JU NUNKANAM PUJUS...
JESÚS NAYAIMPINIAM PUJUS...
... nasencha tura chichimincha miamtikiamiayi (Márkus 4:36-41)
... nunka emeskamu ainiana nunasha iwiarattawai (Isayas 35:1, 2)
... untsuri aentsun ayurkamamiayi (Matéu 14:17-21)
... tsukai waitiamunka amuktatui (Yus Kanta [Salmo] 72:16)
... untsuri aentsun tsuarmiayi (Rúkas [Lucas] 18:35-43)
... ashi aentsun tsuartatui (Isaías 33:24 TNM)
... jakaru ainiancha iniankiarmiayi (Rúkas [Lucas] 8:49-55)
... jakatniuncha amuktatui (Apukarípsis 21:3, 4)
6. Jesús ju nunkan iwiaramtai penker pujuttaji
Yama nankamtaik Yuus wakerimiania aintsan ati tusa Jesús ju nunkan iwiarattawai. Nu turunamtai aentska tuke iwiaku pujuartatui. Yuus wakeramu uminkiat tusa Jesús warinia najanatta nu nekaattsarum VIDEO iistarum.
Yus Kanta [Salmo] 37:4 aujsarum juna aujmattsatarum:
Jehová ame wakeramna nuna mash amastatna nu nekakum itiur enentaimiam?
CHIKICHKIA JUNIS TINIU AINIAWAI: Iruntrarik ju nunkanam itiurchat irunna nuka iwiaramniaitji.
Wari itiurchatna aents naamkaru iwiaratniun tujintiainiamun Jesús iwiaratta?
WARI NEKAAM
Jesús Yuus anaikiamu asa Yuus wakerana nuna ejetuktatui. Ju nunka shiiram ajasmanum aentska Jehovan tuke enentaimtiartatui.
Awakeasrik nekaatin
Jesús Yuusa naari penker ujukamu ati tusa wariniak turat?
Yuusa chichame Jesús ju nunkan penker amajsattawai tana nuka nekasaiti urukamtai taji?
Jesús ju nunkan iwiarattana nui wari nekaska turunat tusam wakeram?
NUKAP NEKAATA
Armagedonsha warimpiait nu nekaata.
Ju nunkanam ti waittsatin atatui Jesús timiania nu jui nekata (Mateo 24:21).
Jesús uruma nui turattana nui enentaimsatai tusar aishman ni nuari tura ni uchirijiai warinia turawarminiait?
Wi enentaimiamun nekaattsan wakerimiajai tana nu aujsata. Aents itiurchat iwiarnarat tusa wakerin warinia nekaamia nu nekaata.
Yuusa chichamen nekaawar penker pujuiniawai (La Atalaya, 1 de enero 2012)
-